Read Kok Borok SAMUNG 19 Bible Online

SAMUNG 19 - Kok Borok bible

SAMUNG 19

¹Apolo Korintho tong phuru Pol a angkor bising tẃi tháng kha, hakhe Episo sók phai kha. Aro bo khoroknwi khoroktham sagrirokno nugwi

²hai hwnwi sẃng kha, “Poito khlaiwi norok Phola Kwthar da man kha?” “Phola Kwthar tongo hwnwi chwng khna trwng ya kho,” hwnwi bórok sa kha.

³Pol hai hwnwi sẃng kha, “Hakhe bu baptisma norok wng kha sla?” “Johon rwmani a baptisma,” hwnwi bórok sa kha.

⁴Pol hai hwnwi sa kha, “Johon rwmani a baptisma wng kha sumsok yakarnairokno rwjaknai se, phiya bo Israilrokno hai hwnwi sa-o, ‘Ani slái ulo phainaino poito khlai di.’ A phainai’-no Jisu.”

⁵Bórok o kókno khnaui Subrai Jisuni mungwi baptisma wng kha.

⁶Pol bórokni saka ya bera khe Phola Kwthar bórokno kobol phai kha; bórok hámung sini ya kókbo sa kha, Kaitorni kóknobo sa kha.

⁷Bórok bebagwi khorokchiknwi wng thotok.

⁸Pol thumnogo tháng kha, bo aro nokha taltham jora kirima kwrwi khe bororokno kók sa kha, kók-lam sa laiwi Kaitorni hani kókno bórokno kha hap rwna nai kha.

⁹Tamo khe baksa borok thenta tongo, bórok poitobo khlai ya, hakhe bebakni bwskango Subrai Lamano tẃi kók hamya sa kha. Aboni bagwino Pol poito khlainairokno tlangwi bórok bai kak lai kha, hakhe sal brúm brúm Turanni kók sajaknai nok bára-o kók-lam sa lai kha.

¹⁰Pol nokha bisiknwi jora omo hai khlai kha, hakhe Asia angkoro tongnai Judai bai buini bororok jotono Subraini kókno khna kha.

¹¹Polni yak tẃi Kaitor ha-o nuk ya samung kotor khlai kha.

¹²Bo khorogo sórmani rí bai sago tẃimani rítuku suda se hamyarokni thani tlangjak khe bemukrok kwmaui thángo, phiya mwtai hamyarok ongkhorwi thángo.

¹³Yang yang mwtai hamya rwkhlainai Judai khoroknwi khorokthamrok Subrai Jisuni mungwi abo hai khlaina nai kha. Bórok mwtai hamyarokno hai hwnwi sa kha, “Pol pírmani a Jisuni mungwi ang nono dagi-o.”

¹⁴Skeba hwnwi Judai ochai bokhorok khoroksa tongo, bini bwslasong khoroksni, bórokbo abo hai khlai-o.

¹⁵Hakhe mwtai hamya bórokno hai hwnwi sa kha, “Jisuno ang sini-o, Polni kókbo saui mano, hakhe norok le sabo sla?”

¹⁶A mwtai hamya kolobjak borok omo tẃi gusmara khe bórokni saka-o bakhlai rw kha, hakhe bórokno mechen kha. Bórok jotono kwsarok chajak baiwi rírok sichikjak baiwi bini nokni khár bai kha.

¹⁷Episo tongnai bebak Judai bai buini bororok o kókno khna kha; bórok bebak kirima cha kha, hakhe Jisu Khristoni mung teibo kotor hwnjak kha.

¹⁸Poito khlainairokni bere kwbángma’-no phaiwi bórok samung hamya khlaimano dak-dak khe gosi phai kha.

¹⁹Danda phunuknairokni bijaprok tubu-ui thumsa khe jotoni bwskango sók kha. A bijaprokni morokmung bórok lekhaui nai ba rukphaini rang lep bachi sai wng kha.

²⁰Omo tẃi khe Subraini kók kaham khe píbo pírjak rwrwgo, tobo tor rwrwgo.

²¹Omorok wng bai khe Pol Makidonia bai Gris tẃi Jerusalemo thángnani khá chong kha, bo hai hwnwi sa kha, “Ang aro tháng khe Rumobo ma habwinai.”

²²Hakhe bo Timothi bai Erasto, o logisong khoroknwino Makidonia-o rohor kha, bo khe Asia angkoro dwgwi tong bu kha.

²³Aphuru Episo Subrai Lamano tẃi belai udru mudru nang lai tongma jora.

²⁴Dimitri hwnwi rukphaini samung tangnai khoroksa tongo, bo Artemi mwtaijwkni mwtai nokno kosol khe rukphaini nok tago, hakhe bini o samungni bagwi taknairok jai kheno rang aji-o.

²⁵Bo bórokno tei bórok hai samung tangnairoknobo kwrẃngsa khe ringwi hai hwnwi sa kha, “O takhukrok, o samung tangwi se chini rang puisa phai-o, abono norok saui mano.

²⁶O Pol hwnjaknai tamo khlaiwi tong kha abo norokno nugwi tongo khnaui tongo. Bo sa-o tamo, borok takmani mwtai le abo mwtai ya, hakhe o Episni borok kwbángmano khá hap rwui man kha; abo simi ya, Asia angkor gwnangwibo borok kwbángmano khá hap rwui man kha.

²⁷Hakhe tabuk birman mungsa tongo; chini o samung hamya hwnjaknai. Abo simi ya, mwtaijwk kotor Artemini mwtai nokbo samung nangjak glak, hakhe Asia bai swngchar gwnangwi surijaknai a mwtaijwkni mung kotor kwma rwjaknai!”

²⁸Kuthumnairok a kókno khna khe bórok jolijagwi “Episni Artemi se mwtaijwk kotor!” hwnwi chirikhók lai kha.

²⁹A kutuk laimani abo taun gwnangwi rwchar kha. Bororok Polni logi himnai Makidoniani Gai bai Aristark o borok khoroknwino rom laiwi luku kuthum thani tlangwi do lang kha.

³⁰Pol bo sakno luku bwskango bachana nai kha, tamo khe poito khlainairok bacha rw li ya.

³¹Angkorni khoroknwi khoroktham bokhorok bini bikichingsongbo “Luku kuthum thani ta hap ja di,” hwnwi sa hor kha.

³²Aphuru’-no bebak kuthumnairok kutuk laiwi tong lai kha, baksa mungsa kókno tẃi chirikhók lai-o, baksa ba tei mungsa kókno tẃiwi chirikhók lai-o, tamni hwn khe bórok tamo wngwi kuthum lai kha abo suda kwbángma’-no saui man ya.

³³Aleksandar se oroni bothoma hwnwi lukuni bere baksa hwn lai kha, Judairok le bono bwskango bacha rw kha bla. Hakhe Aleksandar yak tail khlaiwi chini majra kwrwi hwnwi luku bwskango kók saui katina nai kha.

³⁴tamo khe bono Judai hwnwi saui manẃi bórok bebak thansa khe damnwi jora “Episni Artemi se mwtaijwk kotor!” hwnwi chirikhógwi tong lai kha.

³⁵Ulo taunni chokdri lukuno methebwi man kha. Bo hai hwnwi sa kha, “O Epissong, norok saui mano Epis taun se Artemi kotorjwkni mwtai nok mwrwknai, nokhasani klai phaimani a holong kwtharnobo mwrwknai.

³⁶Khoroksa phano o kókno in’-hi hwnwi man ya. Aboni bagwino norok siring siring ma se ma wngthai klai-o, hakhe uansuk yaui mungsabo tangthai kwrwi.

³⁷O bororok mwtai nokni manwibo khok ya, chini mwtaijwknobo hamya sa ya, ahai phano norok bórokno oro tubu lai kha

³⁸Khoroksa swkni bagwi tumungno Dimitri bai bini samung tangnairokni kók sana tong khe jerani sal salsa tongo, bokhorokrokbo tongo; bórok aro bo’-bo bono majra berwi man lai-o.

³⁹Norokni tumungno teibo kók tong phi khe abo luku kuthum kuthum thani kók pái lai man anw.

⁴⁰Wng ya khe oro birman tongo, tini o wngmano uru-muru wng kha hwnwi Rumsong chwngno majra berna phano tongo. O kutuk laimani yakni yógwi manna lama kwrwi, tamo wngwi omo wng kha abono chwng kaham khe saui man glak.”

⁴¹O kók sa baiwi bo kuthum laimano swbai rw kha.