Read Kok Borok 1 KORINTH 13 Bible Online

1 KORINTH 13 - Kok Borok bible

1 KORINTH 13

¹Ang podrepot kók bai kók saui man phano, suarirokni kók bai suda kók saui man phano, ang buino hamjak ya hwn khe ang kók samani abo keche-keche pungnai bel eba khe uang uang pungnai cheuang hai se klai-o.

²Ang kók diyari sanani suar tong phano, ang bebak’-no si phano, ang bisingni bebak kók saui man phano, hatháirokno nornani abo tẃi poito ani tong phano, ang buino hamjak ya hwn khe ang kusu buya.

³Ani tong kwrwi kwrwirokno rw bai phano, sók di hwnwi ani bwsakno rw phano, ang buino hamjak ya hwn khe abo ani mungsa-o chúk ya.

⁴Hamjaknai borok bo khábo logo, khábo khairogo; hamjaknai borok bo mubo músú ya, kók kotorbo sa ya, kubo kung chuk ya;

⁵hamjaknai borok lachimasingcha khlai ya, sakni kaham simi nai ya, kisa bai joli ya; hamjaknai borok hamya khlaijakmarokno bwkha tẃi ya;

⁶bo samung hamyani bagwi tongthokjak ya, kubui bai se tongthokjago.

⁷Hamjaknai borok bwkha bái phlai ya; bo poito khlai máng tongo, khatung máng tongo, khá lok máng tongo.

⁸Hamjakmani abo thak ya; kók diyari samani abo srapsani bagwi se, hámung sini ya kók samani abo tong glak, kók elemni tongmani abobo kwmanai.

⁹Tamni hwn ba chwng kisicha se si-o, chwng kók diyari samabo kisicha se;

¹⁰hakhe a sói-sói phaiwi sók phai khe a kisicha tongmarok kwmaui thángnai.

¹¹Ang chwrai phuru chwrai hai’-no kókbo sa-o, chwrai hai’-no uabo uansugo, chwrai hai’-no sibo si-o; tabuk torwi ang tei chwraini tongmung tong li ya.

¹²Tabuk chwng nukmani abo aina hamya naima hai; aphuru chwng dadak-didik khe nuknai. Ang tabuk simani abo kisicha se, aphuru Kaitor tabuk ano saui manma tẃi’-no angbo bebak’-no saui man anw.

¹³Poito khlaimani, khatungmani, hamjakmani, o mungtham tong phlainai, tamo khe abórokni bere hamjakma’-no tor kugo.