Read Kok Borok SAMUNG 5 Bible Online

SAMUNG 5 - Kok Borok bible

SAMUNG 5

¹Phiya ba Anania hwnwi borok khoroksa tongo, bini bihik wng kha Sapira. Bo bórokni sompoti kisa tongmani phal bai kha,

²hakhe aroni rang baksa narwgwi tei bárano chonghorrokni yago rw phai kha. A rang narwkmano bihik saui manjak se.

³Pitor bono hai hwnwi sa kha, “O Anania, tamo wngwi nwng Soitanno nini bwkha-o hap rwui kheto phalma rangni baksa narwgwi Phola Kwtharno kók tatal sa phai kha de?

⁴Phal ya sini abo nini ya diba? Phiya phalwi páibo a rang nini ya diba? Hakhe tamo wngwi nwng omo hai samung khlaina khá chong lang de? Nwng borokno kók tatal sama klai ya; Kaitorno se sama klai-o!”

⁵O kókno khnama logi logi’-no Anania bwdapsa khe klaiwi thwi kha; hakhe abono khnanairok jotono belai kirima hapjak kha.

⁶Siklarok phaiwi bini mangno rí dul kha, hakhe tlangwi phobwi kha.

⁷Dam tham swkni ulo bini bihik aro phai kha; bo bwsai thwi kha hwnwi saui man ya.

⁸Pitor bono hai hwnwi sẃng kha, “Ano sa la, norokni kheto aswk khe da phal?” “I’n, aswk kheno phalo,” hwnwi bo sa kha.

⁹Hakhe Pitor bono hai hwnwi sa kha, “Tamo wngwi norok hwisaknwi’-no Subraini Pholano bandinani kók chap lai kha de? Nahar di, nwsaino phobnairok duglamo bachajak. Bórok nonobo tlangnai.”

¹⁰Logi logi’-no bo Pitorni yakungo bwdapsa khe klaiwi thwi kha. Siklarok phaiwi nuk phai ba bo kwthwi se, hakhe bórok bono tlangwi bwsaini gana-o phobwi kha.

¹¹Hakhe mothani bebak bororok bai o kókno khnanai bebak bororok belai kirima hapjak kha.

¹²Chonghorrokni yak tẃi lukurokni bisingo ha-o nuk ya samung bai uanamasingcha samung kwbángma khlaijak kha. Poito khlainairok bebak’-no Solomonni Nuka-o kuthum kuthum lai-o.

¹³Lukurok bórokno kaham hwn phano phatarni borok khoroksa phano bórokni bisingo hap rak li ya.

¹⁴Tamo khe Subraino poito khlainai bwrwi chwla kwbángma bórokni bisingo sitokjak rwrwgo.

¹⁵Chonghorrok samung khlaimano nugwi bororok hamyarokno lama-o balwi tubu-ui ríyanrogo tei uáyingrogo ton lai kha. Pitor himma jora bini sampili simi phano baksa baksani aro klaina tẃi khe bórok omo hai khlai kha.

¹⁶Jerusalem gana-gini taunni aswk bororok hamyarokno tei mwtai hamya kolobjakrokno tubu-ui phai bai kha, hakhe a hamyarok bebak’-no ham rwjak kha.

¹⁷Aphuru ochai bokhorok bai Sadukai gutni bini logisongrok chonghorrokno belai músúma bai mungsa khlaina hwnwi khá chong kha.

¹⁸Bórok chonghorrokno romwi alongo chop kha.

¹⁹Tamo khe a horo Subraini suari khoroksa alongni duglam phiyok phai kha, hakhe chonghorrokno phataro tlangwi hai hwnwi sa kha,

²⁰“Tháng di, noktharo bachaui o lama kwtalni bebak kókno lukuno saui di.”

²¹Chonghorrok o kókno khna kha, hakhe aisirisiri noktharo habwi phrwng kha. Kaunsil kuthum laina bagwi ochai bokhorok bai bini logisongrok bebak Judai okra-chakrarokno ring kha, hakhe a bororokno oro tubu di hwnwi bórok alongo borok rohor kha.

²²Sebukrok phaiwi chonghorrokno alongo nuk phai li ya, hakhe bórok Kaunsilo kiphilwi hai hwnwi saui khna rw kha,

²³“Chwng alongo phaiwi nuk phai kha abo jai khe berepjak, duglam brúm brúm mwrwknairok bachajak, phiya duglam phiyogwi chwng bisingo khoroksano phano nuk li ya!”

²⁴Noktharni sebuk okra bai ochai okrarok abono khnaui “A bororok tamo wng kha sla?” hwnwi uanajak lai kha.

²⁵Aphuru borok khoroksa phaiwi hai hwnwi sa phai kha, “Khna di, norok alongo chopmani a bororok noktharo bachaui lukuno phrwngwi tongwi kha!”

²⁶Hakhe a sebuk okra bini sebukrok bai aro thángwi chonghorrokno tubu-ui phai kha. Hai phano bórokno sopre-sapra khlai li ya, tamni hwn khe luku holong khitarna phano tongo hwnwi bórok kirijak kha.

²⁷Bórok chonghorrokno tubu-ui phaiwi Kaunsil bwskango bacha rw phai kha; hakhe ochai bokhorok bórokno hai hwnwi sẃng kha,

²⁸“O borokni mungwi ta phrwng si di hwnwi chwng norokno panjalwi’-no ragdama khlai kha, yang le norok tamo khlai kha nai di! Norok phrwngmano Jerusalem gwnangwi pír kha, phiya o borok butharjakmano norok chini sago berna nai-o!”

²⁹Pitor bai tei chonghorrok hai hwnwi sa kha, “Chwng Kaitorni kók se ma khnanai, borokni kók ya.

³⁰Norok kruso kanta bu-ui butharmani a Jisuno chini chuchusongni Kaitor mwthangwi tisa kha.

³¹Israilrok sumsok yakarwi nakarjakna lama manna tẃi khe Kaitor bono Bokhorok bai Mwthangnaisa snamwi bini yagra bwkhak tisa kha.

³²Chwng omorokni sakki; chwngbo sakki, phiya Kaitor bini kók khnanairokno rwmani a Phola Kwtharbo omorokni sakki.”

³³O kókno khnaui Kaunsil jolijagwi hoku cha súk kha, hakhe chonghorrokno butharna bagwi khá chong kha.

³⁴Aphuru Gamaliel hwnwi Kaunsil chalai khoroksa bacha kha, bo wng kha Kerong phrwngnai Pharisai, bo luku bai jai kheno bórijago. Bo chonghorrokno phataro tlang di hwnwi dagi kha,

³⁵hakhe Kaunsilno hai hwnwi sa kha, “O Israilrok, norok o borokno tamo khlaina nai abo kaham khe uansugui nai di.

³⁶Omoni slái swkang Thuda sók phai kha. ‘Ang borok kotor,’ hwnwi bo hwn phai kha, hakhe borok khorok brwira ká twtwi bo bai hap phai kha. Bo butharjak kha, bini logisongrok piring-poroi wng kha, hakhe bini samung cha li ya.

³⁷Aboni ulo borok lekhama molo Galilini Juda sók phai kha, bo’-bo bini thani borok kwbángma so kha; phiya bo’-bo butharjak kha, bini logisongrokbo piring-poroi wng kha.

³⁸Hakhe tabukbo ang norokno o kók sa-o, o bororokno yak ta tisa di, ahai’-no ton di, tamni hwn khe tumungno bórokni uansukma bai samung borokni’-no hwn khe abo kwmaui thángnai;

³⁹phiya abo Kaitorni hwn khe norok bórokno mechenwi se man glak. Norok Kaitor bai phano nang laina tongo.” Kaunsil Gamaliel hwnmano khna kha.

⁴⁰Bórok chonghorrokno tubu-ui swprak rw kha, “Jisuni mungwi tei kók tháisa phano ta sa si di,” hwnwi bórokno ragdama khlaiwi rw kha, hakhe phiyógwi rohor kha.

⁴¹Jisuni mungwi lachi rwjakna hwnwi Kaitor bórokno chúgo hwnwi chongma bai chonghorrok tongthokjagwi Kaunsilni kutul lang kha.

⁴²Hakhe noktharobo nokrogobo bórok sal brúm brúm phrwngwi Jisuno a Masia hwnwi pírwi tong lai kha.