Read Kok Borok SAMUNG 27 Bible Online

SAMUNG 27 - Kok Borok bible

SAMUNG 27

¹Chwng rungtor bai Itali bwkhak ma thángnai hwnwi bórok khá chong khe Pol bai tei khoroknwi khoroktham khajakrokno bórok Juli hwnwi Rumni sengkrak okra khoroksani yago yaphar lai kha; Rum sengkrakrokni bisingo “Bugra Kotorni Sengkrak Gut” hwnmani a gutni okrarokni bere bo’-bo khoroksa.

²Chwng Adramutaini phainai rungtor khungsa-o kasaui lam rw kha, abo Asia angkorni rungtor bathamrogo thángna naiwi tongma jora. Aristark hwnwi Thesalonikini khoroksa Makidoniasa chini logi tongo.

³Teini salo chwng Sidono sók phai kha. Juli Polno maya nangjak kha, hakhe bini nangma manwi manna tẃi khe bono bini bororok bai malai rw kha.

⁴Chwng aroni tháng kha, hakhe bwskang phaising nokbar pail cha yani bai chwng twi kwcharni ha Saiprasno koton kotonwi tháng kha.

⁵Chwng Kilikia tei Pamphulia ganani twijlang tẃi laiwi Lukia angkorni Mura tauno sók phai kha.

⁶Aro sengkrak okra Aleksandriani rungtor khungsa nuk kha, abo Itali bwkhak thángnai, hakhe bo chwngno bisingo da kha.

⁷Chwng twrwk twrwk khe phai laimani nokha salnwi saltham wng kha, hakhe ulo belai tektoni bising tẃi Kinid taunni bwskango sók phai kha. Nokbarni bai chwng kisa phano ayang phaising thángwi man li ya, hakhe chwng Salmoni hachuk gana tẃi twi kwcharni ha Kritno koton kotonwi tháng kha.

⁸Chwng hakung gana gana wngwi máng tong kha, hakhe belai tektoni bising tẃi “Batham Kaham” hwnwi kwrẃngsa-o sók phai kha, abo Lisia taun bai kwbáng chal tha ya.

⁹Omo hai khe kwbángma duama bagwi rungtor tẃi thángmani dob wng kha, tamni hwn khe aphuru Sumsok Nakarma Salbo lái kha. Aboni bagwino Pol bórokno hai hwnwi phrwng kha,

¹⁰“Takhukrok, ang nugo oroni thángnani dob wngnai; manwirok bai rungtor simi belai khe dera glak, borok suda thwi bai anw.”

¹¹Phiya ba sengkrak okra kapten bai rungtorni bubagra samano simi se khna si-o, Pol samano khe khna li ya.

¹²Masing phuruni bagwi o batham chúk ya, aboni bagwi’-no o bororokni bere kwbángma’-no aroni thángwi man khe ba Phoinikia-o sógwina naiwi tong lai kha. Omo Kritni rungtor batham, salgrabai salthángbai phaising naisikjak, hakhe aro bórok masingo tongwi mannai.

¹³Aphuru salgrabai bwkhakni nokbar twrwk twrwk sipma bagwi bórokni muchungma hai’-no samung khlaiwi man anw hwnwi bororok khá ka kha, hakhe bórok jingjol so laiwi Krit hakungni belai gana gana tháng kha.

¹⁴Yang le srapsa tong kheno “Sal-si-kabai” hwnjaknai nokbar kotor a twi kwcharni ha phaisingni sipcha kha.

¹⁵Abo rungtoro bujak phai kha, nokbar kotoro rungtor klaiwi chwng abono narwgwi man li ya, hakhe yakarwi nokbar bai kochok rwui rohor kha.

¹⁶Koda hwnwi twi kwcharni ha kotoino koton kotonwi tháng phuru kisa tektoni bising tẃi chwng rungtorni rungno narwgwi man kha.

¹⁷Bórok abono tisa kha, hakhe rungtorno chorsa khe dwkhwi twngnwi twngtham bai kha kha. Libya bwkhak twi bisingni hasinglwngo da sógwi langno hwnwi bórok kirijak kha; aboni bagwino bórok ríbileno tikhlai kha, hakhe rungtorno nokbar bai kochok rwui rohor kha.

¹⁸Belai nokbar kotor wngwi tongma bai teini salo bórok rungtorni manwirok twi-o khiklai rw lai kha.

¹⁹Aboni teini salo bórok yak baithang rungtorni nangmani manwirokno twi-o khiklai lai kha.

²⁰Belai balok kha chwng salbo nuk ya, athukiribo nuk ya, aphuru nokbar kotor sipchaui tong kho. Ulo chwng thang anw hwnwi uansuk man li ya.

²¹Bórok ma chá ya dwk kha, aphuru Pol bórokni bwskango bachaui hai hwnwi sa kha, “Takhukrok, norok ani kók khnaui Kritni lam rw ya wngma te omo tẃi khe rungtor aswk dera glak kha mun.

²²Tamo khe ang tabuk norokno koi ja-o, norok khá tor bai di. Norokni bere khoroksabo thwi glak; rungtor simi se dera anw.

²³Tamni hwn khe ang surimani ani Kaitorni suari khoroksa thángnai horo ani thani bacha phaiwi

²⁴hai hwnwi sa kha, ‘O Pol, ta kiri di. Bugra kotorni bwskango nwng ma se ma bachanai, hakhe Kaitor khairogwi nini logisongrok bebak’-no nini bagwi mwthangnai.’

²⁵Hakhe takhukrok, norok khá tor bai di. Ang Kaitorno poito khlai-o, katswi bo ano sama hai’-no abo nang phainai.

²⁶Tamo khe twi kwcharni ha kwrẃngsa swgo chwng kochok rwui tlangjaknai.”

²⁷Nokha hor chibrwi wng kha, yang chwng Twijlang Bokhri-o kochok rwjagwi tong kha. Hor diboro hakung manjakna kasu kha hwnwi nabikrok khá ka kha.

²⁸Aboni bagwino bórok manwi hilik khajak dwkhwi twngsa twi-o khiklaiwi saui man kha twi mukcharchi kuthuk; kisa tong phirwi bórok hai’-no ahai khiklai khua, hakhe saui man kha twi mukdokchi thugui tong kho.

²⁹Chini rungtor holongthai-o da súkphaijagwino hwnwi bórok kirijak kha, aboni bagwino bórok rungtor uklogo jingjol kaibrwi khiklai lai kha, hakhe sal mwkhang nukna muchungjagwi tong bai kha.

³⁰Nabikrok rungtorni khárna hwnwi káphra lai kha; bórok rungno twi-o tikhlai rw lai kha, hakhe rungtor bwskango jingjol khiklaima hai khe phunuk sa ti kha.

³¹Phiya ba Pol sengkrak okra bai sengkrakrokno hai hwnwi sa kha, “O nabikrok bisingo tong ya khe norok thangwi man glak.”

³²Hakhe sengkrakrok a rungno khaui tonmani dwkhwi rasu-ui yakarwi rohor kha.

³³Ai twtwi wng kha, aphuru Pol bórokno jotono’-no hai hwnwi chámung chána kobok kha, “Tini bai nokha sal chibrwi wng kha norok hai’-no ma tongmani, aswk sal wng kha norok mungsabo chá ya.

³⁴Hakhe norok mungsa swk phano chá ja di hwnwi ang norokno kobogo; thangna le nang anw bla. Norokni bokhorokni bwkhnai twngsa phano kwma glak.”

³⁵Omo sa baiwi Pol ruti kisa naui bórokni bebakni bwskango Kaitorno hambai rw kha, hakhe abono swkagwi khaksa chá gra kha.

³⁶Bórok bwkha phan manjak bai kha, hakhe jotono kisa chámung chá bai kha.

³⁷Rungtor bisingo chwng bebagwi borok nwira tei snichi-dok tongo.

³⁸Bórok jotono ok pungwi chá khe twi-o gom khiklai laiwi rungtorno heleng rw kha.

³⁹Ai khe nabikrok hakung sini hor li ya, phiya ba bórok twijlang rukung kaisa nuhur kha, hakhe man kheba aro rungtorno sungwi rwina hwnwi khá chong lai kha.

⁴⁰Aboni bagwino bórok jingjolrokni dwkhwi rasu-ui twi-o swklwk kha, aboni logi’-no chokjaknai buphango khajak dwkhwirokno khengwi rw kha. Hakhe rungtorno nokbar dodro hakungo kobon rwna tẃi khe bórok rungtor bwskango ríbile tisaui hakung bwkhak lam rw lai kha.

⁴¹Phiya ba, yang le a rungtor twi bisingni hasing khongo se sungwi rwui kha, hakhe ha-o kwcha kha; rungtorni bwskang bwkhak ha uachrabma bai kutulwi man li ya, yang hwn khe rungtorni uklok bwkhak khencheneui twi aphal bu phaijagwi krap krap khe báiwi tháng bai kha.

⁴²Khajakrok khoroksa phano twi yógwi hakungo kasaui khárwi man ya tẃi khe sengkrakrok bórokno butharna hwnwi kók chap lai kha.

⁴³Phiya ba sengkrak okra Polno mwthangna nai kha, aboni bagwino bo sengkrakrokno abo hai khlaina rw li ya. Bo hai hwnwi se dagi si-o, “Twi yókna kwrwngrok rungni bakhlai graui twi yógwi hakungo kasaui bai di.

⁴⁴Teirok khe buphang bokocho eba rungtor bokocho bai kochogwi hakungo kasaui di.” Hakhe omo hai kheno chwng jotono kaham kwrwng khe hakungo kasaui lai kha.