Read Kok Borok 1 KORINTH 14 Bible Online

1 KORINTH 14 - Kok Borok bible

1 KORINTH 14

¹Hakhe buino kaham khe hamjakna nai di. Phola rwmani suarrokni bagwi se norok khatung di, aboni bere se Kaitorni kók sanani suarni bagwi se khatung di.

²Hámung sini ya kók bai kók sanai borok bo bororokno sama klai ya, Kaitorno se sama klai-o, tamni hwn ba bo kók samano khoroksa phano romwi man ya. Bo Phola bai se bisingni kókno sa-o.

³Phiya ba Kaitorni kók sanai borok bo bororokno sama klai-o, bo abo bai khá rak rw-o, khá srang rw-o tei khá kwchang rw-o.

⁴Hámung sini ya kók bai kók sanai bo sakno simi se khá rak rw-o, Kaitorni kók sanai khe bo mothani bebakno’-no rak rw-o.

⁵Norok bebak’-no hámung sini ya kók bai kók sa thung abo’-no ang nai-o, phiya norok bebak’-no Kaitorni kók saui man thung abo’-no ang teibo nai-o. Mothani bebak’-no rak rwna bagwi hámung sini ya kók samano khoroksa swk swbaiwi sanai kwrwi khe a hámung sini ya kók sanaini slái Kaitorni kók sanai se samung nang kugo.

⁶Abo hai khe takhukrok, ang norokni aro phaiwi hámung sini ya kók bai kók sa phai khe ang norokni tamo samungo chúknai? Ang norokno Kaitorni bisingni kók tháisa phano si rw ya khe, eba kisa phano saui man rw ya khe, eba kók diyari tháisa phano sa ya khe, eba kisa misa phrwng ya khe norokni mungsa phano wng glak.

⁷Phiya snamjak tamjaknai manwirok sumui phano eba chongpreng phano srai-srai khe pung ya khe abo tamni khorang bahai khe saui mannai?

⁸Totro srai-srai khe pung ya khe sabo chobani bagwi tiyar wngnai?

⁹Abo hai’-no norok hámung sini ya kók bai kók samani abo srai-srai wng ya khe sabo norok samano romwi mannai? Norok kók samarok nokbar bai baksano kobonwi thángnai.

¹⁰O swngcharo kwbángma juda juda kók tongo; abórok kaisa phano kók cha ya wng ya.

¹¹Phiya khoroksa swk samani kókno ang romwi man ya hwn khe a kók sanai ani thani buini borok wngma klainai, angbo bini thani buini borok wngma klainai.

¹²Norok Phola rwmani suarrokni bagwi khatung kha hwn khe mothano rak rwnai abo tẃi suarrokno teibo samungo phnangna nai di.

¹³Hakhe hámung sini ya kók bai kók sanai borok bo kók samano swbaiwi saui mannani suarni bagwi suri santhai.

¹⁴Ang abo tẃi kók bai suri san khe ani phola suri san phano ani bwkha aro kwrwi.

¹⁵Hakhe ang tamo khlaithai? Ang ani phola baibo suri sannai, bwkha baibo suri sannai; ang ani phola baibo rwchapnai, ani bwkha baibo rwchapnai.

¹⁶Nwng Kaitorno nini phola bai simi se hambai rw khe nwng hambai rw phuru aro borok bángla tongnai bahai khe “Amen” hwnnai? Nwng samano bo romwi man ya.

¹⁷Nwng Kaitorni thani kaham khe hambai rw phano a borok bánglani mungsa phano chúk ya.

¹⁸Ang norok bebakni slái teibo hámung sini ya kók bai kók sa-o hwnwi ang Kaitorno hambai ma rw-o.

¹⁹Tamo khe buino phrwngna bagwi motha suri lai thani ang hámung sini ya kók chisai samani slái romwi mannai abo tẃi kók tháiba sama se chajak kugo.

²⁰Takhukrok, norok chwrai hai khe ta uansuk di; samung hamyani bagwi chwrairok hai wng di, tamo khe okrarok hai khe uansuk di.

²¹Elembago hai hwnwi swijak tongo, “Ang o bororokni thani buini kók sanairokni bising tẃi kók sanai hwnwi Kaitor sa-o. Ang buini bororokni khúk tẃi kók sanai hai phano bórok ani kók khna glak.”

²²Hakhe tabuk, hámung sini ya kók samani abo poito kwrwirokno phunukma se, poito khlainairokno ya; phiya Kaitorni kók samani abo poito khlainairokno phunukma se, poito kwrwirokno ya.

²³Motha kuthum lai phuru jotono hámung sini ya kók bai sana panji lai khe aro khoroknwi khoroktham borok bángla phano eba khe poito kwrwi phano hap phai khe bórok norokno kobor hwn glak da?

²⁴Phiya bebak’-no Kaitorni kók sa khe aro poito kwrwi phano eba khe borok bángla phano hap phai khe bo khnamarok bai bo sakno sumsok gwnang hwnwi saui man anw. Bo khnamarok bai’-no majra berjak anw,

²⁵bini khá bisingni kók sijak anw, hakhe bo khulumui “Norok bai se kubui Kaitor tongo,” hwnwi gosiui Kaitorno ma surinai!

²⁶Takhukrok, ani kók khe omo hai: Norok surina kuthum lai phuru khoroksa rwchabo, tei khoroksa phrwngo, tei khoroksa Kaitorni aroni bisingni kókno si rw-o, tei khoroksa hámung sini ya kók bai kók sa-o, tei khoroksa hámung sini ya kók bai kók samano swbaiwi sa-o. Abórok bebak’-no mothano rak rwna bagwi ma khlaithai.

²⁷Hámung sini ya kók bai kók sana khe khoroknwi khoroktham swk’-no sa thung, aboni bára tei ta sa thung; bórok khoroksa khoroksa khe sa thung hakhe tei khoroksa swk a samano swbaiwi sa thung.

²⁸Phiya ba aro swbaiwi saui mannai khoroksa phano kwrwi khe hámung sini ya kók bai kók sanai borok bo motha kuthum lai thani siring siring tong thung, bo khá bising bising simi Kaitor bai kók sa thung.

²⁹Kaitor bai kók rwjaknai khoroknwi khoroktham simi kók sa thung, aphuru teirok bórok samano uansugui nai thung.

³⁰Phiya aro achugwi tongnairokni bere khoroksa swk Kaitorni aroni kók man khe, hakhe a kók saui tongnai thak thung.

³¹Norok bebak’-no swrwngwi khápang srangna tẃi khe norok khoroksa khoroksa khe bebak’-no Kaitorni kók saui mano.

³²Kaitorni kók sanai borok bo khúk narwgwi kók sa thai.

³³Tamni hwn ba Kaitor chwngno ubrum-jabrum tongna bagwi ring ya, kwchang kwchang khe tongna bagwi se ringo. Kaitorni bororokni bebak motha-o wngma hai

³⁴motha kuthum lai thani bwrwirok siring siring tongthai. Bórok kók sa thai kwrwi; Judai Kerongo sama hai bórok kók khnaui tong thung.

³⁵Bórok mungsa swk phano sina muchung khe bórok nogo bwsaino sẃng thung. Bwrwirok motha kuthum lai thani kók samani abo lachimasingcha se.

³⁶Norokni bising tẃi da Kaitorni kók phai gra? Eba norokni thani simi da Kaitorni kók phai?

³⁷Khoroksa swk bo Kaitorni kók sanai hwn khe, eba khe Phola rwmani suar tongo hwn khe, ang swimani omo Subraini kók hwnwi si thung.

³⁸Bo o kók khna ya khe norok bini kóknobo ta khna di.

³⁹Aboni bagwi takhukrok, Kaitorni kók sana khatung di, hai phano hámung sini ya kók ta sa di hwnwi ta hwn di.

⁴⁰Norok joto samungno sói khe kaham khe ma khlaithai.