Read Kok Borok 1 KORINTH 16 Bible Online

1 KORINTH 16 - Kok Borok bible

1 KORINTH 16

¹Tabuk Judia tongnai Kaitorni bororokni bagwi rang khangnani kók ang sa anw: Galatiani motharokno ang khlai di hwnwi hwnma hai’-no norokbo khlai di.

²Norok jotono ajima tẃi’-no Kaitho Sal brúm brúm rang kisa khaliui narwgwi tisaui ton di. Hakhe ang phai phuru khe rang khangna nang glak.

³Ang phai bai khe norok chongmani bororokno sini rwna bagwi kóktun swiwi bórokni yak tẃi Jerusalemo norok rwmani rangno tun rw hor anw.

⁴Ang thángmani abo kaham hwn khe bórok ani logi thángnai.

⁵Ang Makidonia tẃi norokni thani thángnai, tamni hwn ba ang Makidonia kwchar tẃi thángnai.

⁶Ang norok bai kisa tongwi thotok, masing kusungsa phano wngna tongo. Hakhe norok aphuru ang thángna hwnma’-ono tun horwi man anw.

⁷Ang norok bai lama-o muktang-mukting khe malaina muchung ya; Kaitor ano tong rw khe norok bai kisa tongna bagwi khatungo.

⁸Hai phano Pentikos Sal sók phai ya sak ang oro Episo tongnai.

⁹Oro kena ari báng phano nangmani samung khlaina lama kotor tongo.

¹⁰Timothi norokni thani phai khe bono kaham khe yachak sók di, tamni hwn ba bobo ang hai’-no Subraini samung khlaiwi tongo.

¹¹Khoroksa phano bono sak nang ya ta wng di, bo ani thani kiphilwi phaiwi manna tẃi khe norok bono kwchang kwchang khe tun rw hor di; bo takhukrok bai baksa kiphilwi phai anw hwnwi ang naisingwi tongo.

¹²Tabuk, takhuk Apoloni kók sa anw. Ang bono tei takhukrok bai khe norok bai malai di hwnwi sa sa-o, hai phano tabuk thángna muchungjak ya. Hai phano lama man phuru’-no bo tháng anw.

¹³Sichaui tong di, poito kwrak khe tong di, khá tor di, kwrak wng di.

¹⁴Norok buino hamjagwi bebak samung khlai di.

¹⁵Norok Stipan bai bini nokni bororokni kók saui mano; Griso tongnairokni bere bórok’-no swkang Khristan wngnairok, phiya Kaitorni bororokni bagwi belai samung khlaiwi tongo. Takhukrok, omo tẃi Kaitorni samung khlainairokni kók khna di hwnwi ang sa ja-o, bórok bai baksa kaham khe samung khlainairokni kókbo hai’-no khna di.

¹⁷Stipan, Phortunat tei Akhaika phaima bai ang tongthok kha. Bórok tongma bai norokno kwrwi hwnwi ang saui man li ya,

¹⁸phiya norokno khápang srang rwma hai’-no bórok anobo khápang srang rw kha. Omo tẃi bororokno norok kaham khe sini di.

¹⁹Asia angkorni motharok norokno khápang rohoro. Akula bai Priskila tei bórokni nogo achuk achukmani a mothabo Subrai tẃi tongthogwi norokno khápang rohoro.

²⁰Oroni bebak takhukrok norokno khápang rohoro. Norok kiching norok takhuk hwnwi motom su laiwi khápang rw lai di.

²¹Ang omo ani yak baithang swi-o: Ang Pol khápang rohoro.

²²Subrai Jisu Khristono hamjak ya borok bo swraijak thung. Marana tha — O chini Subrai, phai ja di!

²³Subrai Jisu norokno khairok thung.

²⁴Subrai Jisu tẃi ang norok bebak’-no hamjak horo.