Read Kok Borok RUM 10 Bible Online

RUM 10 - Kok Borok bible

RUM 10

¹Takhukrok, ani bororok mwthangjak thung abono khápang rwui ang bwswk se naiwi tong! Bórokni bagwi Kaitorni thani ang bwswk se suri sanwi tong!

²Ang bórokni kók saui mano, Kaitorni kók hwn khe bórok belai kwsrang se, tamo khe bórok kwsrang phano abono kaham khe si ya.

³Kaitor bahai khe bororokno kaham hwnwi rom a lamano si yaui bórok sakni lama se khlaina nai-o; hakhe kaham hwnwi romjakna bagwi Kaitorni lama-o him ya.

⁴Poito khlainai jotono Kaitor bai kaham hwnwi romjakna tẃi khe Khristo Kerongno samung nang ya khlaiwi rw phai kha.

⁵Kerong rákhogwi Kaitor bai kaham hwnwi romjaknano Musi omo hai khe swi lang kha, “Kerongo sama haino tongnai borok bo abo bai’-no thangnai.”

⁶Phiya omo wng kha poito khlaima bising tẃi Kaitor bai kaham hwnwi romjaknano hai hwnwi sama se, “ ‘Sabo chuknoha-o kasaui thángnai?’ hwnwi bwkha bising bising ta sa di.” (Omo Khristono tikhlaiwi tubuna kók se.)

⁷“Hai hwnwibo ta sa di, ‘Sabo ha tola kwlwk langnai?’ ” (Omo Khristono kwthwirokni hani tisaui tubuna kók se.)

⁸Omo wng kha hai hwnwi sama se: “Kaitorni aroni kók nini thani’-no tongo, nini búkhúgobo tongo, nini bwkha’-obo tongo” abo wng kha poito khlai di hwnwi chwng pírmani a kók se.

⁹“Jisu se Subrai,” hwnwi búkhúk bai gosi khe, phiya Kaitor bono kwthwini mwthangwi tisa kha hwnwi bwkha bai poito khlai khe, hakhe nwng mwthangjaknai.

¹⁰Tamni hwn khe bwkha bai poito khlaiwi Kaitor bai kaham hwnwi romjago; búkhúk bai gosiui mwthangjago.

¹¹Elembago hai hwnwi sa-o, “Bono poito khlainai borok bo lachi glak.”

¹²Oro Judairok bai buini bororok phér lai ya; Kaitor jotoni’-no Subrai, hakhe bono ringnai bebak borokno bo belai khe hammari rw-o.

¹³Elembago hai hwnwi sama hai, “Subraini mungwi ringnai borok bo se mwthangjaknai.”

¹⁴Tamo khe bórok poito khlai ya khe bahai khe bono ringwi mannai? Bini kók se khna ya kho hwn khe bórok bahai khe poito khlaiwi mannai? Bini kók se pírjak ya hwn khe bórok bahai khe khnanai?

¹⁵Phiya pírnaisa se rohorjak ya hwn khe bahai khe bini kók pírjaknai? Elembago hai hwnwi sama hai, “Kothoma Kaham tubunairok bórok phaimani abo bwswk se tongthotok!”

¹⁶Tamo khe bórok bebak’-no Kothoma Kahamno khna li ya. Jisaia sakphang’-no hai hwnwi sa lang kha, “O Subrai, chini kókno sabo khnanai tong?”

¹⁷Hakhe tabuk, Kothoma Kaham khnama tẃi se poito phai-o, phiya Khristono pírma tẃi se Kothoma Kaham phai-o.

¹⁸Hakhe ang hwno: bórok Kothoma Kaham khna ya kho omo sói da? Bórok khnajak, se elembago hai hwnwi sama hai, “Bórok samani kók swngchar gwnangwi khna bai kha, haktor buchuk jora bórokni kók sógwi kha.”

¹⁹Ang tei uáisa hwno: Israilrok saui man ya da? O kókno tẃiwi Musi se swkang sa-o, “Sói dopha ya abo tẃi bororokno tẃiwi ang norokno bwkha músú rwnai; dopha si yarokno tẃiwi ang norokno joli rwnai.”

²⁰Jisaia khá torwi hai hwnwi sa-o, “Ano naituk yarok bórok ano nuk kha ani kók sẃng yarok ang bórok bai nukjak kha.”

²¹Tamo khe Israilrokni kók bo hai hwnwi sa-o, “Kók khna yarok bai thentarokni bagwi sapung’-no ani yak surchajak.”