Read Kok Borok 2 KORINTH 10 Bible Online

2 KORINTH 10 - Kok Borok bible

2 KORINTH 10

¹Ang Pol sakphang’-no norokno sa ja-o, ang norok bai tong phuru khe kwchang kwchang tongnai hwnjago, norok bai hakchalo tong phuru khe kutuknai hwnjago, Khristo kwchang kwchang khe tongma bai, Khristo khairokma bai ang norokno sa ja-o:

²Ang norokni thani phai phuru khe ano kutuk rwna ta nai di; tamni hwn ba chwng o swngcharni bororok uansukma hai khe samung khlai-o hwnwi sanairokni thani ang kutukna phano tongo.

³Chwng o swngcharo tong phano chwng o swngcharni bororok uansukma hai khe choba khlai ya.

⁴Chwng choba khlai thani o swngcharni da-seng tẃi ya, chini da-seng wng kha bera kwrak swbaina bagwi Kaitorni phankrak da-seng se. Chwng nang ya kókrokno swkwmaui rw-o,

⁵Kaitorno sini rw ya khlaiwi rwna bagwi bororok kung chugui joto bera dummano chwng swbai rw-o. Chwng bebak uansukmarokno khaui Khristoni kók khna rw-o.

⁶Norok bebago’-no kók khna kha hwn khe chwng joto kók khna yarokno akol rwna tiyar tongo.

⁷Saka saka simi se norok nugo. Khoroksa swk ang Khristoni borok da hwn? Hakhe a borok tei uáisa uansuk gra thung, tamni hwn ba chwngbo bo hai’-no Khristoni borok.

⁸Kaitor chwngno phan rwmani bagwi ang kisa kók kotor sa phano lachi ya, a phan rwmani abo norokno rak rwna bagwi se, dera rwna bagwi ya.

⁹Ang ani kóktunrok bai norokno sikiri-o hwnwi sijakna nai ya.

¹⁰Khoroksa swk hai hwnwi sa anw, “Pol swihor phuru khe kók kwrak kwrak swi-o, chwng bai tong phuru khe bo kebel se, bini kókrokbo mungsa samung nang ya!”

¹¹Chwng hakchalo tongwi swihormani kókrok bai norok bai tong phuru chini samung mungsa phér lai ya hwnwi omo tẃi sanai borok si thung.

¹²Hai phano sakno kolok-kotor hwnnairok bai chwng baksa hwnwi sa rak ya, bórok bai chwng sakno su rak ya. Bórok bwswk si ya gwja! Bórok kiching bórokno su lai-o, bórok tongma tẃi’-no su lai-o.

¹³Chwng hai phano yak láiwi kók kotor sa glak. Kaitor chwngno samung rwma tẃino chwng kók kotor sa anw, a samungo norokbo khopjago.

¹⁴Norok chini samungo khopjakma bai chwng Khristoni Kothoma Kahamno tubu-ui norokni thani thángwi a samungni bára samung khlai li ya.

¹⁵Kaitor chwngno samung rwmano karwi chwng bai samung khlaimano tẃiwi kók kotor sa ya. Hai wng yaui norok poito rak rwrwkma bai chwng norokni bisingo Kaitor samung rwma tẃi’-no teibo samung kotor khlaiwi man anw hwnwi khá ka-o.

¹⁶Hakhe chwng norokni aroni slái teibo hakchalrogobo Kothoma Kaham pírwi man anw, buini samung khlaiwi páijago a samungni bagwi chwng kók kotor sana nang glak.

¹⁷Tamo khe elembago hai hwnwi sama hai, “Khoroksa swk kók kotor sana muchung khe Kaitor khlaima samungni bagwi kók kotor sa thung.”

¹⁸Tamni hwn ba borok sak sakno kaham hwnwi hwnma bai kaham wng ya, Subrai bono kaham hwnwi hwn khe se bo kaham wngo.