Read Kok Borok 1 KORINTH 9 Bible Online

1 KORINTH 9 - Kok Borok bible

1 KORINTH 9

¹Ang mungsa-o khajak diba? Ang chonghor ya diba? Ang chini Subrai Jisuno nuk rwk ya diba? Ang Subraini bagwi samung khlaimani bwthái norok ya diba?

²Bui ano chonghor hwn ya phano norok sói’-no ano chonghor hwno! Norok Subrai bai tongma bising tẃi’-no ang chonghor hwnwi sijago.

³Lukurok ano hwn khe ang hai hwnwi saui katinai:

⁴Ang ani samungni bagwi ma cháthai ma nungthai kwrwi da?

⁵Tei chonghorrok hai, Subraini takhukrok tei Pitorsong hai ang ba Khristan hikno ani logi tlangwi man ya diba?

⁶Ang bai Barnaba simi da samung tangwi ma chánai?

⁷Sabo buphuru sakni rang rwui sengkrak tong? Bu angur káinai bini barini angur chá yaui tong de? Bu musuk mwrwknai bini musukni dut nwng yaui tong de?

⁸Ang bororokni tongmung chámungrokno phunugui sana nang ya, Kerongobo abo haino tongo.

⁹Chwng Musini Kerongo o kókno pori kha, “Mai nak phuru musukno kapai ta kha di.” Hakhe Kaitor musukni bagwi’-no da khá súk?

¹⁰Bo o kók samani abo chwng’-no hwnma klai ya diba? I’n, abo chini bagwi’-no swijago. Al chuainaisa bai mai ranaisa bórok khoroknwino mai man anw hwnwi’-no samung tangthai.

¹¹Chwng norokni bwkhani bagwi se bwchlwi saro. Chwng norokni aroni swngcharni manwi ra khe belai da wng?

¹²Bui se norokni aroni abo tẃirok manẃi man khe chwng se manthai tong kuk bla? Tamo khe chwng abo tẃi manthai tongma tẃi nai li ya. Abo hai wng yaui Khristoni Kothoma Kaham kasujak ya tẃi khe chwng bebakno’-no soi kha.

¹³Norok saui man ya da, noktharo samung tangnairok noktharni’-no chánani mano, háyá-o ratharnairok khe a ratharmani aroni banta mano.

¹⁴Abo hai khe’-no Kothoma Kaham pírnairok bórok abo bai’-no chá thung hwnwi Subrai saui klang kha.

¹⁵Tamo khe ang abo tẃi manthai tongma tẃi’-no mungsa phano nai li ya, phiya ang omo abo tẃi manthai tongo hwnwi swima ya. Aboni slái ang thwima se ham kugo, khoroksa phano ano kók kotor sanani lama muthup glak!

¹⁶Ang Kothoma Kaham pír phano kók kotor sa thai kwrwi, tamni hwn ba ang abono pírna bagwi berjak. Ang Kothoma Kaham pír ya khe ang bwswk se hamya sitrano!

¹⁷Ang ahai’-no o samung khlai khe ang manthai klai-o; phiya ang ma khlaithai hwnwi khlai khe abo Kaitor ano o samung berma klai-o.

¹⁸Hakhe ang tamo manma klai? Ang omo tẃi’-no mano, khoroksani yakni phano mungsa na yaui ang Kothoma Kaham pírwi tongo, kók khe omo hai, Kothoma Kaham pír thani ang manthai tongma tẃi’-no nai yaui pírwi tongo.

¹⁹Ang mungsa-o khajak ya, khoroksani phano seleng khati ya; hai phano teibo kwbángmano poito khlaiwi rwna bagwi ang bebakni seleng khatiui tongo.

²⁰Ang Judairok bai tong phuru bórokno poito khlaiwi rwna bagwi Judairok tong tẃi khe’-no tongo; ang Musini Kerongni yago tong ya phano Kerongni yago tongnairokno poito khlaiwi rwna bagwi ang Kerongni yago tongnai hai kheno tongo.

²¹Abo hai kheno buini bororok bai tong phuru bórokno poito khlaiwi rwna bagwi ang Musini Kerong man ya buini borok hai kheno tongo. Ang Kaitorni Kerong rákhok yaui tongo, o kók ya; ang Khristoni kerongni yago tongo.

²²Poito rak tha yarokno poito khlaiwi rwna bagwi ang borok bai tong phuru poito rak tha ya wngo. Hakhe jesa khe phano baksa baksano mwthangna hwnwi joto borok tongma tẃino angbo abo hai kheno tongo.

²³Kothoma Kaham bai kaham khlaijakna hwnwi se ang Kothoma Kahamni bagwi omorok bebak’-no khlai-o.

²⁴Norok saui man ya da, batai thani borok kwbángma batai lai-o, tamo khe khoroksa simi se sokat mano. Hakhe norok sokat manna tẃi khe batai di.

²⁵Joto batainai kaham khe ma swrwngo; bo dakti’-no hamya wngnai budukni rapjak motok manna bagwi se omo hai tongo, chwng khe tei hamya wng phlai ya motok manna bagwi se.

²⁶Aboni bagwi ang ahai’-no batai ya; aboni bagwi ang yamusung thwngnai hai ahai’-no yamusung rw ya.

²⁷Buino “Phai di, batai di,” hwn phano ang khibijak ya tẃi khe ang ani sago yamusung kwrak khlaiwi ani muchung tẃi khlaiwi tono.