Read Kok Borok RUM 2 Bible Online

RUM 2 - Kok Borok bible

RUM 2

¹Takhuk, nwng buino majra da ber? Nwng jesa phano wng thung nini khúk tẃi kupulung! Nwng buino majra le bero, yang bórok khlaima hai’-no khlaiwi tongo, abo nwng sakno majra berma se klai-o.

²Omo tẃi samung khlainairokno Kaitor majra ber khe abo sói se hwnwi chwng saui mano.

³Tamo khe takhuk, nwng katswi omo tẃi samung khlai twtwi se buino majra berwi tongo. Nwng Kaitor bai majra berjak glak da hwn?

⁴Eba khe Kaitor nono belai maya cháui tongmano, bo hama logwi tongmano, bo khá logwi tongmano nwng samung nangjak ya, hai da? Nono sumsok yakar rwna bagwi Kaitor nono maya nangjak kha, abo nwng saui man ya diba?

⁵Tamo khe nwng khá si ya, nwng kók khna ya. Abo bai’-no Kaitor jolijagwi sói khe yagul su-ui phunuknani salo teibo akol manna bagwi se nwng ba lama khlaiwi tong bla.

⁶Tamni hwn khe Kaitor janija samung khlaima tẃi’-no joto borokni manthaino rwnai.

⁷Baksa bororok samung kaham khlaiwi tongo, hakhe mwkhang chẃng rwjakna nai-o, kotor khlaijakna nai-o, kwthang tong phlaina nai-o, omo tẃi bororokno Kaitor mwthang phlainai.

⁸Baksa ba sakni kaham simi nai-o, bórok chamano khibiui cha yani lamano romo; omo tẃi bororokno Kaitor jolijagwi yagul sunai.

⁹Samung hamya khlainai borok jotono tekto rwjagwi sátokjaknai, Judairokbo sátokjaknai, buini bororokbo sátokjaknai.

¹⁰Phiya ba samung kaham khlainairokno Kaitor mwkhang chẃng rwnai, kotor khlainai, khá kwchang rwnai; bo Judairoknobo abo hai’-no khlainai, buini bororoknobo khlainai.

¹¹Tamni hwn ba Kaitor jotono’-no baksa khe nugo.

¹²Buini bororok Musini Kerong man ya; bórok Kerong man yaui sumsok khlaiwi komoro. Judairok Kerong man kha; bórok sumsok khlaiwi Kerongo tongma hai’-no majra berjago.

¹³Tamni hwn khe Kerongni kók saui manma bai simi bororok Kaitor bai kaham hwnwi romjak glak, Kerongo sama tẃi tong khe se kaham hwnwi romjaknai.

¹⁴Buini bororok Kerong man ya, hai phano bórok mungsa swk khlai phuru Kerongo sama hai’-no khlaijak khe hakhe bórok Kerong man ya phano bórokno bórokni kerong.

¹⁵Kerongo samani abo bórokni bwkha-o swijak tongo, bórok samung khlai thani’-no abo sijago, bórokni bwkha’-obo omo sói hwnwi sijago, tamni hwn ba bórokni bwkha uáisa uisu abono cha ya hwno, uáisa uisu abono cha-o hwno.

¹⁶Hakhe ang pírmani Kothoma Kahamo tongma haino Kaitor Jisu Khristoni yak tẃi bororokni bwkha-o tamo tong kwrwi potaliui nainani salo omo hai wngnai.

¹⁷Nini kók le tamo? Nwng sakno Judai hwn ta, nwng Kerongo khá beraui tongo, Kaitor chini bororokno naikhlai-o hwnwi nwng kók kotor sa-o;

¹⁸Kaitor tamo khlai di hwn abo nwng saui mano, phiya bubo cha bubo cha ya abo Kerongno swrwngma bai saui mano;

¹⁹nwng hai hwnwi saichung saichung uansugui tongo, ang se nuk yarokno dului tẃinai, ang se mwnakma-o tongnairokni chati, ang se si yarokno phrwngnai, phiya chwrairokno phrwngnai. Bebak elem bai kubuino Kerongo ang man súk kha hwnwi nwng uansugui tongo.

²¹Buino le nwng phrwngo tamo wngwi nwng sakno phrwng ya sla? “Ta khok di,” hwnwi nwng buino le hwno yang nwng sak da khogwi tong kha nai di?

²²“Buitali-buitala ta wng di,” hwnwi nwng sa-o yang nwng sak da wngwi tong kha nai di? Takjak mwtaino khulummano nwng naislerjago yang nwng sak da mwtainokni manwi khogwi tong kha nai di?

²³Chwng Kaitorni Kerong man kha hwnwi nwng kók kotor sa-o yang nwng sak da Kerongno swbaiwi Kaitorno lachi rwui tong kha nai di?

²⁴Elembago hai hwnwi sa-o, “Norok Judairokni bagwi se buini bororok Kaitorni mungwi hamya sa-o.”

²⁵Tumungno Kerongno rákhok khe nwng sakur rajakmani abo samung nang phai-o; phiya ba Kerongno rákhok ya khe nwng sakur rajakmani abo khlai ya hai’-no klai-o.

²⁶Buini borok sakur rajak ya phano tumungno Kerongo sama tẃi tong khe Kaitor bono sakur rajak hwnwi rom glak diba?

²⁷Abo bai’-no norok Judairok buini bororok bai majra berjaknai, tamni hwn ba norokni thani Kerong swijak tong phano, norok sakur rajak phano, norok Kerongno swbai-o, yang buini bororok le sakur rajak ya phano Kerongno rákhok bla.

²⁸Kók wng kha omo hai, sabo sói sói Judai? Sabo sói sói sakur rajak? Sakur rajak, saka saka Judai wngwi tongnai a borok ya.

²⁹Aboni slái bwkha bai Judai wngnai a borok se sói sói Judai, bono bwkha bai sakur rajak borok; abo Kaitorni Phola bai wngma se, a swijak Kerong bai wngma ya. Omo tẃi borok se Kaitor bai kaham hwnjaknai, borok bai ya.