Read Kok Borok RUM 16 Bible Online

RUM 16 - Kok Borok bible

RUM 16

¹Kenkhria motha-o samung khlainai chini bukhuk Phoibi borok kaham hwnwi ang norokno sahoro.

²Kaitorni bororok bórok kiching bórok yachak laima hai bonobo Subraini mungwi yachak di, hakhe bo norokni thani mungsa swk nai khe abo bono rw di; tamni hwn khe bobo aswk bororokno chubaui phai kha, anobo chubaui phai kha.

³Khristo Jisuni samungo ani logisongrok Priskila bai Akulano ang khápang rohoro;

⁴bórok ani bagwi butharjakna suda gosi phai kha. Ang bórokni kókno pogwi man ya ang simi ya, buini bororokni bebak motharok suda bórokni kókno pogwi man ya.

⁵Bórokni nogo achuk achukmani a mothanobo ang khápang rohoro. Asia angkoro tongnairokni bere Khristono puila poito khlainai ani khájani Epainitno khápang rohoro.

⁶Norokni bagwi belai samung tangnai Mariamno khápang rohoro.

⁷Ang bai baksa alongo chopjaknai ani borok Andronik bai Juniano khápang rohoro; bórok chonghorrokni bere kaham khe sinijak se, phiya ang wng ya sini’-no bórok Khristan wng kha.

⁸Subrai tẃi khájani Ampliatno khápang rohoro.

⁹Khristoni samungo chini logisong Urban bai ani khájani Stakuno khápang rohoro.

¹⁰Khristoni bagwi mari bujak Apelino khápang rohoro. Aristobulni nokni bororokno khápang rohoro.

¹¹Ani borok Herodion bai Narkisni nokni Khristan takhukrokno khápang rohoro.

¹²Subraini samung khlainai Truphaina bai Truphosano khápang rohoro, Subraini bagwi belai samung khlainai ani khájani Persinobo khápang rohoro.

¹³Belai kaham khe Subraini samung khlainai Ruphno, phiya ani bwsa hai khe nainai bini bumanobo ang khápang rohoro.

¹⁴Asunkrit, Phlegon, Hermi, Patroba, Herma phiya bórokni logi tongnai bebak Khristan takhukrokno ang khápang rohoro.

¹⁵Philolok bai Juliano, Neria bai bini bukhukno, Olumpano, phiya bórokni logi tongnai bebak Kaitorni bororokno khápang rohoro.

¹⁶Norok kiching norok takhuk hwnwi motom su laiwi khápang rw lai di. Khristoni bebak motharok norokno khápang rohoro.

¹⁷Takhukrok, ang norokno sa ja-o, norok phrwngjagwi manmani abo hai phrwng yaui kak lai-phui lai khlaiwi rwnai, bororokni bwkha swbainai omo tẃi bororok bai hus khe tong di, bórok bai ta tong di.

¹⁸Omo tẃi khlainairok chini Subrai Khristoni samung khlai ya, bórok bohokni samung se tango. Bórok kók kaham kaham saui, kók kwtẃi kwtẃi saui borok kosongrokno lama koró rw-o.

¹⁹Norok Kothoma Kaham sama hai tongmano jotono saui man bai kha, aboni bagwino norokni bagwi ang tongthogo. Norok kahamni bagwi sinai wng di, phiya hamyani bagwi si ya wng di hwnwi ang nai-o.

²⁰Hakhe chwngno khá kwchang rwnai Kaitor norokni yakung yaphango Soitanno dakti’-no kádulnai. Chini Subrai Jisu norokno khairok thung.

²¹Ang bai baksa samung khlainai Timothi norokno khápang rohoro, phiya ani borok Luki, Jason tei Sochipatrosongbo norokno khápang rohoro.

²²Ang Terti, o kóktun swinai Khristo tẃi ani khápang rohoro.

²³Ani nokphang Gai norokno bini khápang rohoro, bini nogono motha achuk achugo; o taunni rang bandari Erasto bai chini takhuk Kuart norokno khápang rohoro.

²⁴[Chini Subrai Jisu Khristo norok bebakno khairok thung. Amen.]

²⁵Phai di, Kaitorno chẃngsacha khlai anw. Ang Jisu Khristoni kókno tẃiwi pírmani a Kothoma Kaham bai, phiya bumasíngni simi sijak ya wngwi phaimani a bisingni kókno phunukma bai Kaitor norokno poito rak rwui mano.

²⁶Hai phano tabuk diyarirok swi langmani tẃi a bisingni kók pháng pháng khe phunukjak kha; hakhe bebak bororokno poito khlaiwi bini kók khnana tẃi khe mol brúm brúmni Kaitor dagima bai bebak dophano abono saui man rw kha.

²⁷Jisu Khristo tẃi Kaitor mol brúm brúmno chẃngsacha wng thung, bo simi se Kaitor, bo simi se elem kwrwng! Amen.