Read Kok Borok RUM 5 Bible Online

RUM 5 - Kok Borok bible

RUM 5

¹Tabuk poito khlaima bising tẃi chwng Kaitor bai kaham hwnwi romjak kha ba chwng chini Subrai Jisu Khristo tẃi Kaitor bai kwthaui man kha.

²Chwng poito khlaima bai Kaitor chwngno tabuk bo bai khairokjagwi tong thani-o tubu kha, hakhe Kaitorni chẃngsacha-o khopjak anw hwnwi chwng tongthok lai-o.

³Tekto rwjak phuru phano chwng tongthok lai-o, tamni hwn khe chwng saui mano tekto rwjakma bai chwng khá kolok wngo,

⁴khá lokma bai chwng kwrak wng su’-go, kwrak wngma bai chwng khatung-khaja wngo.

⁵Omo hai khatungwi chwng bwkha bái yaui tongo, tamni hwn khe Kaitor chwngno bwswk se hamjak abono bo chwngno rwmani Phola Kwthar tẃi chini bwkha-o kaham khe saui man rw kha.

⁶Chwng phan kwrwi wngwi tong phuru phano Khristo borok hamyarokni bagwi thwi kha, Kaitor chongmani a jora-o’-no thwi-o.

⁷Borok kahamni bagwi se khoroksa swk thwiwi man anw ba, borok sutrangni bagwi thwinani abo kisa kók ya.

⁸Tamo khe Kaitor chwngno bwswk se hamjak abo bo chwngno phunuk kha, tamni hwn khe chwng sumsok gwnang wngwi tong phuru Khristo chini bagwi thwi kha.

⁹Bini thẃini jarwi chwng tabuk Kaitor bai kaham hwnwi romjak kha; hakhe Kaitor jolijagwi yagul sunani yakni chwng bo bai phiyókjaknai o kók bwswk se kubui.

¹⁰Agi chwng Kaitorni kebengnai ari se, bini Sajla thwimani bising tẃi se bo chwngno bo bai kwtha rw-o. Tabuk chwng Kaitor bai kwtha rwjakma bagwi Khristo kwthang tongma bai chwng mwthangjaknai o kók bwswk se kubui.

¹¹Hakhe aswk bai simi ya kho; chwngno tabuk Kaitor bai kwtha rwnai chini Subrai Jisu Khristo tẃi chwng Kaitorno tẃiwi tongthogo.

¹²Borok khoroksani bising tẃi se swngcharo sumsok hap phai-o; bini a sumsokni bagwi’-no a borok ma thwi-o. Abo wngma bai’-no bebak bororok ma thwi bai-o, tamni hwn khe bebak bororok’-no sumsok khlai kha.

¹³Kerong rwjak ya sinibo o swngcharo sumsok tongo, phiya ba kerong kwrwi khe aro sumsokbo romjak ya.

¹⁴Tamo khe Adamni simi Musini mol jora bororok ma thwiwi máng phai kha; Kaitorni kók khna ya wngwi Adam sumsok khlaima hai sumsok khlai yarok suda ma thwiwi máng phai kha. Adam wng kha khoroksa phainai hwnmani a borok hai se.

¹⁵Tamo khe o khoroknwirok bórok a borokno borok ya, tamni hwn khe Kaitor ahaino rwmani abo Adam sumsok khlaima hai ya. A borok khoroksa sumsok khlaima bagwi borok kwbángma’-no ma thwi bai kha, tamo khe Kaitorni khairokmabo báng kugo, Jisu Khristo hwnwi a borok khoroksa khairokma bising tẃi Kaitor aswk bororokno hai’-no rwmani abobo báng kugo.

¹⁶Kaitor rwma bai a borok khoroksa sumsok khlaima phér laijak se, a khoroksa sumsok khlaima ulo bo “Majra gwnang” hwnjago, phiya aswk bororok kwbángma’-no sumsok khlaima ulo Kaitor khairogwi “Majra kwrwi” hwnwi rom kha.

¹⁷A borok khoroksani bagwi, bo sumsok khlaima bising tẃi bebak bororok ma thwi bai-o. Tamo khe Jisu Khristo hwnwi borok khoroksani yak tẃi khlaijakmani a samung bwswk se kotor! Kaitor bai belai khairokjagwi hai’-no kaham hwnwi romjaknairok bebakno Khristo tẃi kwplai wngwi thangwi tongnai.

¹⁸Hakhe tabuk, a sumsok kaisa bai bebak bororok majra phnangjakma hai’-no a samung kaham kaisa bai bebak bororok phiyógwi mwthangjak bai kha.

¹⁹Hakhe a borok khoroksa kók khna ya wngmani bai aswk bororok sumsok gwnang khlaijak bai kha, omo tẃi kheno tei borok khoroksa kók khnama bai aswk bororok Kaitor bai kaham hwnwi romjak bainai.

²⁰Samung hamya báng rwna bagwi se Kerong yapharjak si-o; tamo khe sumsok báng rwrwk khe Kaitorni khairokmabo teibo báng rwrwgo.

²¹Hakhe abo bai’-no sumsok bororokno butharwi kwplai wngwi tongma hai Kaitorni khairokmabo abo hai chwngno kaham khlaiwi kwplai wngwi tongo, abo chini Subrai Jisu Khristo tẃi chwngno kwthang tong phlaina lama-o tlango.