Read Kok Borok SAMUNG 25 Bible Online

SAMUNG 25 - Kok Borok bible

SAMUNG 25

¹Phesto a angkoro sók phaiwi nokha salthamni ulo bo Kaisariani Jerusalemo tháng kha.

²Aro ochai okrarok bai Judai hodarok phaiwi Polno majra ber lai kha. Bórok Phestono hai hwnwi koi kha,

³“Polno Jerusalemo tubu jaba di,” tamni hwn khe bórok bono lama-o butharna hwnwi kók chap laijak.

⁴Phesto hai hwnwi sa kha, “Pol Kaisaria-o alongo chopjagwi tonjak kha, ang’-no aro dakti kiphilwi tháng anw.

⁵Norokni hodarokno ani logi Kaisaria-o rohor di, hakhe tumungno o borokni mungsa swk cha ya tong khe bono majra ber di.”

⁶Phesto tei nokha salchar salchi slái kwbáng sal bórok bai tongwi Kaisaria-o tháng kha. Teini salo bo buj thumma achukthai-o achuk kha, hakhe Polno tubu di hwnwi dagi kha.

⁷Pol sók phai khe Jerusalemni phainai Judairok bono chorsa khe bacha laiwi bono betlai khe majra kwbángma ber lai kha, bórok a majra bermarokno kubui hwnwi phunugui man ya.

⁸Hakhe Pol yókna bagwi hai hwnwi sa kha, “Ang keboni bagwi mungsa phano samung hamya khlai ya, Judairokni Kerongni bagwi buya, noktharni bagwi buya, Rum bugra kotorni bagwi buya.”

⁹Phesto Judairok bai kaham hwnjakna nai-o, aboni bagwino Polno bo hai hwnwi sẃng kha, “Nwng Jerusalemo thángwi aro ani bwskango o majra berjakmarokno tẃi buj thumjakna da muchung?”

¹⁰Pol hai hwnwi sa kha, “Buj thumjakna bagwi ang bugra kotorni bwskango bachajak, bugra kotorni aro ang buj thumjak thung. Ang Judairokni mungsa hamya khlai ya, abo nwng kaham kheno saui mano.

¹¹Ang kerong swbaima tong khe, phiya butharjakna nangnai abo tẃi mungsa swk khlaima tong khe, hakhe ang oroni yókna bagwi sa glak kha mun. Phiya ba bórok ano majra bermarok abo sói ya hwn khe bórokni yago ano kebo yapharwi man ya. Ang bugra kotorni thani apil khlai-o.”

¹²Hakhe Phesto bini logisongrok bai sa laiwi hai hwnwi sa kha, “Bugra kotorni thani nwng apil khlai kha ba bugra kotorni aro nwng ma tháng anw.”

¹³Ulo habugra Agripa bai Berniki Phestono nai laina hwnwi Kaisaria-o sók phai kha.

¹⁴Bórok aro nokha salnwi saltham tongma ulo Phesto Polni kókno tisaui bugrani thani hai hwnwi sa kha, “Philiks bai alongo chobwi klangjaknai borok khoroksa oro tongo;

¹⁵ang Jerusalemo tháng phuru Judai ochai okrarok bai okra chakrarok bono majra ber lai kha, hakhe bono majra gwnang hwn di hwnwi ano hwn lai kha.

¹⁶Khoroksa swk majra berjak khe bo majra bernairokni bwskango yókna bagwi kók sa ya sini Rumsong a borokno yapharwi man ya hwnwi ang bórokno sa kha.

¹⁷Bórok oro sók phai kheno ang ler li ya, hakhe teini salono ang buj thumma achukthai-o achugwi a borokno tubu di hwnwi dagi kha.

¹⁸Bono majra bernairok bacha kha, tamo khe mungsa swk majra hamya bono ber anw hwnwi ang uansugui tongma hai bórok bono abo tẃi majra ber ya.

¹⁹Bo bai bórok kók báng laimani abo bórokni tongtharni kók bai Jisu hwnwi borok khoroksano tẃiwi simi se, a Jisu thwi kha, phiya ba Pol khe hwno bo thang phi kha.

²⁰Bahai khe ang omoni bisingni kókrokno saui mannai abo ang saui man li ya, aboni bagwino Jerusalemo thángwi da o majra berjakmarokno tẃi buj thumjakna muchung hwnwi ang Polno sẃng kha.

²¹Phiya ba Pol apil khlai kha. ‘Ano mwrwgwi tonwi bugra kotor bai buj thum rw di,’ hwnwi bo sa kha. Abo bai’-no ang bono habugra kotorni aro rohorwi man ya sak bono mwrwgwi ton di hwnwi dagi kha.”

²²Agripa Phestono hai hwnwi sa kha, “Ang sakphang o borokni búkhúkni kók khnana nai-o.” “Khwna’-no khna anw,” hwnwi Phesto sa kha.

²³Teini salo Agripa bai Berniki lorong-torong khe phai kha, hakhe sengkrak bokhorokrok tei taunni bokhorokrok bai kuthumma nok kotoro hap kha. Phesto dagi khe Pol bisingo tubujak kha.

²⁴Phesto hai hwnwi sa kha, “O habugra Agripa tei oroni aswk bororok: Nai bai di o borokno, o borokni bagwino oroni bai Jerusalemni bebak Judairok ani thani kók hamya sa phaimani. Bo tei kwthang tongwi cha ya hwnwi bórok Chirikhók lai kha.

²⁵Phiya ba bo butharjakna nangnai abo tẃi samung mungsabo ang bono tangma nuk ya. Hakhe bo sakphang’-no bugra kotorni thani apil khlai kha ba ang bono rohorna khá chong kha.

²⁶Phiya ba bini kókno bugra kotorni thani swijaknai ani tháisabo kwrwi. Aboni bagwino bono sẃng phenek baiwi ang tháisa swk swinani kók manna tẃi khe bono oro norokni bwskango tubu kha. O habugra Agripa, nini bwskangobo tubu kha.

²⁷Tamni hwn khe bubo tẃi majra tong abono phunuk yaui khoroksa khajakno rohor khe abo ani cha ya sijaknai.”