Read Kok Borok RUM 6 Bible Online

RUM 6 - Kok Borok bible

RUM 6

¹Hakhe chwng tamo sanai? Kaitor teibo khairok thung hwnwi chwng sumsok máng khlaiwi tong sinai, hai da?

²Abo wngwi se man ya! Chwng thwiwi sumsok bai kak lai kha, hakhe bahai khe chwng sumsok khlaiwi máng tongnai?

³Norok omono saui man ya da, chwng baptisma wngwi Khristo Jisu bai thansa wngma logi’-no bo thwi thanibo chwng baptisma wng kha.

⁴Chẃngsajak Aphani phan bai Khristo kwthwini mwthangwi tisajakma hai’-no chwngbo abo hai tongmung kwtal tongwi manna tẃi khe baptisma wngwi Khristo bai baksa thwiwi bo bai baksa phobjak kha.

⁵Bo thwima hai’-no thwiwi chwng bo bai thansa wng kha hwn khe bo mwthangwi tisajakma hai chwngbo mwthangwi tisajagwi bo bai thansa wngnai.

⁶Chwng omono saui mano; chwng tei sumsokni seleng khati ya tẃi khe sumsok khlaina muchungmano khibina bagwi chini tongmung kwcham Khristo bai baksa bini kruso khibijak kha.

⁷Khoroksa swk thwi khe bo sumsokni yakni phiyókjago.

⁸Chwng Khristo bai baksa thwi kha hwn khe bo bai baksa chwngbo thangwi bachanai hwnwi poito khlai-o.

⁹Tamni hwn khe chwng saui mano Khristo kwthwini mwthangwi tisajak kha, hakhe bo tei thwi phlai li ya kwthwirokni ha-o bono tei tlangwi man li ya.

¹⁰Bo thwimani abo wng kha sumsok bai kak laima se; bo uáisa bai’-no thwiwi sumsok bai kak lai kha hakhe bo tabuk thangwi tongmani abo Kaitorni thani se thangwi tongo.

¹¹Abo hai kheno norokbo thwiwi sumsok bai kak lai kha hwnwi rom di, phiya Khristo Jisu bai thansa wngwi Kaitorni thani kwthang hwnwi rom di.

¹²Norok sakni muchung tẃi tong ya tẃi khe sumsok norokni bwsak thwiblangno tẃiwi kwplai ta wng thung.

¹³Eba samung hamya-o phnangjakna bagwi norokni bwsakni mungsano phano sumsokni yago ta yaphar di. Aboni slái kwthwini mwthangwi tisajaknai bororok hai norok sakno Kaitorni yago rw di, hakhe samung kahamo phnangjakna bagwi norokni bwsakni mungsa kwrwi tẃi bini yago yapharwi rw di.

¹⁴Sumsok norokni bisingo kwplai ta wng thung; norok kerongni yago tong ya, khairokma gwnang Kaitorni yago se tongo.

¹⁵Hakhe chwng kerongni yago tong li yaui khairokma gwnang Kaitorni yago se tongo hwnwi sumsok khlainai, hai da? Abo wngwi se man ya!

¹⁶Norok omono saui man ya da, seleng khatina bagwi norok khoroksa swkni yago sakno yaphar khe norok a nokphangni seleng’-no wng súk kha, norok sumsokni seleng phano ma wngnai, abo bai borok ma thwi-o, eba kók khnanai seleng phano ma wngnai, abo bai borok Kaitor bai kaham hwnwi romjago.

¹⁷Tamo khe Kaitorno hambai ma rw-o! Salsa norok sumsokni seleng khatiui tongmani; hakhe ulo norok phrwngjakmani a kókno bwkha rwui khna súk kha.

¹⁸Norok sumsokni yakni phiyókjagwi kahamni seleng wng kha.

¹⁹Norok kaham khe si yani bagwi ang kók kwlai kwlaino sa-o. Salsa hamya khlaina hwnwi samung sitra bai samung hamyani yago norok sakno yaphar súgwi rw kha. Abo hai kheno tabuk samung kaham khlaina bagwi norok sakno kahamni yago yaphar súgwi rw di.

²⁰Sumsokni seleng khatiui tong phuru norok kaham bai kak laijak.

²¹Hakhe a samung khlaiwi norok tamo man kha tabuk lachijagwi tong ba? Abo tẃi samung khlai khe borok ma thwi-o.

²²Tabuk le norok sumsokni yakni phiyókjagwi Kaitorni seleng wng kha. Norok manmani abo wng kha norok bai yago yapharjagwi tongma se, abo bai’-no borok kwthang tong phlainai.

²³Sumsok khlai khe ma thwinai, tamo khe Kaitor hai’-no rwmani abo wng kha chini Subrai Khristo Jisu bai thansa wngma bising tẃi chwngno mwthang phlainai.