Read Kok Borok RUM 11 Bible Online

RUM 11 - Kok Borok bible

RUM 11

¹Hakhe ang hwno: Kaitor bini bororokno nor kha, hai da? I’nhi, hai ya! Ang sak’-no Israilsa, Abraham ani chuchu, ang Benjamin bosongni borok.

²Kaitor yaphango chongmani bini a bororokno nor ya. Elembakni kwrẃngsa-o Elia Israilrokni mungwi kók samano norok saui man ya da?

³“O Subrai, bórok nini diyariroknobo buthar kha, nini háyároknobo swbai bai kha; ang simi se tong rwk si-o, hakhe anobo butharna naiwi tong lai-o.”

⁴Kaitor bono tamo hwnwi sa kha? “Bal mwtaino suri ya abo tẃi borok khorok snisaino ang ani bagwi narwgwi ton kha.”

⁵Abo haino tabukni o molobo Kaitor maya cháui chongmani abo tẃi borok kisicha tongo.

⁶Bórok chongjakmani abo bo maya cháma bai se, bórok samung khlaima bai ya. Tamni hwn khe Kaitor chongmani abo bororok samung khlaima bai hwn khe hakhe bo maya chámani abo sói maya cháma klai ya.

⁷Tabuk tamo wng kha sla? Israilrok bórok naitukmani abo man li ya. Kaitor chongmani a borok kisicha simi se abono man si-o; tei bára tongnairok nathong khlaijak bai kha.

⁸Elembago hai hwnwi sama hai, “Kaitor bórokni bwkhano khá si ya snam kha; tini tẃi jora phano bórok mokolbo nuk ya, khunjubo khna ya.”

⁹Daud hai hwnwi sa-o, “Bórok panda-o khẃi-o kwcha rwui romjak thung; bórok usta khu-ui klai thung. yagulbo sujak thung!

¹⁰Nuk ya wngna tẃi khe bórokni mokol kholopjak thung; bórokno guja thon rwui máng ton di.”

¹¹Hakhe ang hwno: Judairok usta khu-ui klaiwi ko da komor bai kha? I’nhi, hai ya! Bórok sumsok khlaima bai buini bororok mwthangjaknani lama man bai kha; Judairokno músú rwna hwnwi omo wngo.

¹²Judairok sumsok khlaima bai swngchar belai ham kha, bórok cha ya wngma bai buini bororok belai ham bai kha. Hakhe Judairok khoroksa kwrwi tẃi khopjak phai khe teibo bwswk kaham wngno.

¹³Buini bororok, ang tabuk norokno o kók sa-o, buini bororokni thani chonghor ma wngma bai ang ani samungno tẃiwi khá twtwng wngo.

¹⁴Ang ani bororokno músú rwui man thotok ma tongo, hakhe baksano mwthangwi man anw.

¹⁵Bórok norjakma bai se swngchar Kaitor bai kwtha rwjak kha. Bórok yachakjak kha hwn khe tamo wngno? Kwthwirok thangwi bachanai!

¹⁶Auang kisicha Kaitorno barokjak kha hwn khe bebak auangbo barokjak kha, buphang yaphang Kaitorno barokjak kha hwn khe bedekrokbo barokjak kha.

¹⁷Barini tháistwi buphangni bedek deknwi dektham swbaijak kha, hakhe aro bolongni tháistwi bedek thepaui rw phaijak kha. Norok buini bororok bolongni a tháistwi buphang hai, tabuk norok barini tháistwi buphangni tos kaham man kha.

¹⁸Abo baino a bedek kwbairokno sak nang ya ta wng di. Bahai khe nwng kung chuknai ba? Nwng ba bedek se bla; nwng yaphangno mwthangwi ton ya, yaphang se nono mwthangwi tono.

¹⁹Hakhe nwng hai hwnwi sa anw, “Hai phano ano thepana bagwi se a bedekrok swbaijak bla.”

²⁰Omo sói’-no, bórok poito khlai yani bai swbaijak kha, nwng khe poito khlaima bagwi thepajagwi tongo. Hai phano aboni bagwi nwng kung ta chuk di; abo wng yaui hus khe se tong di.

²¹Kaitor sói bedek Judairokno se maya chá li ya, hakhe nono maya chá anw hwnwi da nwng khá ka?

²²Chwng oro nugo Kaitor bwswk se mayabo gwnang, bwswk se mayabo kwrwi. Bumuk cha yarokno bo maya chá ya, phiya bo nono khairogo, tumungno nwng bo bai khairokjakna tẃi khe tong khe bo nono khairoknai; tamo khe bo bai khairokjakna tẃi khe tong ya khe nwng’-bo tanwi khibijaknai.

²³Judairokbo bórok poito khlai ya wngmano yakar kha hwn khe bórok agi tongma-o thepajak phinai, tamni hwn khe Kaitor bórokno haino hai thepaui mano.

²⁴Norok buini bororok bolongni tháistwi buphangni a tanwi khibijaknai bedek hai, norokni tongmungno khibiui barini tháistwi buphango thepajak phai kha. Judairok wng kha barini a tháistwi buphang hai; hakhe bedek tanwi khibijakrokno a buphango’-no buphango thepa phinani Kaitor teibo laijak kuk anw.

²⁵Takhukrok, oro bisingni kók tongo, ang abono norokno saui man rwna nai-o. Norok abono saui man khe norok saichung saichung belai si-o hwnwi uansuk glak. A kók wng kha omo hai, Israilrok kók khna ya wngmani abo srapsani se, Kaitorni thani phainai abo tẃi buini bororok bebak’-no phai bai ya sak se abo tongnai.

²⁶Hakhe omo hai kheno bebak Israilrok mwthangjaknai. Elembago hai hwnwi sama hai, “Mwthangnaisa Siyonni phainai, Jakob bosongni bebak hamyano nor phainai.

²⁷Ang bórokni sumsok swkak phuru bórokni thani ang omo hai swmai tangnai.”

²⁸Judairok Kothoma Kaham khna yani bai bórok norok buini bororokni bagwi se Kaitorni kena ari. Tamo khe Kaitor chongma bai bórok chuchusongni bagwi se bo bai hamjago.

²⁹Tamni hwn ba Kaitor khairogwi chongmani a borokno tei yakar ya.

³⁰Norok buini bororok, agi norok Kaitorni kók khna ya; tamo khe Judairok Kaitorni kók khna li ya wngma bai norok tabuk Kaitor bai maya chájak kha.

³¹Abo hai’-no norok maya chájakma bai Judairokbo maya chájakna tẃi khe bórok tabuk Kaitorni kók khna ya wngo.

³²Bebak bororokno maya cháui manna tẃi khe Kaitor bórokno kók khna ya snam kha.

³³Kaitor bwswk se maya gwnang! Bo bwswk se si, bwswk se elem gwnang! Bo khá chapmano romwi mannai sabo tong? Bini samungno saui mannai sabo tong?

³⁴Elembago hai hwnwi sama hai, “Subraini bwkha sabo saui man? Sabo bono phrwngwi man?

³⁵Sabo bono swkang baira mungsa swk rw kha ba abono bo kiphilwi rwna nangnai?”

³⁶Bo se bebak manwirokno snamo, bini bising tẃi phiya bini bagwi se bebak manwirok tongo. Kaitor mol brúm brúmno chẃngsacha wng thung! Amen.