Read Kok Borok RUM 1 Bible Online

RUM 1 - Kok Borok bible

RUM 1

¹Ang Pol omono swihoro; ang Khristo Jisuni seleng, ang Kaitor bai chonghor chongjagwi bini Kothoma Kaham pírna hwnwi ringjak kha.

²Agi phuru Kaitor bini diyarirokni khúk tẃi o Kothoma Kahamno rwna hwnwi kók rwjak, hakhe omo elembak kwtharo swijak kha.

³Omo bini Sajla chini Subrai Jisu Khristoni kók: bo borok wngwi Daud bosongo achai kha;

⁴Kaitorni aroni phola kwthar wngwi bo kwthwini mwthangwi tisajagwi belai kwplai khe Kaitorni Sajla khlaiwi phunukjak kha.

⁵Khristoni bagwi bebak dophani bororokno poito khlai rwui kók khna rwna hwnwi Kaitor khairogwi Khristoni yak tẃi ano chonghor snam kha.

⁶Jisu Khristoni borok wngna bagwi Kaitor bai ringjaknai norokbo aro khopjago.

⁷Hakhe Kaitor bai hamjagwi bini borok wngna bagwi ringjaknai, norok Rumo tongnai bebakni thani ang swihoro. Chini Apha Kaitor bai Subrai Jisu Khristo norokno khairok thung, norokno khá kwchang rw thung.

⁸Puilano ang norok bebakni bagwi Jisu Khristo tẃi ani Kaitorno hambai rw-o; tamni hwn khe norok poito khlaima kókno swngchar gwnangwi khna bai kha.

⁹Ang sana naimani abo kubui hwnwi Kaitor saui mano bini Sajlani Kothoma Kahamno pírmani tẃi ang khá bai surimani a Kaitor saui mano. Bo saui mano ang suri san brúm brúm norokni mung khu-ui suri sano. Kaitor muchung khe ba tabuk ulo phano norok bai ano malai rw thung hwnwi ang sanwi tongo.

¹¹Tamni hwn khe Kaitor bini Phola bai kaham khlaimano norok ani yak tẃi manẃi khá rak thung hwnwi ang norokno belai naina muchungwi tong kha.

¹²Ang hwnmani abo omo hai se, norok bai ang babai nwnwi’-no bwkha phan man anw, norokbo ani poito bai, angbo norokni poito bai phan man anw.

¹³Takhukrok, ang norokno o kók saui man rwna nai-o, ang norokno nai phaina hwnwi kwbángma’-no bwkha chapma se, tamo khe tabuk phano kwchaui tong kho. Tei buini bororokni bere baksa baksano poito khlaiwi rwma hai norokni berebo ang abo hai poito khlaiwi rwna nai-o.

¹⁴Ang borbor bai borbor ya, sinai bai si ya, bebak borokni thani rwthai tongo.

¹⁵Hakhe norok Rumo tongnairokni thanibo Kothoma Kahamno pírna muchungo.

¹⁶Khristoni Kothoma Kahamno tẃiwi ang lachi ya; omo poito khlainai joto borokno mwthangna bagwi Kaitorni phan, Judairokni bagwibo, buini bororokni bagwibo.

¹⁷Tamni hwn khe Kaitor bororokno bahai khe kaham hwnwi rom kha Kothoma Kaham abono phunuk kha; yaphang buchuk omo poito bai wngo. Omo Elembago hai hwnwi sama hai, “Poito khlaima bising tẃi Kaitor bai kaham hwnwi romjaknai borok bo se thangnai.”

¹⁸Kaitorno kiri yaui samung hamya khlainairokno chuknohani Kaitor jolijagwi yagul su-ui phunuk kha. Bórok samung hamya khlaiwi kubuino kholobwi tono.

¹⁹Kaitor bórokno yagul su-o, tamni hwn khe borok Kaitorni kókno saui mannani abo bórokni thani kwlai se, Kaitor’-no abo bórokni thani lai rwui rw kha.

²⁰Kaitor mol brúm brúm kwplai wngwi tongo, phiya bo sói’-no Kaitor, bororok o swngchar snamjak phuruni simi abono saui mano, mokol bai nuk ya phano abono kaham khe saui mano. Kaitor aswk snammani manwirokno nugwi bororok abono saui mano. Abo bai’-no bórokni búkhúk tẃi kupulung!

²¹Bórok Kaitorno saui mano, phiya bo bono Kaitor hwn lai ya, bono hambaibo rw lai ya. Abo wng yaui bórok uansukmarok samung chúk ya máng se, phiya bórokni bwkha khá si ya mwnakjak se.

²²Chwng sinai hwnwi bórok hwno, aile bórok si ya gwja se;

²³bórok Kaitor thangblangno suri yaui borok thwiblang hai, eba toksa-toktẃi hai, eba uak-tok hai, eba chibuk-sindrai hai khe takjak mwtairokno se suri lai-o.

²⁴Abo bai’-no bórokni sak motók tẃi samung sitra khlai thung hwnwi Kaitor bórokno yakarwi rw kha, hakhe bórok kiching bórok lachimasingcha samung tang lai-o.

²⁵Bórok Kaitorni kók kubuino khibi laiwi kók tatalno khna lai-o; Kaitor snammani manwirokno se bórok khubo khulumo, subo suri lai-o, Snamnaisano le suri laina se hwn ya. Bo se mol brúm brúm lobjak thung. Amen.

²⁶Bororok omo hai khlaima bai Kaitor bórokno lachimasingcha samung bijla-o yakarwi rw kha. Bwrwirok phano se bórokni tongmung tong yaui tongmung bejua wngwi tong lai-o.

²⁷Abo hai’-no chwlarokbo bwrwirok bai tong yaui chwla bai chwla belai uaija laiwi tongo. Chwla bai chwla lachimasingcha samung tangwi tong lai-o, hakhe abo bai’-no bórok samung hamya tangma tẃi’-no akol mano.

²⁸Bororok Kaitorno gosina nai yani bagwi Kaitor bórokno khá sitra wngna bagwi yakarwi rw kha, hakhe bórok tongmung hamya tong lai-o.

²⁹Bórok podrepot sitra bai samung hamya khlaiwi máng tongo, bórok khámai máng tongo, naisler máng tongo; bórok músú laiwi máng tongo, borok buthar laiwi máng tongo, bu laiwi máng tongo, bandi laiwi máng tongo, peret tikhlai laiwi máng tongo. Bórok kók nang ya sa lai-o,

³⁰bórok bo’-bo bono hamya sa lai-o, bórok Kaitorno naislerjago; bórok lachi rw-o, kung chugo, kók kotor sa-o; bórok samung hamyani lama kwtal máng naituk laiwi tongo; bórok buma-buphani kók khna ya;

³¹bórok khá si ya, kók rwma tẃi’-no kók narwk ya, buino mayabo chá ya, khábo khairok ya.

³²Omo hai khe tongnairok ma thwinai hwnwi Kaitor hwnmano bórok saui mano, hai phano bórok omo tẃi samungno khlaiwi simi thak ya, bui khlaimanobo bórok chajago.