Read Kok Borok 1 KORINTH 7 Bible Online

1 KORINTH 7 - Kok Borok bible

1 KORINTH 7

¹Tabuk, norok ano swihorma kókrokno tẃiwi kisa sa anw. Chwlarok káijak yaui tong khe hamo.

²Hai phano buitali-buitala kwbángma wngma bai joto chwlani’-no hik tongthai, phiya joto bwrwini’-no sai tongthai klai-o.

³Chwlabo hikni bagwi saini khlaithaino khlaithai; abo haikheno bwrwibo saini bagwi hikni khlaithaino khlaithai.

⁴Hikbo bini bwsakni bugra ya, bwsai se bugra; abo hai’-no saibo bo bini bwsakni bugra ya, bihik se bugra.

⁵Hwisaknwi ta kak lai di, tamo khe hwisaknwi sa laiwi soi lai khe suri sanna bagwi kisa kak laiwi tongwi mano. Abo pái khe norok sak soiwi man ya wngwi Soitan bai belokjak ya tẃi khe haino hai thansa wng phi di.

⁶Ang norokno omo dagiui sama ya, norok khlaina khe khlaiwi mano hwnwi sama se.

⁷Hai phano norok bebak’-no ang hai wng thung hwnwi ang nai-o, tamo khe jotono Kaitor rwmani podrepot suar man kha, khoroksa omo tẃi suar man kha, tei khoroksa abo tẃi suar man kha.

⁸Tabuk, ang káijak yarok bai randijwkrokno o kók sa-o: ang tongma hai’-no norok káijak yaui tong khe cha-o.

⁹Hai phano norok sak soiwi man ya hwn khe káijak di, belai muchungwi tongmani slái káijakma se cha kugo.

¹⁰Káijakrokno ang hai hwnwi dagi-o, ang dagima ya, Subrai se dagi-o: bihik bwsaino ta kak thung;

¹¹bo kak lai khe sai na yaui’-no tong thung, wng ya khe bwsai bai kwtha phi thung; saibo hikno ta kak thung.

¹²Teirokno ang hai hwnwi sa-o, (omo Subrai sama ya, ang sama se): Khristan chwlani bihik Khristan ya hwn khe, phiya a hik bo bai tongna soi khe, bo bono ta kak thung.

¹³Phiya Khristan bwrwini bwsai Khristan ya hwn khe, phiya a chwla bo bai tongna soi khe bo bono ta kak thung.

¹⁴Tamni hwn ba bwsai Khristan ya phano bihikni jarwi Kaitor bai yachakjago, phiya bihik Khristan ya phano bwsaini jarwi Kaitor bai yachakjago. Omo tẃi wng ya khe bórokni bwsarok poito kwrwirokni bwsarok hai tongnai; tamo khe a bwsarok Kaitor bai yachakjago.

¹⁵Hai phano Khristan ya borok a Khristan logisongno kakna muchung khe kak thung. Omo hai wng khe a Khristan logisong, bo sai phano wng thung hik phano wng thung, khajagwi tongna nang ya. Kaitor norokno kwchang kwchang khe tongna bagwi se ringo.

¹⁶O Khristan hik, uansugui nai di, nwng nwsaino mwthangwi phano manna tongo. O Khristan sai, uansugui nai di, nwng nihikno mwthangwi phano manna tongo.

¹⁷Jotono Subrai suar rwma tẃino tongthai, jotono Kaitor ring phuru tongma tẃino tongthai. Omo hai kheno tong di hwnwi ang bebak motha-o phrwngwi tongo.

¹⁸Sakur rajak borok khoroksa Kaitor bai ringjak khe bo a sakur rajakma marino sokomorna ta nai thung; phiya sakur rajak ya borok khoroksa Kaitor bai ringjak khe bo sakur ta rajak thung.

¹⁹Tamni hwn ba sakur rajagwibo rajak yauibo abo mungsa buya, kók khe Kaitor dagimarokno khnana se.

²⁰Joto borokno Kaitor bai ringjak phuru tongma tẃi’-no tongthai.

²¹Nwng seleng khatiui tong phuru da Kaitor nono ring? Hai phano mungsa ta uansuk di, tamo khe nwng seleng khatimani yóknani lama man khe yók di.

²²Tamni hwn ba Subrai bai ringjak seleng bo wng kha Subraini phiyókjak borok; abo hai’-no Khristo bai ringjak borok bo seleng ya phano Khristoni seleng.

²³Kaitor norokno pai kha, aboni bagwi bororokni seleng ta wng di.

²⁴Takhukrok, Kaitor ring phuru tongma tẃi kheno norok Kaitor bai tong di.

²⁵Tabuk bwrwi siklani kók sa anw: Omoni bagwi ang Subraini aroni kók tháisa phano man ya, hai phano ang Subrai bai maya chájagwi khom-khom wngma bai ani kók sa-o.

²⁶Tabukni mol hamyano nugwi joto borokno tabuk tongma tẃino tong khe hamo hwnwi ang hwno.

²⁷Nwng hik da na kha? Hakhe bono kakna ta nai di. Nwng káijak ya kho da? Hakhe káijakna ta nai di.

²⁸Hai phano nwng káijak khe nwng sumsok khlai ya, phiya bwrwi sikla káijak khe bo sumsok khlai ya. Hai phano káijaknairok o swngcharo tekto manmano norok ta manjak thung hwnwi se ang nai-o.

²⁹Takhukrok, kók khe omo hai: Tei sal kwbáng kwrwi kha, hakhe tabukni simi káijaknairok káijak ya hai khe tong thung;

³⁰kapnairok kap ya hai khe tong thung, tongthoknairok tongthok ya hai khe tong thung; painairok bórok paima mungsano phano kwrwi hai khe tong thung;

³¹o swngcharni manwirok bai swrap laijakrok bórok a manwirok bai koboljak ya hai khe tong thung. Tamni hwn ba o swngchar tabuk tongma hai tei kwbáng dwgwi tong glak.

³²Norok uana yaui tong thung hwnwi ang nai-o. Káijak ya borok bo Subraini samungni kók uansugo, tamni hwn ba bo Subrai bai hamjakna nai-o.

³³Káijak borok khe bo o swngcharni kók uansugo, tamni hwn ba bo bihik bai hamjakna nai-o;

³⁴aboni bagwi bini bwkha yang bai yang bai sotonjago. Káijak ya bwrwi eba bwrwi sikla Subraini samungni kókno uansugo, tamni hwn ba bwsak bai phola bai bo yapharjakna nai-o; káijak bwrwi khe bo o swngcharni kók uansugo, tamni hwn ba bo bwsai bai hamjakna nai-o.

³⁵Ang norokni kahamni bagwi se omo sa-o. Ang norokno kwcha rwna nai ya, tamo khe ang nai-o norok sói khe tong di, tei mungsa-o phano khá rw yaui norok Subraini samungo khá rw súk di.

³⁶Kók sẃngjak khoroknwirok káijak ya kho hwnwi kók chap laijak hwn khe a chwla káijak ya sini a bwrwi bai tongmung kaham khe tongjak ya wngwi tong kha hwnwi uansuk khe, phiya bo belai muchungma bai káijak khe hamo hwnwi uansuk khe, bo muchung tẃi’-no káijak lai thung. Abo bai bo sumsok khlaima klai ya.

³⁷Phiya borok khoroksa ahai’-no káijak yaui tongnani hwnwi khá chong súk khe, bo bini muchungmano soiwi tongwi man khe, bo tamo khlainai hwnwi khá chong kha hwn khe, hakhe bo a bwrwino sikla’-no tongma hamo.

³⁸Hakhe bini kók sẃngjak bwrwino káijaknai borok bo kaham khlai-o, phiya bini kók sẃngjak bwrwino káijak ya borok bo teibo kaham khlai-o.

³⁹Káijak bwrwi bini bwsai kwthang tong sak bo bwsai bai kerongo khajak. Phiya bini bwsai thwi khe bo tei khajak li ya, bo naima borok bai’-no káijagwi mano, hai phano Khristan bai káijakna nangnai.

⁴⁰Phiya bo káijak yaui tong khe bo ham kuknai. Abo’-no ani kók, angbo Kaitorni Phola man kha hwnwi tongo.