Read Kok Borok 1 KORINTH 2 Bible Online

1 KORINTH 2 - Kok Borok bible

1 KORINTH 2

¹Takhukrok, ang norokni thani Kaitorni bisingni kók pírna tháng phuru ang belai sinai hai khe kók kuthuk kuthuk sa ya.

²Norok bai tong phuru ang Jisu Khristono simi se uansuknai, aboni bere se bo kruso thwimano simi se uansuknai, tei mungsano phano uansuk ya hwnwi ang khá chong kha.

³Hakhe ang norokni thani tháng phuru ang phan kwrwi kirima gwnang khe thángo.

⁴Ang Kothoma Kaham sa phuru kók kwrwng kók sinai hai khe sa ya, tamo khe Kaitorni Pholani phan bai ang samani a kók sói hwnwi se phunukjak kha.

⁵Hakhe norok poito khlaimani abo borokni elem bai wng ya, Kaitorni phan bai se wngo.

⁶Hai phano ang poito kwrakrokni thani kók elemi sa-o. Abo o swngcharni elem ya, o swngcharni bokhorokrokni buya, a bokhorokrok phan kwrwi wng rwrwgo.

⁷Ang kók elemi samani abo Kaitorni bisingni elem; abo bororokno khogwi tonjak, tamo khe o swngchar snamjak ya sini’-no Kaitor abono chini mwkhang chẃng rwna bagwi chongwi tong kha.

⁸O swngcharni bokhorokrok khoroksa phano o elemno saui man ya. Bórok abono saui manma te chẃngsachani Subraino kruso kanta bu glak kha mun.

⁹Hai phano elembago hai hwnwi sama hai, “Khoroksa phano nuk ya kho, khna ya kho, khoroksa phano omo hai wng anw hwnwi uansuk ya kho, omo tẃirokno Kaitor bono hamjaknairokni bagwi tiyar khlai kha.”

¹⁰Kaitor bini Phola bai omono chwngno si rw kha. Phola bebak’-no cherwi nai-o, Kaitorni bwkha bisingni kók suda cherwi nai-o.

¹¹Borokni kók hwn khe bini bisingo tongnai phola’-no bini kók bebakno saui mano; abo hai khe’-no Kaitorni Phola simi se Kaitorni kók bebakno saui mano.

¹²Chwng o swngcharni pholano man ya; Kaitor chwngno rwmarokno saui manna bagwi chwng Kaitor rohormani a Pholano man kha.

¹³Hakhe chwng Kaitorni Phola gwnangrokni thani Kaitorni aroni kók swbaiwi sa phuru chwng elem gwnangrok phrwngmani kók bai sa ya, Kaitorni Phola phrwngmani kók bai se sa-o.

¹⁴Phiya Kaitorni Pholano man ya borok bo Kaitorni Phola rwmarokno yachagwi man ya. Bo abórokno romwi man ya; abórok bini thani samung nang ya tamni hwn ba Kaitorni Phola bai simi se abórokno bwswk tamo saui mano.

¹⁵Kaitorni Phola gwnang borok bo bebak’-no bwswk tamo saui mano, phiya bono saui mannai khoroksa phano kwrwi.

¹⁶Elembago hai hwnwi sama hai, “Subraini bwkha sabo saui man? Sabo bono phrwngwi man?” Tamo khe chwng Khristoni bwkhano man kha.