Read Kok Borok 1 KORINTH 4 Bible Online

1 KORINTH 4 - Kok Borok bible

1 KORINTH 4

¹Kaitorni bisingni kókni bagwi barja rwjak Khristoni seleng hwnwi chwngno si di.

²Oro kók tháisa wng kha omo hai, barja rwjaknai borok bo bini nokphangni thani kaham ma wngthai.

³Ang norok bai majra berjak phano abo ani thani mungsa buya, borok khoroksa swk bai majra berjak phano abo ani thani mungsa buya; ang kaham da hamya abo suda ang naisigwi nai ya.

⁴Ani bwkha sutrang, hai phano aboni bagwi ang kaham hwnwi romjak ya. Subrai se ano buj thumnai.

⁵Hakhe sói mol phai ya sini norok khoroksano phano majra ta ber di, Subrai phai ya sak majra ber yaui tong di. Bo mwnakma-o huijakrokno pohoro kariui phunuknai, bororok bwkha bisingo chapmaroknobo dak-dak khe phunuknai. Aphuru joto borok janijani samung khlai tẃi Kaitor bai kaham hwnjak bainai.

⁶Takhukrok, norokni bagwi se omorok bebak’-no Apoloni bai ani kókno rwgwi ma sa-o, hakhe norok chwngno nugwi “Kerong sama hai tong di,” hwnmani o kókno romwi mannai. Norok khoroksano tẃiwi kung chugui tei khoroksano selengna kók kwrwi.

⁷Nono sabo buini slái tor rw lang? Nono Kaitor tamo rw ya tong kha ba? Hakhe nwng mungsa phano man ya hai khe bahai khe kók kotor saui tong?

⁸Tabuk norokni samung nangmani manwi norok bebak’-no man bai kha! Tabuk norok gwnang! Chwng bugra wng ya phano norok bugra wng kha! Chwng norok bai baksa bugra wngwi manna tẃi khe norok sóini bugra wng thung abo ang nai-o.

⁹Ang khá khlai-o chwng chonghorrokno Kaitor jotoni ulo rohor kha; chwng lukuni bwskango butharjakna bagwi marja berjak borok hai se wng si-o. Chwng bebak swngcharni suarirok baibo bororok baibo naijakna se wng si-o.

¹⁰Khristoni bagwi chwng si ya, norok khe Khristo tẃi elem gwnang! Chwng phan kwrwi, norok khe phan gwnang! Chwng selengjak, norok khe bórijak!

¹¹Tabuk suda chwng ok khuiwi tongo, twi kangwi tongo; chwng kichik-kachak kanwi tongo; chwng bujago; chini nok kwrwi;

¹²chwng kolomtwi khiklaiwi ma chá-o. Swraijak khe chwng ham di hwno; sátokjak khe chwng soi-o;

¹³hamya sajak khe chwng kók kwtẃi sa phiro. Chwng wng kha o swngcharni laisrwi bosrwi simi se, tabuk suda chwng o swngcharni simbuk!

¹⁴Ang norokno lachi rwna bagwi omo swima ya; ani khájani bwsarok hwnwi se ang norokno khoraina bagwi se omo swi-o.

¹⁵Khristo tẃi norokno nainai-nuknai borok chisai tong phano norokni pha le kaisa se. Tamni hwn ba norokni thani Kothoma Kaham pírma bai ang Khristo Jisu tẃi norokni pha wng kha.

¹⁶Aboni bagwi ang tongma hai tong di hwnwi ang norokno sa ja-o.

¹⁷O samungni bagwi’-no ang Timothino norokni thani rohoro. Bo Subrai tẃi ani khájani bwsa kaham. Ang Jisu Khristo tẃi bubo tẃi tongmung kwtal tong bo a kókrokno norokno muitu khlaiwi rwnai, a kókrokno’-no ang ha gwnangwi motha brúm brúm phrwngwi tongo.

¹⁸Ang norokni thani phai glak hwnwi norokni bere baksa kung chuksaui tong bai kha.

¹⁹Hai phano Subrai muchung khe ang dakti’-no norokni thani tháng anw, hakhe aphuru ang a kung chuknairokni kókno simi nai glak, phanbo nai anw.

²⁰Kaitorni ha wng kha kók sama bai ya, phan bai se.

²¹Norok tamo hwn? Ang norokni thani raidang tẃiwi da phainai, norokno hamjagwi kwchang kwchang khe da phainai?