Read Kok Borok RUM 12 Bible Online

RUM 12 - Kok Borok bible

RUM 12

¹Abo baino takhukrok, Kaitor chwngno belai khe maya cháui tongma bai ang norokno o kók sa ja-o: Kaitorni thani pun tok ratharwi yapharma hai norok kwthangwi’-no sakno Kaitorni thani yaphar di, bini yago yapharjakna tẃi khe, phiya bo bai hamjakna tẃi khe sakno yaphar di. Omo se sóini surimung, omo hai khe se norok suri thai.

²O swngcharni tongmung chámung bai ta tong di, tamo khe Kaitorno norokni bwkha kwtal khlai rwui tongmung kwtal tong di. Hakhe Kaitor tamo nai abo norok saui man anw bubo ba kaham, bubo ba bo hamjak, bubo ba sói, abo saui man anw.

³Kaitor ano khairogwi suar rwma bai ang norok bebakno’-no o kók sa-o: Kotor wng yaui sakno kotor ta nuk di, abo wng yaui sakno sutrang khe nuk di, Kaitor norokno poito khlaiwi rwma swk’-no jotono sakno nuk di.

⁴Chini jotoni bwsago’-no bedek-bupra kwbángma tongo, a bedek-buprarokni janija samung tong bai-o.

⁵Abo hai’-no chwngbo kwbángma phano Khristo bai thansa wngmani bagwi chwng bwsak kaisa, hakhe bwsak kaisani bedek-bupra wngwi chwng jotono kwrwng laijak se.

⁶Kaitor khairogwi jotono’-no suar rwma tẃino chwng samungo phnangjak thai. Tumungno Kaitorni aroni kók sanani suar tong khe chini poito tongma swkno chwng ma sanai;

⁷chubana hwn khe chwng ma chubanai, phrwngna hwn khe chwng ma phrwngnai,

⁸buino khá rak rwna hwn khe chwng khá ma rak rwnai. Buino rwnai borok bo yak kuar khe ma rwnai, bokhorok wngnai bo kaham khe samung ma khlainai, buino khairoknai borok bo khápang kwsrang khe ma khairoknai.

⁹Norok buino hamjak khe sói khe hamjak di. Hamyano seleng di, kahamno romwi tong di.

¹⁰Khristan takhuk hwnwi norok kiching norok hamjak lai di, norok kiching norok bóri laina nai di.

¹¹Ta seler di, panjalwi’-no samung khlai di. Bwkha ui-ui khe Subraini samung khlai di.

¹²Khatungma bai tongthogwi tong di, tekto nang phuru khá logwi tong di, suri san máng tong di.

¹³Biyalo klaijak takhukrokno chuba di, nogo borok phai khe nogo kasa rw di.

¹⁴Norokno sátoknairokni kaham khlai di hwnwi Kaitorno san di. Au, kaham khlai di hwnwi san di, hamya khlai di hwnwi ta san di.

¹⁵Tongthoknairok bai baksa norokbo tongthok di, kapnairok bai baksa norokbo kap di.

¹⁶Jotono’-no baksa khe nuk di. Kung ta chuk di, borok kusurok bai se tong di. Sakno sinai hwnwi khá ta ka di.

¹⁷Tumungno khoroksa swk hamya khlai khe bono hamya ta khlai phi di. Bebak bororok kaham hwnmano se khlaina nai di.

¹⁸Bebak borok bai kwthaui manna tẃi khe tongna nai di.

¹⁹Takhukrok, norok hamyani yagul ta su di, tamo khe Kaitorno yagul su thung hwnwi sa di. Tamni hwn ba elembago hai hwnwi sa-o, “Yagul sunai ang se, hamya khlainairokno ang se hamya khlai phinai hwnwi Subrai sa-o.”

²⁰Yagul su yaui elembago hai hwnwi sama hai khlai di, “Nini kena ari ok khuijak khe bono mai chá rw di; twi kangjak khe bono twi khan di; abo hai khlai khe bo lachimasingcha ma wng anw.”

²¹Hamya bai ta mechenjak di, samung kaham bai se hamyano mechen di.