Read Kok Borok RUM 4 Bible Online

RUM 4 - Kok Borok bible

RUM 4

¹Hakhe chini bosongni chuchu Abrahamni kók chwng tamo sanai? Bo bwswk tamo si lang kha?

²Tumungno bo khlaimani a samungni jarwi bo Kaitor bai kaham hwnwi romjakma te bo kók kotor saui phano man kha mun. Tamo khe Kaitorni bwskango bo kók kotor saui man ya.

³Elembago hai hwnwi sa-o, “Abraham Kaitorno poito khlai-o, hakhe bo poito khlaima bagwi Kaitor bono kaham hwnwi rom kha.”

⁴Samung tangnai borok bo manmani a rang haino manma ya, abo bo samung tangwi manma se.

⁵Samung khlaima kwrwi phano a borok tumungno majra gwnangno majra kwrwi hwnnai Kaitorno poito khlai khe bo abo hai poito khlaima bagwino Kaitor bono kaham hwnwi romo.

⁶Samung kwrwi phano Kaitor kaham hwnwi rommani a borok hamchajak hwnwi Daud o kók sa-o:

⁷“Kaitor bai samung hamya nakarjakrok bórok hamchajak sumsok kholopjakrok bórok hamchajak!

⁸Subrai bai sumsok romjak ya borok bo hamchajak!”

⁹Sakur rajakrok simi se omo hai hamchajak hwnwi Daud samani abo da o kók? I’nhi, sakur rajak yarokbo hamchajak. Chwng swkang’-no elembakni o kók sa-o, “Abraham Kaitorno poito khlai-o, hakhe bo poito khlaima bagwi Kaitor bono kaham hwnwi rom kha.”

¹⁰Abo bu phuru wng kha? Abo ba Abraham sakur rajak ya sini da wng, ulo da wng? Khlaijak ya sini wngo, ulo ya.

¹¹Bo ulo se sakur rajago, hakhe omo wng kha Abraham rajak ya sini’-no bo poito khlaima bagwi Kaitor bono kaham hwnwi rommano phunukma se. Hakhe abo baino Abraham wng kha sakur rajak ya phano Kaitorno poito khlaiwi bo bai kaham hwnwi romjaknai joto borokni bupha klai-o.

¹²Bo sakur rajakroknibo bupha, sakur rajakma bagwi simi ya, tamo khe sakur rajak ya sini chini apha Abraham poito khlaiwi tong langma haino bórokbo abo hai tong langma bagwi Abraham bórokni bupha.

¹³O swngchar Abrahamni wngnai hwnwi Kaitor Abraham bai bini bosongno kók rw kha. Abraham Kerongno rákhogo hwnwi o kók rwma ya, bo poito khlaiwi Kaitor bai kaham hwnwi romjakma bai se.

¹⁴Tamni hwn khe tumungno Kaitor rwna hwnwi kók rwmani abo Kerongno rákhoknairok simi man khe, hakhe bororok poito khlaimabo kusubu li ya, Kaitor kók rwmabo samung chúk li ya.

¹⁵Kerong tongma bai Kaitor bororokno jolijago, tamni hwn ba kerong kwrwi hwn khe aro kerong swbai-o hwnwibo kók ka glak kha mun.

¹⁶Kaitor rwna hwnmani abo poitono tẃiwi se kók rw-o, Kerong rákhoknairok simi abono manthai klai ya, Abraham hai poito khlainai bini bosongni bebak borokbo Kaitor hai’-no rwna hwnmano man sukna tẃi khe poitono tẃiwi se kók rw-o. Tamni hwn khe Abraham chini jotoni apha klai-o.

¹⁷Omo elembago hai hwnwi sama hai, “Ang nono dopha kwbángmani bupha snam kha.” Hakhe kwthwirokno mwthangnai, phiya kwrwi manwino kók bai taknai Abraham poito khlaimani a Kaitorni thani a kók rwmani abo sói se.

¹⁸Khatungjaknai kwrwi phuru phano Abraham khatungwi poito khlai-o, abo bai’-no “Nini bosong aswk kwbángma wngnai,” hwnwi elembago bono sama hai bo “Dopha kwbángmani bupha wng kha.”

¹⁹Bini umor nokha bisi sara ká twtwi wng kha, tamo khe bini bwsak kwthwi hai wngwi tháng kha hwnwi uansuk phano, phiya Sarano banji se hwnwi uansuk phano bo poito kwrak khe tongo.

²⁰Bo poito khlai ya wngwi Kaitor kók rwmano bwkha udru mudru wng ya; bo poito khlaima bai bwkha phan manjagwi Kaitorno lobo.

²¹Khlaina hwnwi kók rwmano Kaitor khlaiwi man súgo hwnwi bo bwkha butharjak.

²²Aboni bagwino poito khlaima bagwi Abraham “Kaitor bai kaham hwnwi romjak kha.”

²³“Bo kaham hwnwi romjak kha,” o kók bini saichungni bagwi simi swijak ya.

²⁴Chini Subrai Jisuno kwthwini mwthangwi tisanaino poito khlaiwi chwng kaham hwnwi romjaknairokni bagwibo o kók swijak kha.

²⁵Chini sumsokni bagwi bo thwina hwnwi rohorjak kha, phiya chwng Kaitor bai kaham hwnwi romjakna bagwi bo mwthangwi tisajak kha.