Read Kok Borok SAMUNG 24 Bible Online

SAMUNG 24 - Kok Borok bible

SAMUNG 24

¹Nokha salbani ulo okra-chakrarok khoroknwi khoroktham tei Tertul hwnwi ukil khoroksa bai ochai bokhorok Anania Kaisaria-o sók phai kha. Bórok gobornor Philiksni bwskango bachaui Polno majra ber kha.

²Tertul aro tubujagwi Polno hai hwnwi majra ber kha: “O hoda bokhorok, nwng kaham khe bokhorokni samung khlaima bagwi chwng aswk sal kwchang kwchang khe tongwi phai lai kha, phiya nini jarwi chini o hano jalina bagwi samung kaham kwbángma khlaijak kha.

³Chwng khá bai khúk bai nono hambai rwui ha gwnangwi omono kaham hwn lai máng tongo.

⁴Hai phano ang nono kwbáng dua rwna nai ya, hakhe chini kisicha kókmung khna jaba di.

⁵Chwng nuk kha o borok kirimasingcha jwngjal se; swngchar gwnangwi bo Judairokni bisingo uru-muru phnang kha, phiya Nasaret gutni bokhorokrokni bere bo’-bo khoroksa.

⁶Bo noktharno suda kwthar ya khlaina nai kha, hakhe chwng bono rom lai kha. [Chini Kerongno rwksaui chwng bini buj thum anw hwnwi khá chap laimani,

⁷tamo khe sengkrak dagiphang Lusi phaiwi bono chini yakni segwi tlang kha.

⁸Hakhe Lusi bono majra bernairokno nini bwskango bacha phai di hwnwi dagi kha.] Nwng o borokno sẃng khe chwng bono majra bermani bebak kókmungno nwng’-no bini khúk tẃi saui man anw.”

⁹Judairokbo abo hai’-no majra berwi o kókrok bebak’-no kubui hwnwi sa lai kha.

¹⁰Polno kók sa di hwnwi gobornor yak tail khlai kha, hakhe Pol hai hwnwi sa kha, “Ang saui mano bisi kwbángma wng kha nwng o dophani bokhorok wngwi phai kha, aboni bagwino ang khá torwi nini bwskango ani kók sa-o.

¹¹Nwng sẃng khe saui man anw ang surina hwnwi Jerusalemo toksaui thángmani nokha sal chiknwi phano wng ya kho.

¹²Judairok noktharo ano khoroksa bai phano tokrabo rw laima nuk ya, bororokno tunglok rwmabo nuk ya, thumnokrogo buya, taunni kwrẃngsa-o buya,

¹³eba khe ano tabuk majra bermaroknobo bórok kubui hwnwi phunugui man ya.

¹⁴Ang nini thani o kókno gosi-o: Bórok lama cha ya hwnmani a Lama tẃi’-no ang chini chuchusongni Kaitorno suri-o. Phiya ba Musini Kerongo swiwi klangmani bai diyarirokni bijabo swiwi klangmani abórokni joto kókno’-no angbo poito khlai-o.

¹⁵Borok kaham bai borok hamya dalnw nwi’-no thangwi bachanai hwnwi bórok khatungma hai’-no angbo Kaitorno khatungwi tongo.

¹⁶Aboni bagwino ang Kaitor bai borokni bwskango bwkha sutrang khe máng tongna nai-o.

¹⁷“Jerusalemni kutulmani nokha bisiknwi bisiktham ulo ang ani bororokni thani rang kisa tubuna bagwi phiya pun tok ratharna bagwi aro tháng kha.

¹⁸Ang omono khlaiwi tong phuru bórok ano noktharo súchajak nuk kha. Aphuru ani thani borok kuthumjakbo kwrwi, kutuk laimabo kwrwi.

¹⁹Tamo khe Asia angkorni khoroknwi khoroktham Judairok oro tongo; ano majra berna mungsa swk tong khe bórok nini bwskango phaiwi majra berthai klaimani.

²⁰Eba khe ang kaunsil bwskango bacha phuru bórok ani bubo tẃi majra nuk kha abono o bororokno sa thung,

²¹ang bórokni bwskango bacha phuru o kók tháisa simi se sotonwi sa-o, ‘Kwthwirok thangwi bachanai hwnwi poito khlaima bai tini ang norokno bwskango buj thumjagwi ma tongo.’ ”

²²Philiks a Lamani kók kaham khe saui manjak, hakhe bo bórokno rohor graui hai hwnwi sa kha, “Sengkrak dagiphang Lusi sók phai khe ang norokni buj thum anw.”

²³Bo sengkrak okrano hai hwnwi dagi kha, “Polno mwrwgwi ton di, tamo khe kisa-misa bini muchung tẃi ton di, bini bororok bini nangmani manwi rw phaimano ta kasu di.”

²⁴Nokha salnwi saltham ulo Philiks bihik Drusila bai phai kha, bihik wng kha Judaijwk. Bo Polno na rw hor kha, hakhe Pol Khristo Jisuno poito khlaimani kók samano khna kha.

²⁵Phiya ba Pol kaham khe tongnani kók, sak soinani kók tei phainai Jerani Salni kók saui tong phuru Philiks kirijak kha, hakhe hai hwnwi sa kha, “Nwng tabuk tháng si di. Lama man khe ang nono tei uáisa ring rw hor anw.”

²⁶Hai phano Pol kisa swk rang rw anw hwnwi bo khá kaui tongmani; hakhe aboni bagwi bo bono ring ring rw horwi kók sa lai-o.

²⁷Nokha bisiknwi láiwi Philiksni yagulo Porki Phesto gobornor wng kha. Philiks Judairok bai kaham hwnjakna nai-o, aboni bagwino bo Polno alongo klangwi tháng kha.