Read Kok Borok SAMUNG 15 Bible Online

SAMUNG 15 - Kok Borok bible

SAMUNG 15

¹Borok khoroknwi khoroktham Judiani Antioko phai kha, hakhe takhukrokno hai hwnwi phrwng kha, “Musini Kerongo tongma hai sakur rajak ya khe norok mwthangjagwi man ya.”

²Pol bai Barnaba omono tẃiwi bórok bai belai khe tokra rw laiwi kók báng lai kha. Abo bai’-no chonghorrok tei okrarok bai omono tẃi sa laina bagwi Pol bai Barnaba tei Antiokni khoroknwi khoroktham Jerusalemo ma thángnai hwnwi khá chong kha.

³Bórok motha bai rohorjak bai kha, hakhe Phoinikia bai Samaria tẃi tháng twtwi bahai khe buini bororok Kaitorni phaising khá kiphil kha abono saui khna rw kha. O kók khnaui bebak takhukrok belai tongthokjak kha.

⁴Jerusalemo sógwi khe bórok motha bai, chonghorrok bai tei okrarok bai bórisokjak kha. Kaitor bórokni yak tẃi aswk samung khlaimarokno bórok sa-o khna rw kha.

⁵Phiya Pharisai gutni baksa poito khlainairok bachaui hai hwnwi sa kha, “Bórok sakur rajakna nangnai, hakhe Musini Kerong rákhok di hwnwi sajakna nangnai.”

⁶Chonghorrok bai okrarok o kókno sa laiwi nai laina hwnwi kuthum lai kha.

⁷Kók-lam kwbángma sa laima ulo Pitor bachaui hai hwnwi sa kha, “O takhukrok, norok saui mano buini bororok ani khúk tẃi Kothoma Kaham khnaui poito khlaina tẃi khe Kaitor norokni bere ano chongma balok kha.

⁸Hakhe borokni bwkhano saui mannai Kaitor bo buini bororokno yachakmano phunukna bagwi chwngno rw tẃi’-no bóroknobo Phola Kwthar rw kha.

⁹Bo bórok bai chwngno juda khe nuk ya; bórok poito khlaima bai bo bórokni bwkhano kuphur khlai kha.

¹⁰Hakhe ba a poito khlainairokni phikungo poja boksaui tamo wngwi norok tabuk Kaitorno potalina nai? O poja chini chuchusongbo balwi man ya, chwngbo man ya.

¹¹Hai ya kho! Chwng poito khlaiwi Subrai Jisuni khairokma bai mwthangjak kha, bórokbo katswi omo hai’-no.”

¹²O kók bai bebak bororok siringcha wng kha, hakhe Kaitor buini bororokni bisingo Pol bai Barnabani yak tẃi aswk uanamasingcha samung bai ha-o nuk ya samung khlaimani a kók samano khnaui tong kha.

¹³Pol bai Barnaba kók saui pái khe Jakob hai hwnwi sacha kha, “Takhukrok, ani kók khna bai di!

¹⁴Kaitor buini bororokno naikhlaiwi bini borok khlaina hwnwi bahai khe bórokni bere baksano chong gra kha abo Simon saui khna rw kha.

¹⁵Diyarirok sama kók bai o kók gothok lai-o. Tamo hwn ba Elembago hai hwnwi sa-o,

¹⁶“ ‘Omoni ulo ang kiphilnai hwnwi Subrai sa-o, hakhe Daudni nok klaijakno ang tang phinai. Ang bini kurung karangno tang phinai, hakhe abono tisa phinai.

¹⁷Hakhe tei bebak bororok Subraino naituknai, ani borok wngna bagwi ringjaknai bebak buini bororok Subraino naituknai.

¹⁸Agi phuru o kók si rwnai a Subrai omono sa-o.’ ”

¹⁹Jakob hai hwnwi sa rwrwgo, “Ani kók khe ahai, Kaitorni phaising khá kiphilnai buini bororokno chwng tekto rwthai kwrwi.

²⁰Aboni slái takjak mwtaino barokmani abono ta chá di, buitali-buitala ta wng di, totra sebwi butharjak muino ta chá di, phiya thẃi ta chá di hwnwi chwng bórokno swihor thai tongo.

²¹Tamni hwn khe Sabat sal brúm brúm thumnokrogo Musini Kerong porijakma balok kha, hakhe taun brúm brúm bini kók pírjago.”

²²Hakhe chonghorrok bai okrarok bebak motha bai baksa bórokni bere borok khoroknwi khorokthamno chongwi Pol bai Barnabani logi Antioko rohorna hwnwi chap lai kha. Bórok Judas bai Silano chong lai kha, a Judano Barsababo hwno; a khoroknwi nwi’-no takhukrok bai bórom khlaijago.

²³Bórok omo hai khe bórokni yak tẃi kóktun rohor lai kha: “Chwng chonghorrok tei okrarok, norokni takhukrok. Antiok, Siriya tei Kilikia-o tongnai buini bororokni bisingni bebak takhukrokno chwng khápang rohoro.

²⁴Chini oroni borok khoroknwi khoroktham thángwi kók saui norokno tekto rwui khá hamya khlaiwi tong kha, chwng hai hwnwi khna kha; hai phano ahai khlai di hwnwi chwng bórokno sa ya.

²⁵Hakhe borok khoroknwi khorokthamno norokni thani rohorna hwnwi chwng kuthumui chap lai kha. Chini Subrai Jisu Khristoni mungwi butharjakna suda gosinairok khájama Barnaba tei Pol bai baksa bórok thángnai.

²⁷Hakhe chwng Judas bai Silano norokni thani rohor kha, chwng swimani o kókno bórok sak baithang norokno sauinai.

²⁸O nangma kókrokno karwi omono slái tei poja norokno phin ya hwnwi Phola Kwthar bai chwng chap lai kha.

²⁹Takjak mwtaino barokmani abo ta chá di, thẃi ta chá di, totra sebwi butharjak muino ta chá di, buitali-buitala ta wng di. Omorok khlai yaui tong khe norok hamchanai. Norok kaham kwrwng wng thung.”

³⁰A bororok rohorjak kha, hakhe Antioko tháng kha, aro poito khlainairok jotono kuthum rwui bórokni yago a Kóktunno rw kha.

³¹Bórok kóktunno pori khe khápang srangna kók khnaui jai kheno tongthokjak kha.

³²Judas bai Sila wng kha diyari, hakhe aswk kók sa laima bai takhukrokno khábo rak rw kha, phanbo rw kha.

³³Aro kisa tongwi bórok kaham kwrwng khe takhukrok bai rohorjak kha, hakhe bórokno rohornairokni thani kiphilwi tháng kha.

³⁴[Phiya ba Sila aro tongna hwnwi khá chong kha.]

³⁵Pol bai Barnaba Antioko kisa tong lai kha. Tei kwbángmarok bai baksa bórok Subraini kók phwbo phrwng kha, píbo pír kha.

³⁶Ulo Pol Barnabano hai hwnwi sa kha, “Him di tho, chwng Subraini kók pírmani joto tauno kiphilwi takhukrokno nai lai anw, hakhe bórok bahai khe tong bai abo saui man anw.”

³⁷Barnaba hwn khe Johon Markno bórokni logi tlangna nai-o,

³⁸yang Pol khe bono tlangnano chajak ya, tamni hwn khe bo bórok bai baksa samung pái súgwi tong ya, bo Pamphulia-o bórokno khibiui kiphilwi tháng kha.

³⁹Bórok jai kheno kók báng lai kha, hakhe bo bai bo kak lai kha. Barnaba Markno tlangwi rungtor bai Saipraso tháng kha,

⁴⁰yang Pol khe Silano tlangwi Subrai bai khairokjakna tẃi khe takhukrok bai Subraini yapha-o yapharjagwi kutul lang kha.

⁴¹Bo Siriya bai Kilikia tẃi thángwi motharokno rak rwui klang kha.