Read Kok Borok RUM 3 Bible Online

RUM 3 - Kok Borok bible

RUM 3

¹Hakhe buini bororokni slái Judairok bwswk tamo man kha? Eba sakur rajak khe samung nango, hai da?

²Au, bebago’-no kwbángma’-no samung nango! Puilano Kaitor Judairokni yago bini kók kahamno yapharwi rw kha.

³Bórokni bere baksa hamya wng phano tamo wngnai? Omoni bagwi Kaitorbo hamya wngnai, hai da?

⁴Abo wngwi se man ya! Jotono tatal hwn phano Kaitor simi se kubui. Elembago hai hwnwi sama hai, “Nwng kók sa khe sói hwnwi phu se phunukjaknai, nwng buj thumjak khe nwng pa se páinai.”

⁵Phiya ba tumungno chwng samung hamya khlaimani abo Kaitorni samung kahamno teibo dak-dak khe phunuk khe chini tamo sana tong? Kaitor chwngno akol rw khe bo samung hamya khlai-o, hai da? (Ang oro borok uansukma hai’-no kók sa-o.)

⁶Abo wngwi se man ya! Kaitor hamya hwn khe bo bahai khe swngcharno sói khe buj thumnai sla?

⁷Phiya ba, tumungno ang tatal wngmani abo Kaitorni kubuino teibo dak-dak khe phunugui bini mwkhang chẃng rw khe ang tamo wngwi sumsok gwnang hwnwi majra berjaknai?

⁸“Hakhe phai di, kaham wngma bagwi samung hamya khlai anw,” hwnwi tamo wngwi hwn lai ya sla? Sói’-no baksa bororok ang katswi o kókno sa-o hwnwi ano hamya hwn lai kha! Bórok khlaima tẃi’-no bórok majra berjaknai.

⁹Hakhe tabuk, chwng Judairok buini bororokni slái kaham da tong? Thopsa phano ya! Ang thaichingo phunuk kha Judairokbo buini bororok hai’-no sumsokni yago klaijak.

¹⁰Omo Elembago hai hwnwi sama hai: “Kaham khoroksa phano kwrwi,

¹¹Sinai khoroksa phano kwrwi Kaitorno naituknai khoroksa phano kwrwi.

¹²Bebak borok Kaitorni lamani phérwi tháng bai kha, bórok bebak’-no lama koró bai kha; samung kaham khoroksa phano khlai li ya, katswi khoroksa phano ya.

¹³Bórokni búkhúkni kók wng kha thwinani lama se; phemlokna hwn khe bórokni bwslai phor phor, bórokni bwkhwchwi-o chibukni bis máng se;

¹⁴bórokni búkhúgo swraimung hamya máng kupulung.

¹⁵Buino leng rwna bai butharna hwn khe bórok kodo se;

¹⁶bórok thángma bwkhak dera rwui klango, digi-sigi phnangwi klango.

¹⁷Kwthana lamano bórok saui man ya,

¹⁸phiya Kaitorno kirina rwng ya.”

¹⁹Tabuk, chwng o kókno saui mano, borok yókna bagwi kók saui man ya tẃi khe, phiya bebak swngchar’-no Kaitor bai buj thumjakna tẃi khe Kerongo tongma joto a kókno Kerongni yago tongnairokni thani khlaijak kha.

²⁰Tamni hwn khe Kerongo tongmani abono khlaima bising tẃi khoroksa phano Kaitor bai kaham hwnwi romjak ya; Kerong wng kha borok sumsok khlaimano saui man rw-o.

²¹Phiya ba, tabuk Kaitor bahai khe bororokno kaham hwnwi rom a lama phunukjak kha; abo kerong rákhoknani kók ya, hai phano Kerong bai diyarirok aboni kók sa lang kha.

²²Jisu Khristono poito khlaima bising tẃi se Kaitor bororokno kaham hwnwi romo. Khristono poito khlainai bebak’-no Kaitor kaham hwnwi romo, tamni hwn khe oro kebo juda kwrwi;

²³bebak bororokno sumsok khlai kha, hakhe chẃngsajak Kaitor bai hakchal wng kha.

²⁴Phiya ba, Kaitor hai’-no khairokma bai bórok bebak’-no phiyóknaisa Khristo Jisu tẃi Kaitor bai kaham hwnwi romjaknai.

²⁵Khristo Jisu thwiwi bororokni sumsok nakarjakna lama wngna tẃi khe Kaitor bono rohor kha, hakhe bororok Khristono poito khlaiwi sumsok nakarjago. Kaitor bo sakno kaham hwnwi phunukna bagwi omo hai khlai kha. Kaitor khá logwi bororokni lái thángjak jorani sumsok rom li ya;

²⁶tamo khe tabukni o molo Kaitor bo sakno kaham hwnwi phunukna bagwi bororokni sumsok swkakna samung khlai kha. Omo hai kheno Kaitor bo sakno kaham hwnwi phunugo, phiya Jisuno poito khlainai jotono’-no kaham hwnwi rommanobo phunugo.

²⁷Hakhe kók kotor sanani chini tamo tong ba? Mungsa phano ya! Omo tamni bagwi? Omo chwng Kerong rákhokma bagwi da wng ba? I’nhi, omo chwng poito khlaima bagwi se wngo.

²⁸Chini kók khe omo hai, poito khlaima bising tẃi simi se bororok Kaitor bai kaham hwnwi romjago, Kerongo sama hai khlaima bising tẃi ya.

²⁹Kaitor ba Judairokni bagwi simi da Kaitor? Bo buini bororoknibo Kaitor ya diba? Au, bo buini bororoknibo Kaitor.

³⁰Kaitor kaisa se, hakhe poito khlaima bagwi bo Judairokno kaham hwnwi romnai, phiya buini bororokno khe poito khlaima bising tẃi kaham hwnwi romnai.

³¹Omo tẃi khe poito khlaima bai chwng Kerongno khibiui rw kha, hai da? I’nhi, thopsa phano ya! Aboni slái Kerongno se chwng songcha phiro.