Read Kok Borok RUM 9 Bible Online

RUM 9 - Kok Borok bible

RUM 9

¹Ani o kók kubui se, ang Khristoni borok, hakhe kók tatal sa ya. Ani bisingo Phola Kwthar tongma bai ani bwkhabo o kókno kubui se hwnwi sa-o.

²Ani bororokni bagwi ang bwswk se khá khamwi ma tong, bwswk se khá yogwi ma tong! Bórok se ani bahan bwthẃi gwja!

³Ang bórokni bagwi hwn khe ang Kaitor bai phano swraijak thung, Khristo bai phano ta ma tong thung.

⁴Bórok wng kha Kaitorni chongjak bororok; bo bórokno bwsa snamwi bini chẃngsacha-o khop kha; bo bórokni thani uáinwi uáitham swmai tang kha, Kerongbo rw kha; bórok Kaitorno sói khe surina saui mano, Kaitor rwna hwnwi kók rwmarokno bórok man kha;

⁵bórok chuchusongni bosong, Khristobo borok wngwi bórokni bosongo achai kha. Bebakni bokhorok Kaitor lobjak máng tong thung! Amen.

⁶Kaitor kók rwmani abo nang phai li ya ang o kók sa ya, tamni hwn khe Israilrokni bere bebak’-no Kaitorni chongjak borok ya.

⁷Abrahamni bosongrokni berebo bebak’-no Kaitorni bwsa ya. Kaitor Abrahamno hai hwnwi sa kha, “Isakni bwsarok simi nini bosong hwnwi romjaknai.”

⁸Omo wng kha hai, Abrahamni nogo achainairokni bere bebak’-no Kaitorni bwsa ya; Kaitor kók rwmani tẃi achainairok bórok se bosong sói hwnwi romjago.

⁹Tamni hwn khe Kaitor hai hwnwi saui kók rwjak, “Ani phaina jora ang phai anw, aphuru Sara chwla bwsa man anw.”

¹⁰Aswk bai’-no pái ya kho, Rebekani bwsa khoroknwini bupha thansa, bórokni bupha chini chuchu Isak.

¹¹Bwsa khoroksano chongmani abo Kaitor khá chapma tẃino wng súgwi manna tẃi khe Kaitor Rebekano hai hwnwi sa kha, “Okra kusuni samung tangnai.” Bórok achai ya sini’-no, bórok kaham hamya mungsa khlai ya sini’-no Kaitor o kókno sa kha. Abo bai’-no Kaitor bórokno ringma bai se bórok chongjago, bórok samung khlaima bai ya.

¹³Omo Elembago hai hwnwi sama hai, “Ang Jakobno hamjago, Esauno khe ang hamjak ya.”

¹⁴Hakhe chwng tamo sanai? Kaitor borok hamya hai da? Thopsa phano ya!

¹⁵Bo Musino hai hwnwi sa kha, “Ang maya chána muchungma borokno ang maya chánai, ang khairokna muchungma borokno ang khairoknai.”

¹⁶Hakhe tabuk, Kaitor chongmani abo borok naimani eba samung khlaimani bai wng ya, Kaitor maya cháma bai simi se wngo.

¹⁷Elembago Pharaono hai hwnwi sa kha, “Nini bising tẃi ani phan phunukna hwnwi, phiya swngchar gwnangwi ani mungno saui man rwna hwnwi se ang nono bugra snamo.”

¹⁸Hakhe abo bai’-no Kaitor bo maya chána muchungma borokno maya chá-o, phiya bo kók khna ya khlaina muchungma borokno kók khna ya khlai-o.

¹⁹Hakhe norokni bere khoroksa swk ano hai hwnwi sa anw, “Omo hai hwn khe Kaitor bahai khe borokni cha yano rom sla? Kaitorni muchungmano sabo i’nhi hwnwi man?”

²⁰Tamo khe takhuk, Kaitorno una-pena sanai nwng sabo? Hani manwi bono taknaino “Nwng tamo wngwi ano omo hai khe tak?” hwnwi saui man ya.

²¹Kók wng kha omo hai, taknaisa bini muchung tẃi’-no hani manwi tagwi mano, hakhe a hani’-no hani manwi mungnwi tagwi mano, mungsa khe nang kukma samungni bagwi, tei mungsa khe hai’-no.

²²Kaitorni khlaimabo omo hai’-no. Bo jolijakmani abonobo phunukna nai-o, bini phanbo saui man rwna nai-o. Abo bai’-no bo jolijagwi sokomorna naimani bororokno bo belai khá logo.

²³Bo bini belai chẃngsachanobo phunukna nai-o, abo bo maya chámani chwngrokno kwbángma khe rw kha, bini chẃngsachano man rwna hwnwi bo tiyar khlaimani chwngrokno abo kwbángma khe rw kha.

²⁴Tamni hwn ba chwng wng kha bo bai ringjaknai bororok, Judairokni bisingni simi ya, buini bororokni bisingnibo.

²⁵Omo wng kha Hosea bijabo bo hai hwnwi samani, “Ani borok yarokno ang ‘Ani Bororok’ hwnnai; ang hamjak ya dophano ‘Ani khájani’ hwnnai.

²⁶Hakhe ‘Norok ani borok ya,’ hwnwi sajakmani aro’-no bórok Kaitor kwthangni bwsa hwnjaknai.”

²⁷Jisaiabo Israilrokni kókno hai hwnwi sa-o, “Israilrok twijlang rukungni hasingsa bángma swk báng phano bórokni bere borok kisicha se mwthangjaknai;

²⁸tamni hwn khe Kaitor dakti’-no uáisa bai’-no swngcharni bororokno yagul sunai.”

²⁹Omo Jisaia swkang’-no hai hwnwi sa langma hai, “Kwplaisa Subrai chwngno khoroknwi khoroktham borok klang ya wngma te chwng Sodom hai wng kha mun, chwng Gomora hai wngwi tong kha mun.”

³⁰Hakhe chwng tamo sanai? Kaitor bai kaham hwnwi romjakna nai ya buini bororok bórok poito khlaima bising tẃi bo bai kaham hwnwi romjak kha,

³¹yang Kaitor bai kaham hwnwi romjakna bagwi kerong naituknai a Israilrok le abo tẃi kerong man li ya.

³²Tamo wngwi? bórok khlaimani abo poitono tẃiwi ya, samungno tẃiwi se. Bórok a “Yakung thutai rwnai holongthai-o” usta khu phai bai kha.

³³Omo elembago hai hwnwi sama hai, “Nai di, ang Siyono holongthai dulsa bera-o, abo bororokno yakung thutai rwnai, abo bórokno khiklai bainai. Hai phano abono poito khlainai borok bo lachi glak.”