Read Kok Borok SAMUNG 3 Bible Online

SAMUNG 3 - Kok Borok bible

SAMUNG 3

¹Salsa sarikni diborni suri sanma jora Pitor bai Johon noktharo tháng kha.

²Aro “Naithok” hwnmani a duglamo achai phuruni simi’-no khora khoroksa tongo. Noktharo hapnairokni thani bírna bagwi bo sal brúm brúm a duglamo balwi rw phaijago.

³Pitor bai Johonno hapna naima nuk kheno bo bórokno “Puisa lepsa swk rw ja di,” hwnwi san kha.

⁴Pitor bai Johon bono naisik lai kha, hakhe Pitor hai hwnwi sa kha, “Chwngno naisik di!”

⁵Hakhe bo lepsa swk manjak tẃi wngwi bórokno naisik kha.

⁶Pitor bono hai hwnwi sa kha, “Ani rang thopsa phano kwrwi, tamo khe ani yago tongmani abono nono rw anw. Nasaretni Jisu Khristoni mungwi ang nono him di hwno!”

⁷Hakhe Pitor bini yagra yak romwi bacha rw kha. Logi logi’-no a borokni yakung bai yastwng ragwi phai kha.

⁸Bo phwngsa khe bacha kha, hakhe ayang uyang himwi tong kha. Bo him twtwi bársa twtwi Kaitorno lob twtwi bórok bai baksa noktharo hap kha.

⁹Lukurok bono himmani tei Kaitorno lobmani nuk kha;

¹⁰hakhe omo noktharni “Naithok” duglamo achuknai a bírnaisa se hwnwi saui man kheno bo hammano nugwi bórok uanama cháui mang borjak kha.

¹¹A borokno Pitor bai Johonno romwi tongmani nugwi lukurok uanajak bai kha, hakhe nuka-o bórokni thani khachik lai kha, a nukano “Solomonni Nuka” hwno.

¹²Pitor lukurokno nugwi hai hwnwi sa kha, “O Israilrok, omono tamo wngwi norok uanajak, chwngno tamo wngwi norok lok lok khe naisik? Chwng phan gwnang wngma bai eba khe borok kaham wngma bai o borokno him rw kha abo da norok khá ka?

¹³Abraham, Isak tei Jakobni Kaitor, chini chuchusongni Kaitor bo bini Seleng Jisuno chẃngsacha khlai kha. Norok bono bokhorokrokni yago yaphar kha, phiya Pilat bono phiyókna hwnwi khá chongmano suda norok Pilatni bwskango abono nai li ya.

¹⁴Bo wng kha borok kaham, borok kwthar, hai phano norok bono nai yaui a borok butharnaino se phiyók di hwnwi Pilatno sa si-o.

¹⁵Omo hai kheno norok bororokno mwthangnaino buthar lai kha. Tamo khe Kaitor bono kwthwini mwthangwi tisa kha; chwng omono sak baithang nuk kha.

¹⁶O khorano ham rwmani abo bini mung bai se. Norok simani nukmani abo bini mungno poito khlaima bai se wngo. O borokno omo hai khe norokni bwskango ham rwmani abo wng kha Jisuno poito khlaima bai se.

¹⁷“Tabuk takhukrok, ang saui man kha, norok bai norokni bokhorokrok Jisuno khlaimani abo norok si yani bagwi se ahai khlai-o.

¹⁸Masia sátokjakna nangnai hwnwi bebak diyarirokni khúk tẃi Kaitor sakhlaimani abo balok kha; hakhe omo tẃi khe se bo omono khlai si-o.

¹⁹Aboni bagwino Kaitor norokni sumsok hu-ui khibina tẃi khe norok sumsok yakarwi bini bwkhak khá kiphil di;

²⁰hakhe norokni bwkha Subraini aroni phan mannai abo tẃi sal phainai, phiya norokni bagwi bo Masia chongmani a Jisuno rohornai.

²¹Kaitor bini diyari kwtharrokni khúk tẃi agi sakhlaima hai’-no bo bebak kwtal wngnani mol phai ya sak chuknoha-o to se tongnai.

²²Musi hai hwnwi sa kha, ‘Norokni Kaitor Subrai ano rohorma hai’-no norokno diyari khoroksa rohor anw, bo norokni borokni bisingo wngnai. Bo samani joto kókno norok ma khnathai klai-o.

²³A diyari samano khna ya wngnai borok bo Kaitorni bororok bai swkakjagwi sokomorjaknai.’

²⁴Samuel bai bini ulo Kaitorni kók sa phainai aswk diyarirokbo tabukni o salni kókno’-no sa lango.

²⁵Bini diyarirokni khúk tẃi Kaitor kók rwmarok abo norokni bagwi se, phiya norokni chuchusongni thani Kaitor swmai tangmani aro norokbo khopjak. Omo bo Abrahamno hai hwnwi sama hai, ‘Nini bosong tẃi ang swngcharni bebak bororokno hamari rw anw.’

²⁶Aboni bagwino norok jotono’-no lama hamyani kiphil rwui hamari rwna bagwi Kaitor bini selengno chongwi norokni thani rohor gra kha.”