Read Kok Borok 1 KORINTH 5 Bible Online

1 KORINTH 5 - Kok Borok bible

1 KORINTH 5

¹Norokni bisingo omo tẃi buitali-buitala tongmung tongo hwnwi kubui’-no khna kha, poito kwrwirokni bisingo suda abo tẃi tongmung sitra kwrwi. Khoroksa bini matoi bai suda tongo hwnwi khna-o.

²Hakhe norok bahai khe kung chugui man? Abo hai wng yaui norok khá se khá khamthai; phiya omo tẃi tongmung tongnaino norokni bisingni khagwi rohorthai.

³Ang sak baithang norok bai tong ya phano ani pholani bising tẃi norok bai baksa tongo; ang norok bai baksa tongma hai kheno chini Subrai Jisuni mungwi a tongmung sitra tongnaino tabukno buj thumwi páijak kha.

⁴Norok kuthum lai phuru angbo ani pholani bising tẃi norok bai baksa tongnai, aphuru chini Subrai Jisuni phan bai norok o borokno Soitanni yago yaphar di, Subraini Salo bini phola mwthangjakna tẃi khe bini mangno komor rwna bagwi yaphar di.

⁶Norok kung chukthai kwrwi. Norok o kókno saui mano, “Chuan kisicha bai se aswk mai kwbángma lomo.”

⁷Chuan kwcham hai o sumsokno khibiui rw di, hakhe norok chuan buljak ya mai hai srai-srai wngnai; norokno abo hai hwnwi ang saui man súgo. Tamni hwn ba chini Yókma terni bagwi mera bwsa tanjak kha, abo’-no wng kha Khristo.

⁸Hakhe phai di, chwng o terno pálai lai anw, chuan kwcham bai ya, abono wng kha sumsok bai hamya; auang bángla bai se pálai anw, abono wng kha sutrang bai kubui.

⁹Buitali-buitalarok bai ta tong di hwnwi ang norokno swkangobo swihor kha.

¹⁰Ang omo poito kwrwi buitali-buitalarok, khámainairok, dagaitrok, takjak mwtaino surinairok bai ta tong di hwnwi sama ya. Abo tẃirok bai kagwi thángna hwn khe o swngcharni phataro tháng sukna nang anw.

¹¹Ang swima khe omo tẃi se, sakno Khristan takhuk saui lupcha wngnai, eba khe khámainai, eba khe takjak mwtaino surinai, eba khe buino hamya sanai, eba khe chuak kephek, eba khe dagait, abo tẃi borok bai ta tong di hwnwi sama se. Abo tẃi borok bai achugwi mai suda ta chá di.

¹²Buini borokni buj thumnani samung ba ani da? Kaitor bórokni buj thumnai. Norokni bororokno norok’-no buj thumthai, hai ya da? Elembago hai hwnwi sama hai, “Borok hamyano norokni bisingni khagwi rohor di.”