Read Kok Borok SAMUNG 4 Bible Online

SAMUNG 4 - Kok Borok bible

SAMUNG 4

¹Pitor bai Johon lukuni thani kók saui tong phuru ochairok, nokthar sebukrokni okra tei Sadukairok bórokni thani phaiwi sók phai kha.

²Bórok jolijak kha, tamni hwn khe a chonghor khoroknwirok Jisu thangwi bacha kha hwnwi lukuno phrwngwi tong lai-o; ahai hwn khe abo ba kwthwirok thangwi bachanani kók se bla.

³Hakhe bórok a khoroknwino rom laiwi teini sal jora alongo chobwi ton kha, aphuru sanjabo wng kha ba.

⁴Tamo khe a kók pírmano o khnanairokni bere baksa baksa poito khlai kha, hakhe chwlarok khorok ba sai swk wng khna.

⁵Teini salo Judai bokhorokrok, okra chakrarok tei Kerong phrwngnairok Jerusalemo kuthum lai kha.

⁶Aro ochai bokhorok Hanna bai Kaiapha, Johon tei Aleksandar bai ochai bokhorokni nokni bebak bororokbo tongo.

⁷Bórok chonghorrokno bwskango bacha rwui hai hwnwi sẃng kha, “Norok bahai khe o samung khlai? Norok bubo tẃi phan manẃi omono khlai? Saboni mung bai norok khlai?”

⁸Phola Kwthar bai koboljagwi Pitor bórokno hai hwnwi sa kha, “Lukuni bokhorokrok bai okra chakrarok,

⁹a khorano ham rwmani bagwi bo bahai khe ham kha hwnwi chwng tini sẃngjagwi’-no tong khe

¹⁰norok bai Israilrok bebak’-no o kókno saui man thung; norok kruso kanta bumani tei Kaitor kwthwini mwthangwi tisamani a Nasaretni Jisu Khristoni mung bai se o borok norokni bwskango hamsugui bachajak.

¹¹Jisu wng kha Elembago hai hwnwi samani abo se, “ ‘Nok tangnairok samung nang ya hwnwi khibi rwmani holongthai bono wng phai kha nok busuni holongthai.’

¹²“Bini bising tẃi simi se bororok mwthangjaknai, tamni hwn khe chwng mwthangjakna tẃi khe Kaitor o swngcharo bororokni thani bini mung simi se rw si-o.”

¹³Pitor bai Johon kirima kwrwi khe kók samano Kaunsil nuk kha, bórok basra si ya máng se hwnwi’-bo saui man kha, hakhe uanajak bai kha. Bórok Jisu bai máng tongnai borok hwnwi Kaunsil aphuru saui man kha.

¹⁴O ham rwjaknai borokno Pitor bai Johonni aro bachajak nukma bai bórok kók tháisa phano saui man li ya.

¹⁵Hakhe “Norok Kaunsilni ongkhorwi tháng di,” hwnwi saui bórok kiching bórok hai hwnwi kók sa lai kha,

¹⁶“O bororokno tẃi chwng tamo khlainai? Bórok ha-o nuk ya o samung kotor khlaimano Jerusalemo tongnai joto borok saui man kha, chwng abono in’-hi hwnwi man li ya.

¹⁷Hakhe lukurokni bisingo o kók rwcharwi man ya tẃi khe Jisuni mungwi khoroksano phano kók ta sa di hwnwi o bororokno ragdama khlaiwi ma rwnai.”

¹⁸Bórok Pitor bai Johonno bisingo tubu-ui hai hwnwi saui rw kha, “Norok Jisuni mungwi kók tháisa phano ta sa si di, bini mungwi khoroksano phano ta phrwng si di.”

¹⁹Phiya ba Pitor bai Johon borokno hai hwnwi sa kha, “Norokni kók khnama da cha kuk Kaitorni kók? Kaitorni bwskango bubo cha kuk abo norok’-no uansugui nai bai di.

²⁰Chwng le sak baithang nukmano khnamano sa yaui tongwi man ya.”

²¹Kaunsil bórokno sikiri-sokoro khlaiwi phiyógwi rohor kha; bórokno sátokna lama manjak li ya, tamni hwn khe a wngmano nugwi lukurok Kaitorno lobwi tong lai kha.

²²O ha-o nuk ya samungni bising tẃi ham rwjaknai a borokni umor nokha bisi brwichi lái kha.

²³Phiyókjagwi rohorjak kheno Pitor bai Johon bórokni sakni borokni thani kiphilwi phai kha, hakhe ochai okrarok bai okra chakrarok samano bórokno khna rw phai kha.

²⁴Bórok omono khnaui thansa khe Kaitorni thani hai hwnwi suri san kha, “Ha bai nokha bai twi bai tei aro tongnai bebak’-no Snamnai, O Subrai!

²⁵Nwng Phola Kwtharni bising tẃi nini seleng chini chuchu Daudni khúk tẃi hai hwnwi sa kha, “ ‘Buini bororok tamo swk belai jolijak gwja? Bororok tamo wngwi wngyani-sókyani kók chap lai?

²⁶Swngcharni bugrarok bacha bai kha ojarokbo kuthum lai kha Subrai tei bini Masia bai nang laina hwnwi.’

²⁷“Tamni hwn ba nwng Masia snammani nini Seleng kwthar Jisuni hamyani bagwi Herod tei Ponti Pilat bórok buini bororok bai tei Israilrok bai o tauno kuthum lai kha.

²⁸Nwng nini phan bai nini muchungma bai swkang baira aswk khá chabwi tonmarokno khlaina tẃi khe bórok kuthum lai kha.

²⁹Hakhe tabuk, O Subrai, bórok sikiri-sokoro khlaimano nahar di, hakhe chwng nini selengrokno khá torwi nini kók sa rw di.

³⁰Ham rwna bagwi nini yak pholok di, hakhe nini Seleng kwthar Jisuni mungwi uanamasingcha samung bai ha-o nuk ya samung khlaijak thung.”

³¹Suri sanwi pái kheno bórok kuthum laimani aro ha kwlwisa kha. Bórok bebak’-no Phola Kwthar bai koboljak bai kha, hakhe khá torwi Kaitorni kókno sa cha kha.

³²Poito khlainairok wng kha khá bai khúk bai thansa. Khoroksa phano bini tongmano omorok ani máng se hwnwi sa ya, phiya ba janija tongma jora tẃi abono bebakni hwnwi bwkha romwi tong lai-o.

³³Subrai Jisu thangwi bachajak hwnwi chonghorrok belai khá nang rwui pírwi tong lai kha, hakhe Kaitor bórok bebak’-no belai khe kaham khlai kha.

³⁴Bórokni bere khoroksa phano biyalo klaijak kwrwi. Kheto gwnangrok eba nok gwnangrok bórok abórokno phal baiwi a rangno tubu-ui

³⁵chonghorrokni yago rw phai-o; hakhe janija nangma jora tẃi a rangno banta khe rw lai-o.

³⁶Josep omo hai khlai kha. Bo wng kha Lebi bosongni, Saipraso achai-o; chonghorrok bono Barnaba hwnwi phar kha (abono “Khá rak rwnai” hwno).

³⁷Bo bini kheto tongmano phal baiwi a rangno tubu-ui chonghorrokni yago rw phai kha.