Read Kok Borok 1 KORINTH 15 Bible Online

1 KORINTH 15 - Kok Borok bible

1 KORINTH 15

¹Takhukrok, ang norokni thani pírmani a Kothoma Kahamno muitu khlaiwi rwna nai-o, norok abono khna kha, phiya tabukbo abono poito khlaiwi kwrak khe tongo.

²Ang norokno pírmani a Kothoma Kahamno norok kwrak khe romwi tong khe mwthangjaknai, wng ya khe norok poito khlaimani abo kusu buya.

³Ang manmano norokno yapharwi rw kha, abo’-no kók kotor kuk: Elembago swijak tongma hai’-no Khristo chini sumsokni bagwi thwi kha;

⁴bo phobjak kha, hakhe Elembago swijak tongma hai’-no salthamni salo mwthangwi tisajak kha;

⁵bo Pitor bai nukjak kha, phiya ulo chonghor chiknwirok bai nukjak kha.

⁶Ulo khe bo uáisa bai ba-rani slái kwbángma sagrirok bai nukjak kha, bórokni bere baksa thwi phano kwbángma’-no kwthang tong kho.

⁷Ulo khe bo Jakob bai nukjak kha, aboni ulo bebak chonghorrok bai nukjak kha.

⁸Jotoni slái ulo bo ang baibo nukjak kha, ang jora ya-o achainai, hai phano bo ang baibo nukjak kha.

⁹Ang bebak chonghorrokni slái kusu, Kaitorni mothano sátokma bai ang chonghor suda hwnjakna chúk ya.

¹⁰Hai phano Kaitor khairokma bai ang ba ang’-no tongo, bo ano khairokmani abo samung nang ya wng li ya. Tamo khe ang tei chonghorrokni slái teibo samung khlai kuk kha, abo sói ang khlaima ya, Kaitor khairogwi ani yak tẃi samung khlaiwi tongo.

¹¹Hakhe ang pír phano bórok pír phano, chwng bebak’-no o kókno’-no píro, norokbo abono’-no poito khlai-o.

¹²Tabuk, chwng pírmani kók wng kha, Khristo kwthwini mwthangwi tisajak kha; hakhe norokni bere baksa baksa bahai khe kwthwirok mwthangwi tisajak glak hwnwi sa laiwi man?

¹³Abo kubui hwn khe Khristobo mwthangwi tisajak ya;

¹⁴phiya Khristo mwthangwi tisajak ya hwn khe chinibo mungsa phano pírna kwrwi, norokbo mungsa phano poito khlaina kwrwi.

¹⁵Teibo chwng Kaitorni mungwi tatal se sama klai-o, tamni hwn ba bo Khristono mwthangwi tisa kha hwnwi chwng bini mungwi sa kha, yang kwthwirok mwthangwi tisajak ya a kók kubui hwn khe bo Khristonobo mwthangwi tisa ya.

¹⁶Kwthwirok mwthangwi tisajak ya hwn khe Khristobo mwthangwi tisajak ya,

¹⁷phiya Khristo mwthangwi tisajak ya hwn khe norok poito khlaimani abo kusubu ya, norok tabukbo sumsokni bagwi komorwi tong lai kho.

¹⁸Omo tẃi hwn khe Khristono poito khlaiwi thwinairokbo komor bai kha.

¹⁹Chwng Khristoni bagwi khatungmani abo o swngcharo tong phuruni bagwi simi hwn khe hakhe o swngcharni tei bororokni slái chwng talikha hamya kuk.

²⁰Kók kubui khe omo, Khristo kwthwini mwthangwi tisajak kha, mwthangwi tisajaknai kwthwirokni bere bo wng kha tháiskangni bwthái.

²¹Borok khoroksani bising tẃi’-no bororok ma thwi bai-o, abo tẃi kheno borok khoroksani bising tẃi’-no bororok thangwi bachanai.

²²Bebak borok Adam bai thansa wngma bising tẃi ma thwi bai-o, abo tẃi kheno bebak borok Khristo bai thansa wngma bising tẃi mwthangwi tisajaknai.

²³Tamo khe jotono bini ulo bo, bini ulo bo khe mwthangwi tisajaknai; jotoni slái swkang Khristo tisajak kha, ulo Khristo phai phuru bini bororok tisajaknai.

²⁴Aphuru khe mol pái sinai; Khristo bebak bokhorokrokno, bebak hodarokno tei bebak mwtairokno mechenwi Bupha Kaitorni yago hano yapharnai.

²⁵Kaitor bebak kena arirokno mechenwi bini yakung yaphangno khiklai ya sak Khristo bokhorok wngwi ma tongnai.

²⁶Jotoni slái ulo bororokno butharnai a kena ari mechenjaknai.

²⁷Elembago hai hwnwi sa-o, “Kaitor bebakno’-no bini yakung yaphango khiklaiwi ton kha.” “Bebakno’-no” o kók hwn phano Khristoni yago bebakno tonnai Kaitorbo aro khopjak ya omo dak-dak khe sijago.

²⁸Khristoni yago bebak’-no tonjak bai khe Sajlabo bini yago bebak’-no tonnai a Kaitorni yago sakno tonnai; hakhe Kaitor bebakni bokhorok wng suknai.

²⁹Tabuk, kwthwirokni mungwi baptisma wngnairok bórokni tamo wngnai? Bórok tamono khatungnai? Kwthwirok mwthangwi tisajak ya hwn khe bórok tamo wngwi kwthwirokni bagwi baptisma wng lang?

³⁰Phiya chwng ba tamni bagwi tong tẃi chá tẃi thwina klai?

³¹Takhukrok, sal brúm brúm ang thwinani yago klai-o! Chini Subrai Jisuni tẃi ang norokni bagwi kung chukma bai o kókno sa-o.

³²Episo ang bolongni yabrwirok bai nang laimani abo bororokni uansukma tẃi nang lai kha hwn khe ang tamo mannai? Phiya kwthwirok mwthangwi tisajak ya hwn khe phai di, kógo tongma hai’-no “Chwng khwna’-no thwinai ba chá lai si anw nung lai si anw.”

³³Norok lama ta koró di. “Logisong hamyarok bai tong khe borok kahambo hamya wngo.”

³⁴Norok sicha si di, sumsok ta khlai si di, norokni bere baksa Kaitorno sini ya tongo, ang o kók samano norokni lachimasingcha se.

³⁵Khoroksa swk hai hwnwi sẃng anw, “Kwthwirok bahai khe mwthangwi tisajaknai? Bórokni mang ba bubo tẃi wngnai?”

³⁶Nwng mungsa si ya! Nwng ha-o bwchlwi kái khe abo thwi ya sak bumuk persa ya.

³⁷Gomni bwchlwi phano eba khe mungsa swkni bwchlwi phano nwng ha-o bwchlwi káimani abo haino bwchlwi, abo torjak buphang ya.

³⁸Kaitor bini muchung tẃino a bwchlwino sakduk rw-o; bo joto bwchlwino janijani sakduk rw-o.

³⁹Bebak hama gwnangni’-no bahan podsa ya; bororokni bahan podsa, yabrwirokni bahan podsa, toksa-toktẃirokni bahan podsa, phiya árokni bahan tei podsa.

⁴⁰Nokhani manwirokbo tongo, swngcharni manwirokbo tongo. Nokhani manwirokni naithokma podsa, swngcharni manwirokni naithokma tei podsa.

⁴¹Salni naithokma podsa, talni naithokma tei podsa, athukirirokni naithokma tei podsa, phiya athukirirokni berebo naithokma juda juda.

⁴²Kwthwirok mwthangwi tisajak phurubo abo haino wngnai. Phobjakmani mang abo thwiblang, phiya mwthangwi tisajak khe abo thangblang wngnai.

⁴³Phobjakmani mang abo kebel mungsa chúk ya, phiya mwthangwi tisajak khe abo kwrakbo wngnai, chẃngsachabo wngnai.

⁴⁴Phobjakmani mang abo bahan-bwthẃini mang, mwthangwi tisajak khe abo pholani mang wngnai. Swngcharni mang tong khe pholani mangbo ma tongnai.

⁴⁵Tamni hwn ba elembago hai hwnwi sa-o, “Yaphangni a borok Adam hama gwnang khe snamjak kha”; phiya ulni Adam wng kha mwthangnai Phola.

⁴⁶Phola swkang phai ya; bahan-bwthẃi se swkang phai-o, aboni ulo se phola phai-o.

⁴⁷Yaphangni a Adam o hani hadlwi bai se snamjago; ulni Adam khe Subrai, chuknohani phai-o.

⁴⁸O swngcharni bororok khe ha bai snamjak a borok hai; phiya chuknohani bororok khe chuknohani phainai a borok hai.

⁴⁹Chwng ha bai snamjak a borokno solma hai’-no chwng chuknohani a borokno solnai.

⁵⁰Takhukrok, ang sama khe omo hai, bahan-bwthẃi gwnang abo Kaitorni ha-o ha banta man glak, thwiblang abo thangblang wngwi man ya.

⁵¹Bisingni o kókno khna di: chwng bebak’-no thwi glak, tamo khe páithakni salo totro pung khe’-no uáisa bai mokol mukphilik kaisa bai’-no chwng bebak’-no mul philjak bainai. A totro pung khe’-no kwthwirok thangblang khe mwthangwi tisajak bainai, phiya chwngbo bebak’-no mul philjak bainai.

⁵²

⁵³Thwiblang bo thangblangno ma chumnai, thwinai bo thwi phlai yano ma chumnai.

⁵⁴Hakhe thwiblang bo thangblangno chum khe, phiya thwinai bo thwi phlai yano chum khe elembago samani o kók nang phainai, “Butharnai mechenjagwi sokomorjak kha!”

⁵⁵“O Butharnai, nwng pa de pái si? O Butharnai, nini chwknani phan buko?”

⁵⁶Butharnai sumsokni bagwi se chwknani phan mano, phiya sumsok Kerongni bagwi se phan mano.

⁵⁷Subrai Jisu Khristo tẃi chwngno kwplai khlainai Kaitorbo hambai rwjak thung!

⁵⁸Aboni bagwi khájani takhukrok, sói kwrak khe tong di. Norok Subraini mungwi yak thak ya khe samung khlaiwi tong di, tamni hwn ba norok saui mano Subraini mungwi samung khlaimani abo norok yak bukcha khlaijak glak.