Read Kok Borok SAMUNG 7 Bible Online

SAMUNG 7 - Kok Borok bible

SAMUNG 7

¹Ochai bokhorok Stipanno hai hwnwi sẃng kha, “Omo sói da?”

²Stipan hai hwnwi sa kha, O Takhukrok bai okra chakrarok, ani kók khna bai di! Chini chuchu Abraham Harano tongma swkang Mesopotamia-o tong phuru chẃngsajak Kaitor bini thani nukjak phaiwi

³hai hwnwi sa kha, “Ang nono ha kwrẃngsa phunuk anw, nwng sandai-masakrok bai o hano khibiui aro tháng di.”

⁴Aboni bagwino bo Kolodiarokni ha khibiui klangwi Harano thángwi tongwi kha. Abrahamni bupha thwimani ulo norok tabuk tongma o ha-o Kaitor bono tubu kha.

⁵Kaitor aphuru Abrahamno oro ha kisa phano bini yago klang li ya, chikhaksa suda klang li ya; tamo khe Kaitor o hano bono rwna hwnwi kók rw kha, hakhe omono bini yago klangnai, phiya bini ulo bwsarokni yago klangnai hwnwi Kaitor kók rw kha. Kaitor omo hai khe kók rw phuru Abrahamni bwsa-bẃtẃi kwrwi kho.

⁶Omono Kaitor bono hai hwnwi samani, “Nini bosongrok buini ha-o tongwinai, aro seleng khatiuinai, hakhe nokha bisi brwira hamya khe tonjaknai.”

⁷Tamo khe Kaitor hai hwnwi’-bo sa kha, “Bórok seleng khatiuimani a bororokno ang yagul sunai, aboni ulo bórok a hani ongkhorwi phainai, hakhe o ha-o ano surinai.”

⁸Aphuru a swmai tangmani mukumu hwnwi Kaitor Abrahamno sakur ranani kerong rw kha. Hakhe Isak achaimani nokha salsni ulo Abraham bini sakur ra kha; Isak Jakobno, Jakob chuchusong chiknwirokni sakur ra kha.

⁹“Chuchusong Josepno músú-o, hakhe bono seleng khati rwna bagwi Ijibo phalwi rohor kha. Tamo khe Kaitor bo bai tongo,

¹⁰hakhe bebak tektoni bising tẃi bono kaham khe tubu kha. Ijipni bugra Pharaoni bwskango Josep bacha phuru Kaitor bono tongmung kaham bai elem rw kha. Hakhe Pharao Josepno hani gobornorbo snam kha, bugra nokni okrabo snam kha.

¹¹Aphuru Ijip bai Kanan gwnangwi asari nangwi tongo, aboni bagwino bororok belai khe tekto man bai kha. Chini chuchusong mungsabo chámung man li ya.

¹²Ijibo chámung tongo hwnwi khnaui Jakob bwsarokno aro rohor kha. Aphuru chini chuchusong aro puila thángmani.

¹³Ulo bórok aro uáinwi thángma jora Josep bini takhukrok bai sini lai kha, hakhe Pharao Josepni sandai-masakni kók saui man kha.

¹⁴Hakhe Josep bupha Jakobno sandai-masakrok bai Ijibo phai di hwnwi kók kwchárwi rohor kha; bórok bebagwi khorok snichiba tongo.

¹⁵Aphuru Jakob Ijibo tháng kha, aro’-no bobo thwi-o, chini chuchusongbo thwi-o.

¹⁶Bórokni mangrok Sekemo tubujak kha, hakhe aro Abraham rukphaini rang bai paimani Hamor bosongni a mangkhoro abórok phobjak kha.

¹⁷“Abrahamni thani Kaitor kók rwmani abo nangnani jora sampha rwrwk Ijibo chini borok belai kwbángma khe báng rwrwk.

¹⁸Ulo Ijibo tei khoroksa bugra chá rwjak kha, bo Josepno sini ya.

¹⁹Chini borokno bo bandi kha, hakhe chini chuchusongno thamchi kasajagwi bórokni chwrairok thwi thung hwnwi phataro tikhlai ma rwima tẃi khe bórokno dagi kha.

²⁰Aphuru’-no Musi achai-o, bo belai chwrai naithok. Nokha taltham jora bo nogo’-no pusijak kha,

²¹bono phataro tikhlai rw phuru Pharaoni bwsajwk bono bwsa khlaiwi sói sói bwsa hai khe tor rw kha.

²²Ijipsarokni bebak elem bo phrwngjak kha, hakhe kók bai samung bai borok kotor wngwi phai kha.

²³“Musi nokha bisi brwichini borok wng phuru bini borok Israilrokno naina hwnwi khá chong kha.

²⁴Israilsa khoroksa Ijipsa khoroksa bai hamya khlaijakmano nugwi bo daina tháng kha, hakhe Ijipsano butharwi yagul su kha.

²⁵(Kaitor bini yak tẃi bini bororokno phiyókna naimano bórok saui man anw hwnwi bo khá kamani; yang bórok le si se si ya.)

²⁶Teini salo bo Israil khoroknwino bu laiwi tongma nuk kha, hakhe bo methepna nai kha. Bo hai hwnwi sa kha, “Takhukrok, khna di, norok takhuk klai lai-o, norok tamo wngwi khoroksa tei khoroksano hamya khlai lai?”

²⁷Yang le hamya khlainai a borok Musino dagarwi hai hwnwi sẃng kha, “Nono sabo chini bokhorok snam kha de? Nono sabo chini buj thumnai snam kha de?”

²⁸“Nwng miya a Ijipsano butharma hai da ano butharna nai?”

²⁹Abono khnaui Musi Ijipni khár kha, hakhe Midian ha-o tongwi kha. Aro bo bwsa chwlaknwi man kha.

³⁰“Nokha bisi brwichini ulo Sinai Hathái gana hasing panthoro suari khoroksa satasuta khamwi tong phuru hórjlai tẃi Musi bai nukjak kha.

³¹Abono nugwi Musi uanajak kha, hakhe kaham khe naina bagwi a satasuta gana tháng kha. Aphuru bo Subrai hai hwnwi kók samano khna kha,

³²‘Ang nini chuchusongni Kaitor, Abraham, Isak tei Jakobni Kaitor.’ Musi kirima chaui kwlwibra kha, hakhe naisik rak li ya.

³³Subrai bono hai hwnwi sa kha, ‘Nini yaklap sokok di, nwng bachaui tongmani abo ha kwthar se.

³⁴Ijibo ani bororok panjalwi sátokjakmano ang sói’-no nuk kha. Bórok kengaimano ang khna kha, hakhe ang bórokno phiyókna hwnwi ongkhorwi phai kha. Phai di tabuk, ang nono Ijibo rohornai.’

³⁵“ ‘Nono sabo chini bokhorok snam kha de? Nono sabo chini buj thumnai snam kha de?’ hwnwi sẃngwi Israilrok o Musino nor kha. Tamo khe satasuta khamwi tong phuru bo bai nukjaknai suarini yak tẃi Kaitor o Musino’-no bokhorok tei phiyóknaisa snamwi rohor kha.

³⁶Bo bini bororokno Ijipni tikhlai tubu kha, hakhe bo Ijibo, Twijlang Kwchago tei nokha bisi brwichi jora hasing panthoro ha-o nuk ya samung bai uanamasingcha samung khlai kha.

³⁷O Musi’-no Israilrokno hai hwnwi sanai, ‘Kaitor ano rohorma hai’-no norokno diyari khoroksa rohor anw, bo norokni borokni bisingo wngnai, norok bini kókno khna di.’

³⁸Hasing panthoro a kuthumjak Israilrok bai o Musi’-no tongo; bo aro chini chuchusong bai tongo, phiya Sinai Hathái-o bono kók sanai a suari baibo tongo; chwngno rwnani bagwi bo Kaitorni aroni kók kwthang man kha.

³⁹“Yang le chini chuchusong bini kók khna li ya; bórok bono nor kha, phiya Ijibo kiphilwi thángna muchungjak kha.

⁴⁰Hakhe bórok Aronno hai hwnwi sa kha, ‘Chini bwskang bwskang thángnai abo tẃi mwtairok tak di. Chwngno Ijipni tikhlai tubunai a Musini tamo wng kha abo chwng saui man li ya.’

⁴¹Aphuru’-no bórok dega hai khe mwtai kaisa tak lai kha, hakhe bini thani rathar lai kha, phiya bórok a mwtai takmani bagwi tongthokjagwi bagrum lai kha.

⁴²Yang le Kaitor bórokni bwkhak bumukhang rw li ya, hakhe nokhani athukirirokno surina bagwi bórokno yakarwi rw kha. Omono diyarirokni bijabo hai hwnwi swijak tongmani, “ ‘O Israilrok, hasing panthoro nokha bisi brwichi jora norok pun tok ratharmani abo ani bagwi ya.

⁴³Norok tubumani abo mwtai Molekni ríni nok se, phiya mwtai Rephanni athukiri se; abórok norok surina hwnwi takmani mwtai se. Hakhe ang norokno Babilonni ayang bwkhak norwi rohornai.’

⁴⁴“Kaitor tongmani a rínitamu hasing panthoro chini chuchusongni thani tongo. Kaitor Musino dók phunugui abo hai khe tang di hwnmani hai’-no abo tangjak kha.

⁴⁵Ulni pirirok a rínitamuno buphasongni yakni man kha, hakhe Kaitor bórokni bwskango rwkhlai rohormani a dopharokni hano Josua bai segwi na phuru bórok abono aro tlang kha. Hakhe Daudni mol wng ya sak abo aro tong kha.

⁴⁶Kaitor Daudno hamjak kha, hakhe Jakobni Kaitorni bagwi nok tangna hwnwi bo Kaitorno san kha.

⁴⁷Yang le Solomon se bini bagwi nok tang si-o.

⁴⁸“Tamo khe Kaitor Kotor borok tangmani nogo tong ya; a diyari hai hwnwi sama hai,

⁴⁹“ ‘Subrai hai hwnwi sa-o, Chuknoha ani achukthayung, haktor wng kha ani yakung boksajaknai. Hakhe bubo tẃi nok norok ani bagwi tangnai? Ani lenglathai buro?

⁵⁰Ang yak baithang omorok bebak’-no snam ya diba?’

⁵¹“Norok tamo swk kók khna ya gwja! Norokni bwkha tamo swk khá si ya gwja! Khunjubo muthupjak gwja! Norok katswi norokni chuchusong hai’-no; norokbo Phola Kwtharno kebeng máng tongo!

⁵²Norokni chuchusong bu diyarino sátok ya tong kha ba? Borok Kaham phainai hwnwi agi sanairokno bórok buthar kha. Tabukbo norok bono rom rwui buthar kha.

⁵³Suarirokni yak tẃi Kaitor rwmani Kerongno mannai abo norok se, hai phano se norok bini kók khna ya!”

⁵⁴Stipanni kók khnaui Kaunsil hoku cha súk kha, hakhe jolijagwi ua hul lai kha.

⁵⁵Tamo khe Stipan Phola Kwthar bai koboljagwi nokhasa naisa kha, hakhe bo Kaitorni chẃngsachabo nuk kha, Kaitorni yagra bwkhak Jisunobo bachajak nuk kha.

⁵⁶Bo hai hwnwi sa kha, “Nahar di, nokha phiyokjak! Ang Borokni Sajlano Kaitorni yagra bwkhak bachajak nuhur kha!”

⁵⁷Sotonwi chirikhók laiwi bórok yak bai khunju muthup lai kha. Bórok bebak uáisa bai bini saka klai rw lai kha,

⁵⁸hakhe bono taunni phataro rwkhlai laiwi holong khitar lai kha. Khitarnairok Sol hwnwi chwla sikla khoroksani yago bórokni rí-chumno rw kha.

⁵⁹Bórok Stipanno khitar máng tong kha, yang Stipan “O Subrai Jisu, ani pholano yachak di!” hwnwi Subraino ring kha.

⁶⁰Bo yáskú sungwi sotonwi hai hwnwi chirikhók kha, “O Subrai, bórokni a sumsokno nwng ta rom jaba di!” Bo o kókbo sa kha thwbo thwi kha.