Read Kok Borok RUM 15 Bible Online

RUM 15 - Kok Borok bible

RUM 15

¹Chwng poito kwrak khe tongnairok poito rak tha yarokno poja tẃi chru thai klai-o. Chwng sakni kaham naithai kwrwi.

²Aboni slái chwng jotono chini takhukno poito rak rwna tẃi khe bini kaham nai di.

³Tamni hwn khe Khristo bo sakni kahamno nai ya. Tamo khe elembago hai hwnwi sama hai wngo, “Nono lachi rwnairok lachi rwmani abo ani sago klai kha.”

⁴Elembak chwngno khá lok rwmani tei khá rak rwmani tẃi chwng khatungwi manna tẃi khe elembago swijakmani abo jotono chwngno phrwngna se.

⁵Norok Khristo Jisuno swrwngma bai khá lok rwnai tei khá rak rwnai Kaitor norokno khá baksa khlai thung.

⁶Hakhe norok bebak’-no thansa khe kók tháisa khe chini Subrai Jisu Khristoni Bupha Kaitorno lobwi man anw.

⁷Hakhe Khristo norokno yachakma hai’-no norokbo Kaitorni chẃngsachani bagwi norok kiching norok yachak lai di.

⁸Ang norokno o kók sa-o, Kaitor kók narwknai hwnwi phunukna bagwi, chuchusongni thani Kaitor kók rwmani abo nang rwna bagwi, phiya buini bororok suda Kaitor bai maya chájagwi bono lobwi manna bagwi Khristo Judairokni seleng wng phai kha. Elembago hai hwnwi sama hai, “Abo bai’-no buini bororokni bisingo ang nono hambai rwnai, nini mungwi ang lobwi rwchapnai.”

¹⁰Hai hwnwibo sa-o, “O buini bororok, Kaitorni chongjak bororok bai baksa norokbo tongthok di.”

¹¹Hai hwnwibo sa-o, “O buini bororok, norok bebak’-no Subraino lob di, O bebak hani bororok, bono lob di.”

¹²Jisaiabo hai hwnwi sa-o, “Jisai bosongni khoroksa phainai; buini bororokni bokhorok wngna bagwi bo bachanai, hakhe bórok bono khatungwi tongnai.”

¹³Phola Kwtharni phan bai norok kwbángma khatungna tẃi khe norok Kaitorno poito khlaima bai khatung rwnai Kaitor norokno tongthok rw súk thung, khá kwchang rw súk thung.

¹⁴Ani takhukrok, norok borok kaham máng se hwnwi ang saui man súgo, norok elem kwrwng máng, phiya norok kiching norok phrwngwi mano hwnwibo ang saui man súgo.

¹⁵Norokno kók tháinwi tháitham muitu khe rw thani ang kisa khá torwi omono swi kha. Buini bororokni thani Khristo Jisuni seleng wngwi samung khlaina bagwi Kaitor ani khairokma bai ang khá toro. Buini bororokno Phola Kwthar bai Kaitorni thani yapharwi bórok Kaitor bai yachakjak thung hwnwi ochairok samung khlaima hai Kaitorni aroni Kothoma Kahamno ang píro.

¹⁷Hakhe Khristo Jisu bai thansa wngwi ang Kaitorni bagwi samung khlaimano tẃiwi khá twtwng wngwi mano.

¹⁸Buini bororokno Kaitorno kók khna rwna bagwi Khristo ani yak tẃi khlaimani simi se ang khá torwi sanai; yak bai khúk bai, soidomni samung tei ha-o nuk ya samung phunukma bai, phiya Pholani phan bai Khristo omono khlai kha. Hakhe Jerusalemni simi Ilirik jora yang yang bebago’-no ang Jisu Khristoni Kothoma Kahamno pái súgwi pírwi phai kha.

²⁰Tei khoroksani nokthai tisajago tisajak ya tẃi khe Khristoni bumung khna ya kho abo tẃirogo Kothoma Kaham pírnani abo se ang nai-o.

²¹Elembago hai hwnwi sama hai, “Bini kothoma sajak yarok bórok nuknai, bini kók khna yarok bórok sinai.”

²²Omoni bagwino ang norokni thani phaina naiwibo kwcha kwchaui tongo.

²³Tamo khe tabuk o harogo ani samung páima bai, phiya bumasíngni simi norokni aro thángna muchungma bai

²⁴Speno thángna lama-o ang norokno nai langna hwnwi khá ka-o. Hakhe norok bai nokha talnwi taltham tongwi aro thángna phuru norok ano chubaui rohor di abo ang nai-o.

²⁵Phiya ba tabuk ang Jerusalemo Kaitorni bororokni samungno thángnai.

²⁶Tamni hwn khe Makidonia bai Grisni motharok Jerusalemni Kaitorni bororokni bere kwrwirokno chubana hwnwi hai’-no rang khangna chap lai kha.

²⁷Bórok sak baithang’-no abo khlaina hwnwi chap lai kha. Sana tháng khe a kwrwirokno bórok chuba thaibo tongo. Judairok Kaitorni aroni manwi kaham manmarokno buini bororokno rw kha, hakhe abo baino buini bororokbo Judairokno o swngcharni manwirok bai chuba thai tongo.

²⁸Ang o samungno khlai bai khe, a rang khangjak bebak’-no bórokni yago rw baiwi ang Speno lam rwnai, hakhe tháng tẃi norok bai tong langnai.

²⁹Ang saui mano ang phai phuru Khristo ani yak tẃi norokni kaham khlai suknai.

³⁰Takhukrok, chini Subrai Jisu Khristo bai tei Phola chwngno hamjak rwma bai ang norokno sa ja-o, ang bai baksa norokbo Kaitorni thani ani bagwi kaham khe suri san di.

³¹Judia-o poito khlai yarok ani hamya khlaiwi man ya tẃi khe, phiya Jerusalemo tongnai Kaitorni bororok ani samungno hamjakna tẃi khe norok suri san di.

³²Hakhe Kaitor muchung khe ang belai tongthok twtwi norokni thani phainai, hakhe norok bai tongwi khápang srwng rwjaknai.

³³Khá kwchang rwnai Kaitor norok bebakni logi tong thung. Amen.