Read Kok Borok SAMUNG 8 Bible Online

SAMUNG 8 - Kok Borok bible

SAMUNG 8

¹Yang bono buthar laimano Sol chajago. A salono Jerusalemni motha panjalwi sátokjago. Chonghorrokno karwi bebak poito khlainairok Judia bai Samaria amchoi gwnangwi piring-poroi wng bai kha.

²Khoroksa khoroknwi Kaitorno surinairok Stipanni bagwi sotonwi kap laiwi bono phob lai kha.

³Yang khe Sol mothano sokomornani káphra kha; bo nok brúm brúm thángwi poito khlainairokno bwrwirok bai chwlarok bai sopreui alongo da bai kha.

⁴Piring-poroi wngnai poito khlainairok ha gwnangwi thángwi Kothoma Kaham pír kha.

⁵Philip Samaria tauno tháng kha, hakhe aroni bororokni thani Masiani kókno pír kha.

⁶Philip samano lukurok kaichomwi khna kha. Bo samanobo bórok bebak’-no khunju kan kha, bo ha-o nuk ya samung khlaimanobo nuk kha.

⁷Aswk bororokni bisingni mwtai hamya sotonwi chirikhógwi ongkhorwi phai kha, aswk yakung yak man ya tei khorarok ham rwjak kha.

⁸Hakhe a tauno belai tongthok lai kha.

⁹A tauno Simon hwnwi borok khoroksa tongo, bo Samariasongno danda phunugui uanama cha rwui tonmani balok kha. “Ang borok kotor se,” hwnwi bo sa-o,

¹⁰hakhe a taunni borok kotor borok kusu khoroksa kwrwi tẃi bo samano kaichomwi khna-o. Bórok hai hwnwi sa-o, “O borok’-no Phankrak hwnjakmani Kaitorni a Phan.”

¹¹Bo aswk sal danda phunugui bórokno uanama chá rwma bai bo samano bórok kaichomwi khna-o.

¹²Phiya Kaitorni ha bai Jisu Khristoni kókno tẃi Philip Kothoma Kaham pírmano khnaui bórok poito khlai kha, hakhe bwrwi bai chwla bai baptisma wng kha.

¹³Simonbo poito khlai kha, bo baptisma wngwi Philip bai máng tong kha, hakhe uanamasingcha samung bai ha-o nuk ya samung kotor khlaijakmano nugwi uanama cha kha.

¹⁴Samariasong Kaitorni kókno yachak sok kha hwnwi Jerusalemo tongnai chonghorrok khna kha; hakhe bórok Pitor bai Johonno bórokni thani rohor kha.

¹⁵Bórok sógwi khe poito khlainairok Phola Kwthar man thung hwnwi bórokni bagwi suri san lai kha.

¹⁶Aphuru phano Phola Kwthar bórokni bere khoroksano phano kobol phai ya kho, bórok Subrai Jisuni mungwi baptisma simi se wng kho.

¹⁷Aphuru Pitor bai Johon bórokni saka yak bera khe bórok Phola Kwthar man kha.

¹⁸Chonghorrok yak berama bai Phola Kwthar rwjak kha abo Simon nuk kha. Hakhe bo Pitor bai Johonno rang hadiui

¹⁹hai hwnwi sa kha, “Ang khoroksa swkni saka yak bera khe bo’-bo Phola Kwthar manna tẃi khe anobo o phan rw di.”

²⁰Tamo khe Pitor bono hai hwnwi sa kha, “Kaitor rwmani abono rang bai paiwi mano hwnwi nwng khá kamani, aboni bagwino nwng bai baksa nini rang gaija thung!

²¹Chini o samungo nini chábak kwrwi, tamni hwn khe Kaitorni bwskango nini bwkha sutrang wng ya.

²²Aboni bagwino nwng o hamya chapmano yakar di, hakhe omo hai uansukmano Subrai nakarna tẃi khe bini thani suri san di.

²³Ang nugo nini bwkha belai músúma gwnang, phiya nwng sumsok bai khajak.”

²⁴Simon hai hwnwi sa kha, “Norok samani abo tẃirok mungsa phano ani thani wng ya tẃi khe norok Subraini thani ani bagwi suri san di.”

²⁵Pitor bai Johon Jisuno tẃi bórok saui manmani a kókbo sa kha, Subraini Kothoma Kahambo sa kha, hakhe Jerusalemo kiphilwi tháng kha. Lama-o Samariani kami kwbángma o bórok Kothoma Kaham pír lang kha.

²⁶Subraini suari khoroksa Philipno hai hwnwi sa kha, “Bacha di, salgrabai bwkhak thángwi Jerusalemni Gaja-o thángmani a lama-o tháng di.” (A lama hasing panthor.)

²⁷Hakhe Philip bachaui tháng kha. Aphuru Ithiopiani gurma khoroksa a lama tẃi thángmani jora. O borok wng kha Ithiopiani Kandakini tangphang kotor, bo rangbokhokni barja tẃi tongo. (Kandaki khe “isiri” hwnma se). Bo Kaitorno surina hwnwi Jerusalemo phaimani, hakhe bini korai malkhung bai kiphilmani. Bo Jisaia diyarini bijap poriui thángo.

²⁹Phola Kwthar Philipno hai hwnwi sa kha, “Tháng di, a malkhung gana gana tongwi di.”

³⁰Philip khachigwi gana tháng kha, hakhe Jisaia diyarini bijapno a borokno porima khna kha. Bo hai hwnwi sẃng kha, “Nwng porimani abo tamo saui da man kha?”

³¹A tangphang hai hwnwi sa kha, “Khoroksa swk omono swbaiwi sa ya khe ang bahai khe saui mannai.” Hakhe bo Philipno “Kasa di, ang bai baksa achuk ja di,” hwnwi hwn kha.

³²Bo porimani abo wng kha Elembakni o kók se, “Bo wng kha ratharna hwnwi tlangjaknai mera hai; buikhumu rajak phuru mera bwsa pung ya hai bo kók tháisa phano sa ya.

³³Bo lachi rwjak kha, bo sói khe buj thumjak li ya. Bini bwsarokni kók khoroksa phano saui mannai kwrwi, tamni hwn khe bo o ha-o kwrwi kha.”

³⁴A tangphang Philipno hai hwnwi sa kha, “Ano sa di, diyari samani omo saboni kók? Sakni kók da, eba khoroksa swkni kók da?”

³⁵Hakhe Philip sacha kha, Elembakni o kókni simi mareui Jisuni Kothoma Kahamno bono sa kha.

³⁶Lama tháng te tháng te bórok twi tong thani-o sók phai kha, hakhe a tangphang hai hwnwi sa kha, “Nahar di, iko oro twi tongo. Ang baptisma wngnani tei tamo kwchaui tong sinai?”

³⁷Philip bono hai hwnwi sa kha, “Tumungno nwng bwkha rwui poito khlai súk khe nwng mano.” Bo hai hwnwi sa kha, “Jisu Khristo Kaitorni Sajla abono ang poito khlai kha.”

³⁸A tangphang malkhung bathak rw di hwn kha; Philip bai tangphang khoroknwi’-no twi-o ongkhor kha, hakhe Philip bono baptisma rw kha.

³⁹Bórok twini kasa lai phuru Subraini Phola Philipno tlangwi tháng kha. A tangphang bono tei nuk li ya, tamo khe jai kheno tongthokjagwi bini lama rom khua.

⁴⁰Philip Asdodo se nukjagwi si-o, hakhe bo Kaisaria-o sógwi ya sak taun brúm brúm Kothoma Kaham pír máng tháng kha.