Read Kok Borok RUM 14 Bible Online

RUM 14 - Kok Borok bible

RUM 14

¹Poito rak tha ya borokno norok yachak di, hai phano bo tamo sa sa ya abono tisaui bo bai tokra ta rw lai di.

²Bebak chámung’-no cháui mano hwnwi khoroksa poito khlai-o, poito rak tha ya borok bo muihan chá ya.

³Bebak chámungno chánai borok bo muihan chá ya a borokno sak nang ya ta wng thung; phiya muihan chá ya a borok bebak chámung chánaino majra ta ber thung, tamni hwn khe bo Kaitor bai yachakjak.

⁴Tei khoroksani selengno majra bernai nwng sabo? Bo seleng kaham da hamya abo bini nokphang se nai anw. Bo kaham w se wngnai, tamni hwn khe Subrai bono kaham khlaiwi mano.

⁵Khoroksa salsano bebak salni slái kotor wngjago, tei khoroksa ba bebak salno abo hai’-no hai wngjago. Joto borokno bwkha kwrak wngthai.

⁶A salsano kotor wngjaknai borok bo Subraini bagwi’-no kotor wngjago; bebak chámungno chánai borok bobo Subraini bagwi’-no chá-o, tamni hwn khe bo a chámungni bagwi Kaitorno hambai rw-o. Mungsa swk chámung chá ya wngnai borok bo Subraini bagwi’-no chá ya wngo, tamni hwn khe bo Kaitorno hambai rw-o.

⁷Khoroksa phano sakni bagwi simi thangnaibo kwrwi, thwinaibo kwrwi;

⁸chwng kwthang tong khe Subraini bagwi’-no tongo, thwi khebo Subraini bagwi’-no thwi-o. Hakhe kwthang tongwibo, thwiwi thángwibo chwng Subraini’-no.

⁹Kwthangroknibo kwthwiroknibo Subrai wngna bagwi Khristo thwi kha, hakhe thangwi bacha kha.

¹⁰Hakhe tamo wngwi nwng nini takhukno majra ber? Nwng le tamo wngwi nwng le nini takhukno sak nang ya wng? Kaitor bai buj thumjakna bagwi chwng bebak’-no bini bwskango ma bachanai.

¹¹Elembago hai hwnwi sa-o, “Ang kubui se sa-o, jotono ano ma khulumnai, jotono ano Kaitor hwnwi ma gosinai hwnwi Subrai sa-o.”

¹²Abo baino chwng jotono Subraini thani janija kók ma sanai.

¹³Hakhe tabuk, phai di, chwng kebono kebo majra ta ber lai si di. Aboni slái nini takhuk usta khu ya tẃi, phiya sumsogo klai ya tẃi omo tẃi samung khlaina hwnwi se norok bwkha ma chongthai.

¹⁴Subrai Jisu bai thansa wngma bai ang saui man súk kha, ahaino hamya hwnwi mungsa phano kwrwi; tamo khe hamya hwnnai borokni thani simi se abo hamya.

¹⁵Cháma manwino tẃiwi nwng takhukno bwkha hamya khlai khe nwng bono hamjakma klai ya. Nwng chámani abo bai a borokno ta dera rw di, bini bagwibo Khristo thwi kha.

¹⁶Norok manwi kaham hwnmani abo manwi hamya ta hwnjak thung.

¹⁷Kaitorni ha wng kha abo chá lainani kók buya, nung lainani kók buya; abo wng kha Phola Kwthar bai kaham khe tongnani, khe kwchang khe tongnani, phiya tongthoknani kók se.

¹⁸Omo tẃi khe Khristoni samung khlainai borok bono se Kaitorbo hamjaknai, bororokbo kaham hwnnai.

¹⁹Abo bai’-no bui bai kwthaui tongwi manna tẃi, phiya chwng kiching chwng ragwi manna tẃi abo tẃirokno se chwng ma naithai.

²⁰Chámungni bagwi Kaitorni samung ta dera rw di. Bebak chámung’-no chájaknai máng, tamo khe mungsa swk chámung cháma bai tei khoroksa sumsogo klai-o hwn khe abo le cha ya’-no.

²¹Nwng muihan cháma bai, angur bwtwi nungma bai, eba mungsa swk khlaima bai nini takhuk sumsogo klai kha hwn khe abórokno yakar thai klai-o.

²²Hakhe o kókno tẃiwi nwng poito khlaimano nwng bai Kaitor simi si thung. Samung kaham hwnwi khlaina hwnmano bwkha sutrang khe khlainai borok bo hamchajak.

²³Tamo khe bwkha udru mudru wngwi chá khe Kaitor bono majra bero, tamni hwn khe bo khlaimani a samung poitono tẃiwi ya. Poito tẃiwi samung khlaijak ya khe abo sumsok khlaima klai-o.