Read Kok Borok 2 KORINTH 1 Bible Online

2 KORINTH 1 - Kok Borok bible

2 KORINTH 1

¹Ang Pol omono swihoro, ang Kaitorni morji bai Khristo Jisuni chonghor. Ang bai baksa chini takhuk Timothibo omono swihoro. Korinthni Kaitorni mothano, phiya Gris gwnangwini Kaitorni bebak bororokno omono swihoro.

²Chini Apha Kaitor bai Subrai Jisu Khristo norokno khairok thung, norokno khá kwchang rw thung.

³Phai di, chwng chini Subrai Jisu Khristoni Bupha Kaitorno hambai rw lai anw, bo wng kha maya gwnang Apha, bebago’-no chubanai Kaitor.

⁴Kaitor bai chwng chubajakma hai podrepot tekto manjagwi tongnairokno chwng chubaui manna tẃi khe chwng tekto man brúm brúm bo chwngno chuba-o.

⁵Chwng Khristo bai baksa kwbángma sátokjakma bising tẃi’-no Khristoni bising tẃi chwng bo bai baksa kwbángma chubo chubajago.

⁶Chwng sátokjak khe abo norokno chubana bai mwthangna bagwi se; chwng chubajak khe norokbo chubajago, phiya chwng sátokjagwi soima hai’-no norokbo khá logwi soiwi manna tẃi khe phan rwjago.

⁷Hakhe chwng norokni bagwi khatungmani abo kaham khe’-no khatungo; chwng saui mano norok chwng bai baksa sátokjakma hai’-no norok chwng bai baksa chubo chubajago.

⁸Takhukrok, chwng Asia angkoro tekto manmano norokno muitu khlaiwi rwna nai-o. Chini saka-o poja kotor bokjakmani abo panjalwi hilik, aboni bagwi chwng thang anw hwnwi uansugui man li ya.

⁹Aphuru chwng butharjakna hwnwi hwnjakma hai se ma tong si-o. Chwng sak sakno khá bera yaui kwthwirokno mwthangwi tisanai Kaitorni thani khá ma berana bagwi se omo wngo.

¹⁰Bo omo tẃi kirimasingcha thwinani yakni chwngno phiyók kha, ulobo phiyók phirnai; norok chini bagwi suri sanwi chubama bai bo chwngno phiyók phinai hwnwi chwng bini thani khá beraui tongo. Abo tẃi kheno chini bagwi kwbángma suri sanma hai’-no Kaitor chini kaham khlai anw, hakhe borok kwbángma’-no chini bagwi bono hambai rw anw.

¹²Omoni bagwi’-no chwng kung chugo: chwng kaham khe saui man súgo chwng o swngcharo tongmani abo, phiya aboni bere se norok bai chwng sók laimani abo Kaitor khá dala khe, khá sutrang khe tonma bai se wngo; abo borokni elem bai ya, Kaitor khairokma bai se wngo.

¹³Norok poriui romwi manmano simi se chwng swihoro. Norok tabuk kisa romwi manmani abo romwi man súk anw hwnwi ang khá ka-o, hakhe Subrai Jisuni Salo chwng norokni bagwi kung chukma tẃi’-no norokbo chini bagwi kung chugui man anw.

¹⁵Ang omo sói kubui hwnwi khá kaui tongma bai norok tei uáisa khá srangna tẃi khe ang swkang’-no norokni aro thángnai hwnwi khá chap kha.

¹⁶Makidonia-o tháng phuru ang norokni aro thángnai hwnwi khá chap kha, phiya Judia-o tháng phuru ang norok bai chubajagwi manna tẃi khe kiphil phuru norokni aro tháng phir anw hwnwi ang khá chap kha.

¹⁷Omo tẃi khe khá chabwi ang ba heleng sijak na da? Ang khá chap twtwi sakni bagwi simi uansuknai borok hai khe’-no da “I’n” hwn twtwi “I’nhi” hwnnai, hai da?

¹⁸Kaitor kók narwkma hai’-no ang norokno kók rwmani abo “I’n” khe “I’n”, “I’nhi” khe “I’nhi”.

¹⁹Sila bai Timothi tei ang khe norokni bisingo pírmani Kaitorni Sajla a Jisu Khristo wng kha “I’n” hwnwi “I’nhi” hwn ya. Bo wng kha Kaitor “I’n” hwnmani,

²⁰tamni hwn ba Kaitor bebak kók rwmani abo bini bising tẃi’-no “I’n” wngo. Aboni bagwi’-no chwng Kaitorno chẃngsacha khlaina bagwi Jisu Khristoni bising tẃi “Amen” hwno.

²¹Kaitor se chwngno norok bai baksa Khristoni borok khlai súgo; Kaitor chwngno khagwi ton kha,

²²bo chwngno bini borok hwnwi mari bu kha, phiya bo rwna hwnmarokno chwng mannai hwnwi saui man rw sukma bagwi bo chini khá-o Phola Kwthar rw kha.

²³Ang Kaitorno ani sakki hwno, bo ani bwkhano saui mano. Norokni hamya wng anw hwnwi ang Korintho tháng ya hwnwi khá chong kha.

²⁴Chwng norokni poitono ubrum-jabrum phnangna nai ya, tamni hwn ba norok poito kwrak khe tongo. Ahai wng yaui norok tongthok thung hwnwi chwngbo norok bai baksa samung khlaiwi tongo.