Read Kok Borok SAMUNG 23 Bible Online

SAMUNG 23 - Kok Borok bible

SAMUNG 23

¹Pol Kaunsilno naisigwi hai hwnwi sa kha, “O takhukrok, tinini sal jora Kaitorni bwskango ang bwkha sutrang kheno tongwi phai kho.”

²Polni gana bachaui tongnairokno bini búkhúgo bu di hwnwi ochai bokhorok Anania dagi kha.

³Pol bono hai hwnwi sa kha, “O chwndwi phuljak deual! Kaitorbo nono bu se bunai! Nwng aro achugwi Kerong rwksaui ani buj khlaina nai-o, yang le ano bu di hwnwi dagiui nwng a Kerongno swbai tongsa tiro.”

⁴Polni gana bachaui tongnairok bono hai hwnwi sa kha, “Kaitorni ochai bokhorokno se nwng lachimasingcha khlai-o.”

⁵Pol hai hwnwi sa kha, “Takhukrok, bo ochai bokhorok hwnwi ang saui man ya. Elembago hai hwnwi sa-o, ‘Nini bororokni bokhorokno hamya ta se ta sa di.’ ”

⁶Baksa khe Sadukai, baksa ba Pharisai hwnwi saui manẃi Pol kaunsil bisingo sotonwi hai hwnwi sa kha, “O takhukrok, ang Pharisai se, Pharisai bwsa. Kwthwirok thangwi bachanai hwnwi khá tungma bai oro ang buj thumjagwi ma tongo!”

⁷Bo o kókno sama logi’-no Pharisairok bai Sadukairok uálaina cheng lai kha, hakhe bórok khek lai kha.

⁸(Tamni hwn khe kwthwirok thangwi bacha glak, suaribo kwrwi, mwtaibo kwrwi hwnwi Sadukairok sa-o; yang Pharisairok khe a kwthatham’-no gosi-o.)

⁹Chirikhók laima torsa wng rwrwgo, hakhe Pharisai bisingni Kerong phrwngnai khoroknwi khoroktham bachaui hai hwnwi jai khe’-no kók kasu-ui sa kha, “Chwng o borokni majra mungsa phano nuk ya. Mwtai eba khe suari se bo bai kók sa trwng na!”

¹⁰O uálaimung aswk hór chẃng lai kha Polno bórok phindrik-phandrak da khlai langno hwnwi sengkrak dagiphang kirijak kha. Bo aboni bagwino bini sengkrakrokno “Bisingo thángwi bono aroni sopreui tubu di, hakhe chopnogo tlang di,” hwnwi dagi kha.

¹¹Teini horo Subrai Polni thani bacha phaiwi hai hwnwi sa kha, “Bwkha tor di, nwng oro Jerusalemo ani kók sa kha, hakhe Rumobo omo hai’-no ma saiwinai.”

¹²Teini phunugo baksa Judairok kuthum laiwi kók chap lai kha, Polno buthar ya sak bórok mungsa phano chábo chá ya nubo nung ya hwnwi swmai tang lai kha.

¹³A kók chap lainairok khorokbrwichini slái borok báng anw.

¹⁴Bórok ochai okrarok bai okra-chakrarokni thani thángwi hai hwnwi sa kha, “Polno buthar ya sak mungsa phano chá ya hwnwi chwng swmai kwrak tang kha.

¹⁵Hakhe tabuk, norok bai Kaunsil Polno norokni oro tubukhlaina hwnwi sengkrak dagiphangno sa hor di, Pol katswi tamo khlai kha khlai ya abono teibo saui manna nai-o hwnwi bono sa hor di. Yang bo oro sók phai ya sini’-no bono butharna bagwi chwng tiyar wngwi tong anw.”

¹⁶Tamo khe Polni bukhukni bwsla a kók chap laimano saui man kha; aboni bagwino bo thángwi chopnogo habwi o kókno Polno saui kha.

¹⁷Hakhe Pol sengkrak okra khoroksano ring hor rwi bono hai hwnwi sa kha, “O chwraino sengkrak dagiphangni thani tlang di; bini kók tháisa sajaknai tongo.”

¹⁸Sengkrak okra bono tlang kha, hakhe sengkrak dagiphangni thani tubu-ui hai hwnwi sa kha, “Alongo chopjaknai Pol ano ringwi nini thani o chwraino tubu di hwn kha, bini kók tháisa sajaknai tong pho.”

¹⁹Sengkrak dagiphang bono yak tolwi tepsa khe tlangwi hai hwnwi sẃng kha, “Ani thani nini tamo sajaknai tong?”

²⁰Bo hai hwnwi sa kha, “Judai hodarok Polno khwna kaunsilo tubukhlai ja di hwnwi nono sa horna bagwi kók chap lai kha. Pol katswi tamo khlai kha khlai ya abono bórok teibo saui manna nai pho.

²¹Tamo khe bórokni kók ta khna di, tamni hwn khe khorokbrwichini slái borok báng anw, bórok huijagwi bono naisingnai. Bono buthar ya sak chábo chá ya nubo nung ya hwnwi bórok swmai tang laijak. Bórok tabuk abono khlaina nai-o, hakhe nwng tamo sana nai abono naisingwi tongo.”

²²Sengkrak dagiphang hai hwnwi sa kha, “Nwng ang sa phaimani omono kebono ta sa di.” Hakhe bo chwraino rohor kha.

²³Sengkrak dagiphang bini sengkrak okra khoroknwino ringwi hai hwnwi sa kha, “Tini sarikphangni bisingo sengkrak nwira Kaisaria-o rohorna bagwi tiyar khlai di, bórokni logi korai kanai sengkrak khoroksnichi bai makal koknai sengkrak nwira rohorna bagwi tiyar khlai di.

²⁴Polni bagwi korai maknwi maktham tubu-ui ton di, hakhe bono kaham kwrwng khe gobornor Philiksni thani tunwi rwui di.”

²⁵Aphuru sengkrak dagiphang omo hai khe swi hor kha:

²⁶“Hoda bokhorok gobornor Philiksni thani Klodo Lusini kók: Ang nono khulum horo.

²⁷Judairok o borokno rom laiwi butharna nai lai kha. Ang saui man kha bo Rumni borok, aboni bagwino ang sengkrakrok bai thángwi bono tubu kha.

²⁸Bórok tamni bono majra ber abo saui manna naima bagwi ang bórokni kaunsilo bono tlang tháng kha.

²⁹Butharjakna nangnai eba alongo chopjakna nangnai abo tẃi samung bo mungsa phano khlai ya abo ang saui man kha; bono majra berma khe bórokni kerongni kókno tẃi se.

³⁰Judairok baksa bono butharna kók chap lai kha abo ano sa phai khe ang bono nini thani rohorna khá chong kha. Gobornorni bwskango bono majra ber di hwnwi ang majra bernairokno saui rw kha.”

³¹Sengkrak dagiphang dagima hai’-no sengkrakrok Polno alongni tubu-ui a horo Antiphatri jora tlang kha.

³²Teini salo sengkrakrok chopnogo kiphil kha, hakhe Polno tlangna bagwi korai kanai sengkrakrokno rohor kha.

³³Bórok bono Kaisaria-o tlang kha, gobornorni thani a kóktun yaphar kha, hakhe Polno bini yago rw kha.

³⁴Gobornor kóktun poriui “Nwng bu angkorni borok?” hwnwi Polno sẃng kha. Bono Kilikiani borok hwnwi saui manẃi

³⁵bo hai hwnwi sa kha, “Nono majra bernairok sók phai khe ang nini kókmung khna anw.” Hakhe Polno Herodni noyungo mwrwgwi ton di hwnwi bo dagi kha.