Read Kok Borok 1 KORINTH 6 Bible Online

1 KORINTH 6 - Kok Borok bible

1 KORINTH 6

¹Norokni bere khoroksa swk tei takhuk khoroksa bai khek lai khe bo bahai khe Kaitorni bororokni thani swbai yaui poito kwrwirokni thani kes khlaina bwkha phai rak?

²Kaitorni bororok o swngcharni buj thumnai hwnwi norok saui man ya da? Hakhe o swngcharni se norok buj thumnai hwn khe norok kisichani buj thumna chúk ya da?

³Chwng suariroknibo buj thum anw hwnwi norok saui man ya da? Hakhe chwng o swngcharni samungrokni buj thumwi mano o kók bwswk se kubui.

⁴Omo tẃi khe mungsa swk wng khe norok abo swbaina bagwi mothani borok yarokni thani da tlangnai?

⁵Abo tẃi wng khe norokni bwswk lachimasingcha! Takhukrokni khek laimano swbai mannai sinai-nuknai norokni bisingo khoroksa phano kwrwi kha da?

⁶Abo hai wng yaui khoroksa takhuk tei khoroksa takhukni mungwi kes khlaiwi poito kwrwirokno a kesni buj thum rw-o.

⁷Norok kiching norok kes khlai laimani abo norokni cha ya hwnwi sijago. Aboni slái hamya khlaijagwi tongmani abo ham kuk ya diba? Aboni slái khokjagwi tongmani abo ham kuk ya diba?

⁸Abo hai wng yaui norok kiching norok se hamya khlai lai-o, norok kiching norok khok lai-o, norok takhukrokno suda abo tẃi khlai lai-o.

⁹Borok hamyarok Kaitorni ha-o ha banta man glak hwnwi norok saui man ya da? Lama ta koró di; buitali-buitala wngnairok, takjak mwtaino surinairok, lupcharok, chwla bai chwla uaijanairok,

¹⁰sikhokrok, khámainairok, kephekrok, buino hamya sanairok, dagaitrok, abo tẃi bororok khoroksa phano Kaitorni ha-o ha banta man glak.

¹¹Norokni bere baksa abo hai tongmani. Tamo khe tabuk norokni sumsok sújak bai kha; norok Kaitorni yago yapharjak kha; Subrai Jisu Khristoni mung bai tei chini Kaitorni Phola bai norok Kaitor bai kaham hwnwi romjak kha.

¹²Khoroksa swk hai hwnwi sa anw, “Ang muchung tẃi’-no bebak samung khlaiwi mano.” Kók khe kubui’-no, hai phano bebak samung’-no nini bagwi kaham ya. “Ang bebak samung khlaiwi mano,” hai hwn phano ang mungsa samungo phano khajak glak.

¹³Tei khoroksa hai hwnwi sa anw, “Chámung bohokni bagwi se, bohok chámungni bagwi se.” Kók khe kubui’-no, hai phano Kaitor bohok bai chámung a kwnwi nwino’-no pái rwnai. Borokni bwsak buitali-buitala khe tongna bagwi ya, Subraini bagwi se; phiya Subrai bwsakni bagwi se.

¹⁴Kaitor Subraino mwthangwi tisa kha, hakhe bini phan bai chwngnobo tisanai.

¹⁵Norok saui mano norokni bwsak wng kha Khristoni bwsakni bedek. Khristoni bwsakni bedek wngwi ang baliknaini bwsak bai gwdalwi tongwinai, hai da? Abo wngwi se man ya!

¹⁶Norok saui man ya da, baliknai bai bwsak gwdal khe a borok bo bai bwsak kaisa wngma klai-o? Elembago hai hwnwi sa-o, “A khoroknwirok bwsak kaisa wngnai.”

¹⁷Tamo khe Subrai bai gwdalnai borok bo phola tẃi bo bai thansa wngo.

¹⁸Buitali-buitala tongmungno khibi di. Tei sumsok khlaimarok abo borokni bwsago bujak ya, tamo khe buitali-buitala wngnai borok bo bini bwsakno sumsogo khiklai-o.

¹⁹Norok saui man ya da, norokni bwsak wng kha norokni bisingo tongnai Phola Kwtharni nokthar, a Phola Kaitor bai rwjakma se. Norok tei sak sakni li ya, norok Kaitorni se;

²⁰bo norokno pai kha. Aboni bagwi Kaitor lobjakna tẃi khe norokni bwsakno samungo phnang di.