Read Kok Borok RUM 7 Bible Online

RUM 7 - Kok Borok bible

RUM 7

¹Takhukrok, ang sana naimano norok saui man súgo, tamni hwn khe norok bebakno kerongni kók saui man bai-o. Kwthang tong sak simi se kerongni kók ma khna-o.

²Rom di, khoroksa bwrwi káijakni kók. Kerong rwksaui bwsai thwi ya sak bo bwsai bai khajagwi ma tongo; tumungno bwsai thwi khe bono bwsai bai khaui tonmani a kerongni yakni yóknai.

³Hakhe abo bai’-no bwsai kwthang tong twtwi bo tei khoroksa borok bai tong khe bo buitali hwnjaknai; tamo khe bwsai thwi khe le bo aphuru a kerongni yakni yóknai, hakhe tei khoroksa chwla na phano bo buitali hwnjak li ya.

⁴Ani takhukrok, norokbo abo hai’-no. Norok thwiwi Kerong bai kak lai kha, tamni hwn khe Khristoni bwsago norokbo khopjago; tabuk norok kwthwini mwthangwi tisajaknai a borokni wng kha, chwngno Kaitorni samungo phnangna bagwi bo mwthangwi tisajak kha.

⁵Chwng sakni muchung tẃi tongwi phai phuru Kerong tongma bai sumsok khlaina muchungmarok chini bisingo tongo hakhe chwng samung khlaimani abo thwinani lama se tano.

⁶Hai phano tabuk chwng Kerongni yakni yókjak, tamni hwn khe salsa chwng khaui tonjakmani tabuk chwng thwiwi abo bai kak lai kha; chwng tabuk Kaitorni samung khlaimani abo swijak kerongno rákhoknani a lama kwcham ya, abo Pholani lama kwtal se.

⁷Hakhe chwng tamo sanai? Kerong bai sumsok a kókno kók se, hai da? I’nhi, abo ya! Sumsok bubo tẃi tamo abo Kerong’-no ano saui man rw-o. “Ta khámai di,” hwnwi Kerong sa ya wngma te khámaimani abo tamo ang saui se man glak kha mun.

⁸Kerong dagima bising tẃi sumsok ano podrepot khe khámai rwna lama manjak kha. Tamni hwn ba Kerong kwrwi khe sumsokbo kwthwi se.

⁹Kerong kwrwino ang salsa kwthang tongmani, phiya kerong dagima sók phai kheno sumsok thang chaui phai kha,

¹⁰hakhe ang thwi kha. Borokno mwthangna hwnwi rwmani a kerong dagima abo ano le bu se buthar si-o.

¹¹Kerong dagima bising tẃi sumsok lama manjagwi ano phemlok kha. Kerong dagima bising tẃi sumsok ano buthar kha.

¹²Hakhe tabuk, Kerong kwthar se, Kerong dagima hwn khebo kwbo kwthar, sobo sói, kabo kaham.

¹³Hakhe a kaham ano buthar kha, hai da? I’nhi, abo wngwi se man ya! Sumsok se ano butharo; sumsok bubo tẃi tamo abo phunukjakna hwnwi kahamni bising tẃi sumsok ano butharo. Hakhe kerong dagima bising tẃi sumsokno teibo hamya sitra khe phunukjak kha.

¹⁴Chwng saui mano Kerong wng kha Kaitorni aroni kók se; tamo khe ang le bahan bwthẃini borok, sumsokni seleng khatina bagwi phaljak.

¹⁵Ang khlaimano ang saui man ya, tamni hwn khe khlaina muchungmano ang khlai ya, phiya ba ang selengmano se ang khlai-o.

¹⁶Khlaina muchung ya phano a samung khlai khe abo Kerong sói’-no hwnwi ang gosima klai-o.

¹⁷Hakhe a samung khlainai sói’-no abo ang ya; ani bisingo tongnai sumsok se abo khlai-o.

¹⁸Ang saui mano ani bisingo kaham kwrwi; kók khe omo hai, ang borokjaba, ani bisingo kaham kwrwi. Tamni hwn khe samung kaham khlaina muchung phano ang khlaiwi man ya.

¹⁹Ang khlaina muchungmani samung kahamno ang khlai ya; abono karwi ang khlaina muchung ya samung hamyano se ang khlai-o.

²⁰Khlaina muchung ya phano ang a samung khlainai a borok ang ya, ani bisingo tongnai sumsok se khlai-o.

²¹Abo bai’-no ang ani bisingo o tongmungno nugo: ang samung kaham khlaina tháng khe samung hamya máng se khlaijago.

²²Ang Kaitorni kerongno tẃiwi khápang srango,

²³yang ani bwsago le ang tongmung juda se nogo a tongmung ani bwkha kaham hwnmani a kerongno kasu kasu-ui tongo. Omo ani bisingo tongnai sumsokni tongmungo ano khaui tono.

²⁴Ang bwswk se talikha hamya borok! O gaija langnai bwsakni ano sabo phiyóknai?

²⁵Chini Subrai Jisu Khristo tẃi Kaitor hambai rwjak thung! Hakhe ang omo tẃi borok, ang bwkha bai simi se Kaitorni Kerongni kók khnaui tongo, yang ang borok jaba sumsokni tongmungo tongo.