Read Kok Borok 1 KORINTH 10 Bible Online

1 KORINTH 10 - Kok Borok bible

1 KORINTH 10

¹Takhukrok, Musini logi thángnai chini chuchusongni kók ang norokno muitu khlaiwi rwna nai-o. Bórok bebak’-no chumui bai kobolwi tonjak kha, bórok bebak’-no kaham kwrwng khe Twijlang Kwchak lái kha.

²Chumui bai twijlango bórok bebak’-no Musini borok wngna bagwi baptisma wng bai kha.

³Bebak’-no Kaitorni aroni ruti podsa chá lai kha,

⁴bebak’-no Kaitorni aroni nungmung podsa nung lai kha. Bórok bai baksa thángnai Kaitorni aroni holongdapni se twi nung lai-o; a holongdap wng kha Khristo.

⁵Hai phano bórokni bere kwbángmano’-no Kaitor hamjak ya, hakhe bórokni mang kwthwirok hasing panthoro haino klaiwi tong bai kha.

⁶Bórok muchung tẃi chwngno samung hamya khlaina ta muchung thung, eba bórokni bere baksa takjak mwtairokno suriui tongma tẃi chwngno ta suri thung hwnwi se omo tẃirok chwngno hus khlaiwi rwma klai-o. Elembago hai hwnwi sama hai, “Bórok chána nungna achuk lai kha, ulo mwsana bacha lai kha.”

⁸Bórokni bere baksa lupcha wngma hai chwng lupcha wngthai kwrwi, abo hai wngwi salsani salono bórokni bisingo borok khorok nwichithamsai thwi bai kha.

⁹Bórokni bere baksa Kaitorno potaliui naima hai chwng Kaitorno potaliui naithai kwrwi, hai wngwi bórok chibuk bai sugui butharjak bai kha.

¹⁰Bórokni bere baksa hunu-hanai sama hai norok ta sa di, hai wngwi butharnai Suari bai bórok sokomorjak bai kha.

¹¹Buino phunukna bagwi se omorok bórokni sago klai-o, hakhe chwngno hus khlaiwi rwna bagwi se omorok swijago. Tamni hwn ba o mol pái twtwi-o se chwng tong lai-o.

¹²“Ang kaham khe bachaui tongo,” hwnwi uansuknai borok bo klai ya tẃi khe hus wng thung.

¹³Norok belokjakma hai joto borokbo abo hai kheno belokjak bai-o; hai phano Kaitor bo kók rwmano narwgo, hakhe norok soiwi manmani bára bo belok rw glak; norok belokjak phuru bo norokno soiwi manna tẃi khe rak rwnai, hakhe yóknani lama khlaiwi rwnai.

¹⁴Aboni bagwi ani khájani takhukrok, takjak mwtairokno surimano khibi di.

¹⁵Norok sinai hwnwi se ang norokno sa-o; ang samano norok’-no uansugui nai di.

¹⁶Chwng Kaitorno hambai rwmani a khuri kaham, abono nungma bai chwng bui bai baksa Khristoni thẃi manma klai ya diba? Chwng ruti swkakmani, abono cháma bai chwng bo bai baksa Khristoni bwsak manma klai ya diba?

¹⁷Ruti lepsa wngma bai chwng kwbángma phano bebak’-no bwsak kaisa, tamni hwn ba chwng jotono a ruti lepsano’-no chá-o.

¹⁸Israilrokni kók uansugui nai di; Kaitorni thani háyá-o ratharmano chánairok bórokbo a samungo tongma klai-o.

¹⁹Abono ang tamo sa? Ang a takjak mwtaino samung nango hwnwi da sa? Ang a takjak mwtaini thani barokjakmani abo samung nango hwnwi da sa?

²⁰I’nhi! Ang sama kók khe omo hai, poito kwrwirok ratharma khe Kaitorni thani rathar ya, mwtai hamyarokni thani se ratharo. Norok mwtai hamyarok bai thansa wngmano ang nai ya.

²¹Norok Subraini khuri bai mwtai hamyarokni khuri tháinwi nwi-o’-no nungwi man ya; norok Subraini tebul bai mwtai hamyarokni tebul tháinwi nwi-o’-no achugwi cháui man ya.

²²Chwng ba Subraino da músú rwna nai? Chwng ba bini slái da rak tamo?

²³“Chwng muchung tẃi’-no bebak samungno khlaiwi mano,” hwnwi bórok sa-o. Kók khe kubui’-no, hai phano bebak samung’-no kaham ya. “Chwng muchung tẃino bebak samungno khlaiwi mano,” hai phano bebak samung chwngno rak rw ya.

²⁴Khoroksa phano sakni kahamno ta nai thung, buini kaham se nai thung.

²⁵Norok hati-o phalmani bebak muihanrok khá sutrang khe mungsa phano sẃng yaui cháui mano.

²⁶Tamni hwn ba elembago hai hwnwi sama hai, “O swngchar Subraini, swngcharo tongmani bebak’-no Subraini.”

²⁷Khoroksa swk poito kwrwi borok bai chána kobokjagwi norok tháng khe chána rwmano’-no khá sutrang khe mungsa phano sẃng yaui chá di.

²⁸Phiya ba khoroksa swk “Omo takjak mwtaini thani barokjak,” hwnwi sa khe hakhe a sanaini bagwi tei khá kama bagwi abono ta chá di.

²⁹Ang sama kók khe, nini khá kama kókno sa ya, a sanaini khá kama bagwi se sa-o. Khoroksa swk hai hwnwi sa anw, “Hakhe bui khá kama bai ang tamo wngwi muchung tẃi khlai ya tongnai?

³⁰Ang Kaitorno hambai rwui chá khe tamo wngwi khoroksa swk ang hambai rwmani a chámungni bagwi ano hamya sa?”

³¹Hakhe norok mungsa swk samung khlai phano, chá phano nung phano, norok bebak samung Kaitor lobjakna tẃi khe khlai di.

³²Judairok, buini bororok tei Kaitorni motha kebo tekto nangjak ya tẃi khe tong di.

³³Ang tongma tẃino norokbo tong di; ang ani bebak samung bai jotono’-no khá ham rwna nai-o, bórok mwthangjak thung hwnwi se ang sakni kahamni bagwi khlai yaui bebakni kahamni bagwi se khlai-o.