Read Kok Borok 1 KORINTH 12 Bible Online

1 KORINTH 12 - Kok Borok bible

1 KORINTH 12

¹Tabuk, Phola Kwthar rwmani suarrokni kók sa anw. Takhukrok, ang norokno a suarrokni kók si rwna nai-o.

²Norok saui mano poito khlai ya sini norok lama koró koróui takjak mwtairokni yago klaiwi tongo, a takjak mwtairok le mungsa samungo se chúk ya.

³Hakhe norok si di, khoroksa phano Kaitorni Phola bai sa rwjagwi “Jisuno gaija thung!” hwnwi swraiwi man ya, phiya khoroksa phano Kaitorni Phola bai sa rwjak yaui “Jisuno Subrai,” hwnwi saui man ya.

⁴Phola rwmani suar podrepot tongo, tamo khe rwnaisa Phola a kaisa’-no.

⁵Kaitorni samung khlainani podrepot lama tongo, tamo khe samung khlaijaknai Subrai a kaisa’-no.

⁶Kaitorni samung khlainani phan podrepot, tamo khe jotono’-no samung khlainani phan rwnai Kaitor a kaisa’-no.

⁷Jotoni bisingo Phola tongmani abo bebakni kahamni bagwi mungsa ya khe mungsa khe phano sijago.

⁸Khoroksano Phola kók elemni sa rw-o, tei khoroksano a Phola’-no sima-nukma kók sa rw-o.

⁹Khoroksano a Phola’-no poito khlai rw-o, tei khoroksano bo hamya ham rwna phan rw-o.

¹⁰A Phola khoroksano ha-o nuk ya samung khlaina phan rw-o, tei khoroksano Kaitorni kók sana suar rw-o; tei khoroksano podrepot suarno Kaitorni Phola rwmani da sininani suar rw-o, tei khoroksano hámung sini ya kók sanani suar rw-o, tei khoroksano hámung sini ya kókno swbaiwi sanani suar rw-o.

¹¹Hai phano a Phola kaisa’-no omo tẃirok bebak’-no rw-o; bo muchung tẃi khoroksa khoroksano podrepot suar rw-o.

¹²Khristo wng kha bedek bupra gwnang bwsak hai. Bedek bupra kwbángma tong phano bwsak le kaisa se.

¹³Abo hai kheno Judairokbo, buini bororokbo, selengrokbo, seleng yarokbo chwng bebak’-no bwsak kaisa wngna bagwi Phola kaisa bai baptisma wng bai kha, phiya chwng bebak’-no Phola kaisa’-no khanjak kha.

¹⁴Bwsak wng kha bedek kaisa bai snamjak ya, bedek kwbángma bai snamjak.

¹⁵Yakung “Ang yak ya, aboni bagwi’-no ang bwsakni ya,” hwnwi sama bai bo bwsakni wng ya wng ya.

¹⁶Phiya khunju “Ang mokol ya, abo bai’-no ang bwsakni ya,” hwnwi sama bai bo bwsakni wng ya wng ya.

¹⁷Bebak bwsakno mokol wng bai khe bo bahai khe khnanai? Phiya bebak bwsak khunju wng bai khe bo bahai khe báhai mannai?

¹⁸Tamo khe Kaitor bo muchung tẃi’-no bebak bedekno kaisa kaisa khe bwsago thepaui rw kha.

¹⁹Bebagwi bedek kaisa susuk wngma te bahai khe bwsak wng kha mun.

²⁰Tamo khe bedek kwbángma, bwsak le kaisa.

²¹Hakhe mokol yakno “Ang nono samung nang ya,” hwnwi saui man glak. Bokhorokbo yakungno “Ang nono samung nang ya,” hwnwi saui man glak.

²²Tamo khe chwng kebel hwnmani a bedekrok se teibo samungo nango.

²³Phiya chwng samung nang ya hwnmani a bedekrokno kaham khe nai kugo nuk kugo. Bwsakni bedek naithok yarokno kaham khe naijak kugo,

²⁴chini bwsakni bedek naithokrokno abo hai khe naina nang ya. Sak nang ya bedekrokno kotor khe ma nukna tẃi khe Kaitor bwsakni bedekrokno thepa bai kha.

²⁵Omo tẃi khe bwsakni bisingo phér laima kwrwi, tamo khe bebak bedekrok’-no kaisa tei kaisano baksa khe nai lai-o.

²⁶Bwsakni bedek kaisa sajak khe abo bai baksa tei bebak’-no sajago; phiya bedek kaisa kaham hwnjak khe tei bebak bedek’-no abo bai baksa tongthokjago.

²⁷Hakhe norok wng kha Khristoni bwsak, khoroksa khoroksa wng kha bini bedek.

²⁸Hakhe Kaitor motha-o chonghorrokno bwskango ton kha, aboni ulo khe diyarirokno, aboni ulo khe phrwngnairokno ton kha; abo hai khe’-no ha-o nuk ya samung khlainairokno, hamya ham rwnani phan rwjaknairokno, buino chubanairokno, nainai-nuknairokno phiya hámung sini ya kók sanairokno ton kha.

²⁹Jotono da chonghor? Jotono da diyari eba khe phrwngnai ba? Jotono da ha-o nuk ya samung khlai ba?

³⁰Jotono da hamya ham rw ba? Jotono da hámung sini ya kók sa ba? Jotono da hámung sini ya kók swbaiwi sa ba?

³¹Nangmani suarrokni bagwi se norok khatung di. Tabuk ang lama kaham kukno norokni thani phunugo.