Read Kok Borok RUM 8 Bible Online

RUM 8 - Kok Borok bible

RUM 8

¹Tabuk Khristo Jisu bai thansa khe tongnairok bórok majra berjak li ya, bórok sakni muchung tẃi tong ya Pholani muchung tẃi se tongo.

²Tamni hwn khe Khristo Jisu bai thansa khlaiwi chwngno mwthangnai a Pholani phan sumsok khlaiwi ma thwimani yakni chwngno phiyók kha.

³Borok phan kwrwi wngma bai Kerong khlaiwi man ya samungno Kaitor khlai kha. Bo bini Sajlano rohorwi borokni bisingo tongnai sumsokno majra ber kha. Bini Sajla sumsok swkakna bagwi sumsok gwnang borok hai wngwi phai kha.

⁴Chwng sakni muchung tẃi tong yaui Pholani muchung tẃi tongnairok Kerongo kaham khe tong di hwnwi sama hai khe tongwi man suk’-na tẃi khe se Kaitor omono khlai-o.

⁵Sakni muchung tẃi tongnairok bórok sakni muchungma kókno uansugo, phiya Pholani muchung tẃi tongnairok bórok Pholani kókno uansugo.

⁶Sakni muchungma kókno uansukmani abo thwinani lama se, Pholani kókno uansukmani abo mwbo mwthangnai, khábo kwchang rwnai se.

⁷Hakhe abo bai’-no sakni muchungma kókno uansuknai borok bo Kaitorni kena ari wngo; tamni hwn khe bo Kaitorni kerong rákhok ya, sobo sói’-no bo abo rákhogwibo man ya.

⁸Sakni muchung tẃi tongnairok bórok Kaitorno khá ham rwui man ya.

⁹Tamo khe norok sakni muchung tẃi tong ya, Pholani muchung tẃi se tongo, tumungno Kaitorni Phola norokni bisingo tong khe o kók sói se. Khristoni Phola man ya borok bo le bini borok ya.

¹⁰Tamni khe Khristo norokni bisingo tong khe sumsokni bagwi norokni bwsak thwiwi tháng phano Kaitor bai kaham hwnwi romjakma bai Phola norokno mwthango.

¹¹Jisuno kwthwini mwthangwi tisanai Kaitorni Phola norokni bisingo tong khe hakhe Khristono kwthwini mwthangwi tisanai bo norokni bisingo tongnai bini Phola bai norokni bwsak thwiblangnobo mwthangnai.

¹²Hakhe takhukrok, chwng Pholani muchung tẃi tongthai klai-o, sakni muchung tẃi ya.

¹³Sakni muchung tẃi tong khe norok ma thwinai; phiya norokni sumsokni samungno Phola bai khibi khe norok thangnai.

¹⁴Kaitorni Pholani kók khnaui tongnairok bórok Kaitorni bwsa.

¹⁵Kaitor norokno rwmani a Phola norokno seleng snamwi haino hai kirima-o khiklai ya; abo wng yaui Phola norokno Kaitorni bwsa se snamo, hakhe Phola bai chwng Kaitorno, “Apha ani Apha,” hwnwi ringwi mano.

¹⁶Chwngno Kaitorni bwsa hwnwi Kaitorni Phola chini phola bai baksa sa-o.

¹⁷Chwng bini bwsa wngma bai bo bini bororokni bagwi khatiui tonmarokno chwngbo mannai; phiya Kaitor Khristoni bagwi khatiui tonmani abonobo chwng Khristo bai baksa mannai; chwng Khristo bai baksa sátokjak khe bo bai baksa’-no chẃngsacha khlaijaknai.

¹⁸Ang saui mano chwng tabukni o molo sátokjakmani omo chini thani phunukjakna hwnmani a chẃngsacha bai thopsa phano suthai kwrwi.

¹⁹Kaitor bu phuru bini bwsarokno phunukno bebak belai khatung-khaja khe abono naising laiwi tongo.

²⁰Tamni hwn ba sirisiti samung nang ya-o khiklaiwi tonjakmani abo bini muchungma bai wng ya, Kaitor muchungma bai se wngo. Hai phano o kók tongo, sirisiti salsa komornani yakni phiyókjagwi Kaitorni phiyókjak bwsarokni chẃngsacha-o khopjak anw.

²²Chwng saui mano chwrai achaina phuru bwrwirok bohok sajagwi kengaima hai’-no bebak sirisiti tabukbo kengaiwi ma tong kho.

²³Tamo khe sirisiti simi kengai ya. Kaitor rwna hwnmarokni bere swkang baira Pholano mannai chwngrokbo Kaitor bu phuru chwngno bini bwsa snamwi chini bwsakno phiyókno abono naising twtwi chwng bwkha-o kengai laiwi tongo.

²⁴Khatungma bai se chwng mwthangjagwi tongo; tamo khe tongma manwini bagwi khatungmani abo khatungma se klai ya. Tongma manwino sabo khatungwi tong?

²⁵Tamo khe chini thani kwrwi abo tẃi manwini bagwi khatung khe chwng khá logwi ma naisingnai.

²⁶Abo hai kheno Pholabo chwng tẃi phan kwrwirokno chuba-o, tamni hwn khe bahai khe suri sanna nang abo chwng saui man ya; Phola bo sak se Kaitorni thani chini bagwi kengaiwi kók sa-o, abo búkhúkni kók bai saui man ya.

²⁷Bororokni bwkha bisingno naichomnai Kaitor bo Phola khá chapmano saui mano; tamni hwn khe Phola Kaitorni thani bini bororokni bagwi Kaitorni muchungma tẃi kók sa-o.

²⁸Chwng saui mano Kaitor bebago’-no bono hamjaknairok bai baksa kahamni bagwi samung khlai-o, bo khá chabwi ringmani a bororok bai baksa kahamni bagwi samung khlai-o.

²⁹Aswk takhukrokni bisingo bini Sajla okra wngna tẃi khe Kaitor chongwi tonmani bororokno bini Sajla hai wngna hwnwi khagwi ton kha.

³⁰Kaitor bo khagwi tonmani a bororokno ring kha, hakhe bo ringmani a bororokno kaham hwnwi rom kha, hakhe bo kaham hwnwi rommani a bororokno bini chẃngsacha-o khop kha.

³¹Omorokno nugwi chwng tamo sanai? Kaitor se chini bwkhak hwn khe chwngno sabo kebengwi mannai?

³²Bo bini Sajlano phano narwk li ya, tamo khe chini bebakni bagwi bono rohor kha. Bini Sajlano se bo chwngno rw-o hwn khe bebakno’-no bo chwngno hai’-no rw glak diba?

³³Kaitorni chongjak bororokno sabo majra bernai? Kaitor bo sak baithang se bórokno majra kwrwi hwnwi sajak.

³⁴Hakhe sabo majra bernai? Khristo Jisu da? I’nhi, bo thwi kha, abo simi ya, bo mwthangwibo tisajak kha, hakhe Kaitorni yagra bwkhak tongwi chini bagwi kók sa-o.

³⁵Hakhe Khristo chwngno hamjakmani yakni chwngno sabo swkagwi mannai? Tekto rwui, bephasi-o khiklaiwi, sátogwi, ok khui rwui, biyalo khiklaiwi, dobo khiklaiwi, eba butharwi chwngno swkagwi da mano?

³⁶Elembago hai hwnwi sama hai, “Nini bagwi chwng sal brúm brúm butharjakna nai-o ratharjaknai merano khlaima hai khe chwng khlaijago.”

³⁷I’nhi, chwngno hamjaknaini bising tẃi chwng omo hai bebago’-no kwplaini slái teibo kwplai wngo!

³⁸Bo chwngno hamjakmani yakni chwngno mungsa phano swkagwi man ya hwnwi ang khá butharjak: chwng thwi phano, chwng thang phano bo chwngno hamjagwi tongo; suarirok phano mwtairok phano bini yakni chwngno swkagwi man ya; tabukbo man ya, ulobo man ya;

³⁹nokhani mungsa phano man ya, ha tolanibo mungsa phano man ya chini Subrai Jisu Khristo tẃi Kaitor chwngno hamjakmani yakni chwngno swkagwi mannai bebak sirisiti o mungsa phano kw se kwrwi