Read Kok Borok SAMUNG 16 Bible Online

SAMUNG 16 - Kok Borok bible

SAMUNG 16

¹Pol Derbe bai Lustra-o sógwi kha. Timothi hwnwi poito khlainai khoroksa aro tongo; buma wng kha poito gwnang Judaijwk, bupha khe Grik.

²Lustra bai Ikonini takhukrok Timothino kahamno hwnwi sa bai-o.

³Pol Timothino bini logi tlangna nai-o, aboni bagwino bo bono sakur ra rw kha. Bo tamni ahai khlai kha hwn ba, a ha-o tongnai bebak Judairok Timothini bupha Grik se hwnwi saui mano.

⁴Bórok taun brúm brúm thángwi Jerusalemni chonghorrok bai okrarok kók chapmarokno poito khlainairokno saui omo hai khe tong di hwnwi sa kha.

⁵Hakhe motharok kwrak khe poito khlai rwrwgo, sal brúm brúm báng rwrwgo.

⁶Bórok Phrugia bai Galatia amchoi tẃi tháng lai kha, tamni hwn khe Phola Kwthar bórokno Asia angkoro Kothoma Kaham pír rw li ya.

⁷Bórok Musiani gana-o sógwi kheno Bithunia angkoro hapna nai lai kha, tamo khe Jisuni Phola bórokno hap rw li ya.

⁸Hakhe bórok Musia bising tẃi thángwi Troa-o tokhlai lang kha.

⁹Pol a horo Kaitor bai imang phunukjak kha, a imango bo Makidoniani borok khoroksa bachajak nuk kha. A borok bono hai hwnwi koiwi sa kha, “Makidonia-o se phai ja di, chwngno chuba phai di.”

¹⁰Pol a imang nukma logi’-no chwng Makidonia-o lam rwna hwnwi nai lai kha, tamni hwn khe chwng saui man kha aroni bororokni thani Kothoma Kaham pírna hwnwi Kaitor chwngno ring kha.

¹¹Chwng rungtor bai Troani thángwi sida Samotraki-o sógwi kha, hakhe teini salo Niapoli-o klai phai kha.

¹²Aroni chwng Philipi-o tháng kha, abo Makidoniani amchoi kotorni taun, abo’-bo Rumni hakhambar. A tauno chwng nokha salnwi saltham tong bu kha.

¹³Sabat salo chwng taunni phataro twi rukungo tháng kha, arono Judairok suri sano hwnwi chwng khá kamani. Chwng achuk laiwi aro kuthum lainai bwrwirok bai kók sa lai kha.

¹⁴Chini kók khnanairokni bere khoroksa wng kha Lidiya, bo Thuatirani bwrwi, chak sru-sru ríni bepar thwngnaijwk. Bo Kaitorno surinai bwrwi, hakhe Pol kók samano kaichomwi khnana bagwi Kaitor bini khá phiyogwi rw kha.

¹⁵Bo bai bini nokni bororok baptisma wng kha, hakhe bo chwngno hai hwnwi kobok kha, “Ang Subraino sói’-no poito khlainai hwnwi norok khá kaui tong khe, phai di, ani nogo tong phai ja di.” Bo chwngno kobogwi tlang kha.

¹⁶Salsa chwng suri san thani-o tháng phuru selengjwk khoroksa chini bwskango klai kha, bo mwtai hamya kolobjakma bai bwskangni kókno swkang baira sa-o. Bo borokni talikhani kók sa saui bini bubagrarokni bagwi rang kwbángma aji-o.

¹⁷Bo Pol bai chwngno rwktharwi hai hwnwi chirikhók kha, “O bororok Kaitor Kotorni selengrok se! Norok bahai khe mwthangjagwi mannai abono bórok sakhlai-o.”

¹⁸Omo tẃi khlaiwi tongmani bo balok kha, Pol ulo tekto nangjagwi uphilwi naharwi a mwtaino hai hwnwi sa kha, “Jisu Khristoni mungwi ang dagi-o, nwng bini bisingni ongkhorwi phai di!” A mwtai logi logi’-no bini bisingni ongkhorwi tháng kha.

¹⁹Bini bubagrarok rangni lama kwma kha hwnwi saui man kha, hakhe Pol bai Silano romwi bajaro bokhorokrokni thani sopre tlang kha;

²⁰bórok buj thumnairokni bwskango bórokno tubu-ui hai hwnwi sa kha, “O bororok wng kha Judai, bórok chini tauno udru mudru khe ton kha,

²¹Bórok phrwngmani a tongmung chini kerongno swbai-o. Chwng Rumsong, chwng omo tẃino khnauibo man ya, khlaiwibo man ya.”

²²Lukurok aro dai lai kha, buj thumnairok Pol bai Silani rírok sichigwi khibi kha, hakhe bórokno swprakna bagwi dagi kha.

²³Panjalwi swprakma ulo bórokno alongo da kha, hakhe jai khe mwrwkna bagwi along nainaino dagi kha.

²⁴O dagijakma bai along nainai bórokno bisingni khotolo chop kha, hakhe buphang hilik kongnwi-o bórokni yakung sitogwi kha kha.

²⁵Hor dibor ká twtwi-o Pol bai Sila Kaitorni thani suri san twtwi rwchap laiwi tongmani, yang tei chopjaknairok khnaui tongo.

²⁶Achomsa aro belai khe bangla phai kha, abo bai alongni ha yaphang kwlwisa kha. Atkasa bebak dugarrok kiyok kha, phiya chopjaknairokni sakni sorni dwkhwirok phrwi-phrwi klai bai kha.

²⁷Along nainai sicha kha, along dugarrokno kiyokjak nuk kheno chopjaknairok bebak’-no khár bai kha hwnwi bo uansuk kha, hakhe seng thorotsa sotroui saichung-saichung thwina nai kha.

²⁸Tamo khe Pol sotonwi hai hwnwi chirikhók kha, “Nwng sakno ta dera rw khu di, chwng jotono oro se!”

²⁹Along nainai chati tubu di hwnwi bisingo do lang kha, hakhe dwr-dwr khe kwlwibraui Pol bai Silani bwskango burungsa klai kha.

³⁰Bo bórokno phataro tubu-ui hai hwnwi sẃng kha, “O hodarok, mwthangjakna bagwi ang tamo khlaina nangno?”

³¹Bórok hai hwnwi sa kha, “Subrai Jisu Khristono poito khlai di, hakhe mwthangjaknai phiya nini nokni bororokbo mwthangjaknai.”

³²Hakhe bórok Subraini kókno bonobo sa kha, bini nokni jotono’-bo sa kha.

³³Aphuru’-no along nainai bórokno tlangwi kwsarok sú-ui rw kha, phiya a horo’-no bo bai bini nokni bebak borok logi logi’-no baptisma wng bai kha.

³⁴Bo Pol bai Silano bini nogo tlangwi mai chá rw kha, bo bai bini nokni bororok tongthokjak kha, tamni hwn khe bo tabuk Kaitorno poito khlai kha.

³⁵Teini phungo buj thumnairok sebuk okrarokno hai hwnwi dagi rohor kha. “A bororokno phiyógwi rohor di.”

³⁶Aboni bagwino along nainai Polno hai hwnwi sa kha, “Buj thumnairok norokno phiyók di hwnwi ano dagi hor kha. Tabuk norok kutulwi man kha, kwchang kwchang khe tháng si di.”

³⁷Tamo khe Pol sebuk okrarokno hai hwnwi sa kha, “Chini mungsa phano majra nukjak ya, hai phano bórok chwngno luku bwskango swprak kha-yang chwng le Rumni borok se. Ulo bórok chwngno alongo da kha. Tabuk khe tepsa khe rohorna nai kha, hai da? I’nhi, abo wng glak! Buj thumnairok se ma phainai, bórok sak baithang chwngno phiyógwi rohor thung.”

³⁸Sebuk okrarok o kókno buj thumnairokno saui khna rw kha; hakhe Pol bai Silano Rumni borok hwnwi khna kheno bórok kirijak kha.

³⁹Aboni bagwino bórok phaiwi bórokno koi phai kha, hakhe bórokno alongni tlangwi taunni kutul di hwnwi hwn kha.

⁴⁰Pol bai Sila alongni kutulwi Lidiyani nogo tháng kha. Aro bórok takhukrok bai malaiwi khá rak rwna bagwi kók sa kha, hakhe kutulwi tháng kha.