Read Kok Borok SAMUNG 28 Bible Online

SAMUNG 28 - Kok Borok bible

SAMUNG 28

¹Kaham kwrwng khe hakungo sógwi khe a twi kwcharni hano Malta hwno hwnwi chwng saui manẃi kha.

²Aroni bororok chwngno belai khe khairok kha. Uatwibo uaui rw laha, kwbo kwchang kha, aboni bagwino bórok hór mwchẃngwi chwngno yachak sok kha.

³Pol bol chopsa thumwi horo khiklai tongmani, aphuru tungmani bai chibuk masa bol bisingni ongkhorwi bini yago buljak phai kha.

⁴Aroni bororok yago chibuk lolangsa nugwi bórok kiching bórok hai hwnwi sa lai kha, “Omo borok butharnai se wngna bla! Bo twini yógwi phai phano mwtairok bono kwthang ton glak.”

⁵Phiya ba Pol yak bupraui chibukno hóro khiklaiwi rw kha, bini mungsabo hamya wng li ya.

⁶Polno pra-pra wng anw eba bwdapsa klaiwi thwi anw hwnwi bórok nai laiwi tong kha. Bórok akhini’-no nai lai kha, phiya ba bini mungsabo hamya wng li ya; abono nugwi bo mwtai se hwnwi bórok uansuk phi kha.

⁷A twi kwcharni hani bokhorok Publini khetorok abo bai chal tha ya. Bo chwngno nogo kasa rw kha, hakhe maya nangwi nokha saltham jora chwngno nograi narwk kha.

⁸Aphuru Publini bupha kulum bai khencho romjagwi ríyano klaijak. Pol bini aro tháng kha, hakhe suri sanwi bini saka yak beraui bono ham rw kha.

⁹Omo hai khe ham rwma nugwi a hani bebak hamyarok phaiwi ham rwjak kha.

¹⁰Bórok chwngno belai khe hamjagwi manwi kwbángma rw kha, hakhe chwng aroni thángna phuru chini samung nangmani manwirokno bórok rungtor bisingo ton phai kha.

¹¹Nokha talthamni ulo chwng Aleksandria phaisingni “Mwtai Apher” hwnwi rungtor khungsa-o kasaui tháng lai kha; abo a twi kwcharni ha-ono kwchangma jorano lái rw kha.

¹²Chwng Surakus tauno sók phaiwi aro nokha saltham tong kha.

¹³Aroni chwng reker rekerwi Regi tauno sók phai kha. Teini salo salgrabaini nokbar sipcha kha, hakhe nokha salnwini bisingo chwng Poteoli tauno sók phai kha.

¹⁴Chwng aro poito khlainai khoroknwi khorokthamrokno nuk kha, nokha salsni jora bórok bai tong jaba di hwnwi bórok chwngno hwn kha. Hakhe chwng Rumo sók phai kha.

¹⁵Rumni takhukrok chini kók khna kha, hakhe Api Bajar bai Hotel Kaitham jora chwng bai malaina hwnwi phai kha. Bórokno nuk kheno Pol Kaitorno hambai rwui bwkha phan manjak kha.

¹⁶Chwng Rumo sók phai khe sengkrak khoroksano klangwi Polno saichung ton kha.

¹⁷Nokha salthamni ulo aro tongnai Judai hodarokno Pol ringwi kuthum rw kha. Bórok kuthum khe Pol hai hwnwi sa kha, “Takhukrok, ang chini bororokni mungsabo hamya khlai ya phano eba chini chuchusongni sakni manẃi phaimani a tongmungrokno tháisabo hamya sa ya phano ang Jerusalemo khajak kha, hakhe Rumrokni yago yapharjak kha.

¹⁸Bórok ano kók sẃng phenegwi phiyókna nai kha, tamni hwn khe ang butharjakna nangnai abo tẃi samung bórok ano khlaima nuk ya.

¹⁹Tamo khe Judairok kebengma bagwi ani bororokno majra berna kwrwi phano ang bugra kotorni thani apil ma khlai kha.

²⁰Aboni bagwino ang norok bai malaiwi kók sa laina hwn kha; tamni hwn khe Israilrok khá tungwi tongmani a borokni bagwi se ang o sorni dwkhwi bai khajak.”

²¹Bórok bono hai hwnwi sa kha, “Nini kókno tẃi chwng Judaini Kóktun kangsa phano man ya, aroni phainai takhukrokni bere khoroksani thanibo nini mungwi mungsabo kók man ya, nini bagwi kók hamya mungsabo sama khna ya.

²²Phiya ba nwng uansukmarokno chwng khnana muchungo, tamni hwn khe joto ha-ono nini o gutno hamya samano chwng si-o.”

²³Aphuru bórok Pol bai sal chong lai khe a salo Pol tongmani aro bórok kwbángma phai lai kha. Phungni simi hor jora bo bórokno sukhrubwi saui Kaitorni hani kókno khna rw kha. Bo Musini Kerongni kók bai diyarirok swi langmani kókrokno tisaui Jisuni kókno bórokno bwkha hap rwna nai kha.

²⁴Bo kók samano baksa borok bwkha hapjak kha, tamo khe baksa poito khlai li ya.

²⁵Hakhe Pol hai hwnwi o kók tháisa sa kha, “Jisaia diyarini búkhúk tẃi Phola Kwthar norokni chuchusongno bwswk sói khe hai hwnwi sa kha, “ ‘O bororokni thani thángwi o kók saui di: Norok khunju kaichomwi khna anw, hai phano romwi man glak; norok mokol kaichomwi naisik anw, hai phano nuk glak. Tamni hwn khe o bororok khá si ya, bórok khunjubo muthubo, mokolbo kholobo. Wng ya khe mokol da nuk lang no, khunju da khna lang no, bwkha da si lang no, hakhe bórok ani bwkhak khá kiphil lang no, phiya ang da bórokno ham rw langno, hwnwi Kaitor sa-o.’ ”

²⁸Pol hai hwnwi saui kók mwthak kha, “Norok omono si di, Kaitor mwthangma kók buini bororokni thani rohorjak kha. Bórok o kókno khna anw!”

²⁹[Pol omono sa bai khe Judairok bórok kiching bórok kók báng laiwi kutulwi tháng lai kha.]

³⁰Pol keria namani nogo nokha bisiknwi jora tong kha, hakhe bini aro phainai bebak’-no yachak sok kha.

³¹Bo kirima kwrwi khe kebo bai kebengjak yaui Kaitorni hani kókbo pír lang kha, Subrai Jisuni kókbo phrwng lang kha.