Read Kok Borok RUM 13 Bible Online

RUM 13 - Kok Borok bible

RUM 13

¹Jotono hani bokhorokrokni kók ma khnathai, tamni hwn khe Kaitor wng rw ya khe kebo bokhorok wngwi man ya, hakhe aswk bokhorok tongnairokno Kaitor se bokhorok khlai-o.

²Bokhorokrokno kebengnai borok bo Kaitor chongmano kebengo; hakhe omo hai kebengnai borok bo yagul sujakna lama se khlai-o.

³Samung kaham khlainairok bokhorokrokno kirithai kwrwi, samung hamya khlainairok se ma kirithai. Nwng bokhorokno kirima kwrwi khe tongna nai-o, hai da? Samung kaham khlai di, hakhe bo nono kaham hwn anw.

⁴Bo Kaitorni samung khlainai se, nini kahamni bagwi samung khlaiwi tongo. Tumungno nwng samung hamya tang khe bono kiri di, tamni hwn khe bo kaham khe yagul su-ui mano. Bo Kaitorni samung khlainai se, samung hamya khlainairokbo Kaitorni wngwi yagul su-o.

⁵Omoni bagwino norok bokhorokrokni kók ma khnathai klai-o Kaitor yagul suna hwnmani aboni bagwi simi buya, ahaino uansuguibo nai di.

⁶Omoni bagwino norok teksbo rwui tongo, tamni hwn khe bokhorokrok bórokni samung khlaiwi Kaitorni samung khlaiwi tongo.

⁷Hakhe bórokno rwthai tongmano rw di; bórokno teks bai musuk rwthai tongmano rw di, bórokno sak nang ya wng yaui bórom khlai di.

⁸Keboni thani lakai gwnang ta wng di, norok kiching norok hamjak lai di abo se norokni lakai. Buino hamjaknai borok bo se Kerong rákhokma klai-o.

⁹“Buitali-buitala ta wng di, borok ta buthar di, ta khok di, ta khámai di,” Kerongni o kókrok, phiya teibo kók tongmarok o kók tháisa-o se duljak bai-o “Nwng sakno hamjak tẃi’-no buinobo hamjak di.”

¹⁰Buino hamjaknai borok bo bono hamya khw se khlai ya ta. Abo bai’-no buino hamjaknai wng kha Kerongo tongma bebakno rákhokma se klai-o.

¹¹Norok omo hai ma se ma tongthai, tamni hwn khe tabuk bubo tẃi sal abo norok saui mano. Norokni sichana jora sók phai kha; tamni hwn khe chwng puila poito khlai phuruni slái tabuk chwng mwthangjakna sal se teibo sampha kha.

¹²Hor ai twtwi wng kha, sal phaina nai kha. Phai di, chwng mwnakma-o samung khlaimarokno yakar lai si anw, pohoro choba nang laina bagwi da-seng yago na lai si anw.

¹³Chuak nungwi jurang uaija lai yaui, buitali-buitala wng lai yaui, sak tongthok tong lai yaui, bu lai-tok lai wng lai yaui, músú lai yaui, phai di, chwng salni pohoro tongnairok hai kaham khe tong lai si anw.

¹⁴Hakhe Subrai Jisu Khristoni da-seng yago na di. Sakni muchung tẃi tongna bagwi tongmung hamya tongna ta uansuk di.