Read Kok Borok 2 KORINTH 11 Bible Online

2 KORINTH 11 - Kok Borok bible

2 KORINTH 11

¹Ang mungsa si ya phano norok ano hama lok di abo ang nai-o. I’n, ano hama lok ja di.

²Kaitor hai khe’-no ang norokni bagwi khá súgo. Norok wng kha bwrwi sikla kwthar hai, borok khoroksa bai bono káina hwnwi ang kók sẃngmani, a borok wng kha Khristo.

³Ebi chibuk bai phemlokjagwi lama koróma hai norok bwkha sitra wngwi Khristono sutrang khe kwthar khe suri ya da wngno hwnwi ang uana-o.

⁴Chwng norokni thani pírma a Jisuno karwi khoroksa swk phano tei kaisa Jisuno pír phai khe norok bono kaham khe’-no hama logwi tongo; phiya norok chini yak tẃi manmani a Phola bai a Kothoma Kahamno karwi tei kaisa phola bai tei kaisa kothomano yachago.

⁵A chonghor kotor hwnjaknairokni slái ang sakno mungsa-o phano kusu hwnwi khá ka ya.

⁶Ang kók kwrwng ya phano ang si ya nuk ya wng ya. Chwng omono norokni thani bebago’-no srai-srai khe saui man rw máng tongo.

⁷Ang norokni thani Kaitorni Kothoma Kaham pír phuru mungsa nai yaui pír kha; norokno tor rwna bagwi ang sakno kusu khlai kha. Ang abo cha ya da khlai lang?

⁸Ang norokni bisingo samung khlai phuru tei motharok se ano chá rwui tono. Sana tháng khe norokno chubana bagwi ang bórokno chá khlwk kha.

⁹Ang norok bai tong phuru ani rangni samung nang phurubo ang khoroksano phano tekto rw ya, Makidoniani phainai takhukrok se ani nangma jora tẃi rwui tongo. Ang swkangobo norokni poja wng li ya, ulobo wng glak!

¹⁰Ani bisingo Khristoni kubui tongma bai ang o kók sa-o: ang hai hwnwi kók kotor samani abo Grisni kwrẃngsa-o phano khna ya tong glak.

¹¹Ang tamni o kók sa? Ang norokno hamjak yani bagwi da sa? Ang norokno hamjago hwnwi Kaitor saui mano.

¹²A “Chonghorrok” chwng samung khlaima hai khe’-no khlai-o hwnwi kók kotor sana lam man ya tẃi khe ang tabuk khlaiwi tongma’-no khlaiwi tongnai.

¹³A bororok sói sói chonghor ya, bórok wng kha phatrarok se, bórokni samungno tẃiwi tatal saui Khristoni chonghor hai khe sakno mul philo.

¹⁴Abo uanamasingcha samung ya. Soitanbo pohorni suari hai khe sakno mul philwi mano.

¹⁵Aboni bagwi bini selengrok seleng kaham hai khe mul philmani abo kók kotor ya. Páithakni salo bórok samung tangma tẃi’-no bórokni manthaino ma se mannai.

¹⁶Ang hai’-no hai sa phiro, khoroksa phano ano si ya hwnwi ta hwn thung. Hai phano norok hai’-no hwn khe ang kisa kók kotor saui manna tẃi khe ano si ya hwnwi’-no yachak di.

¹⁷Tabuk ang samani abo Subrai ano sa rwma ya; oro ang kók kotor samani abo katswi si ya hai khe sama se.

¹⁸O swngcharni tongmung chámungno tẃiwi simi kók kotor sanai kwbángma’-no tongma bai angbo abo hai kheno kók kotor sanai.

¹⁹Norok belai khe si-o, aboni bagwi norok si yarokno kaham kheno hama logwi tongo!

²⁰Khoroksa swk phano norokno yang yang dagi khe, norokno kusubwi chá khe, norokno khẃi-o khiklai khe, norokno sak nang ya nuk khe, eba khe norokni khangaro thapra rw khe norok a borokno hama logo.

²¹Chwng abo tẃirok khlaina kiri-o hwnwi sanani ang lachi-o! Hai phano khoroksa swk mungsa swkni bagwi kók kotor sa rak khe, ang si ya hai khe’-no sa-o, angbo kók kotor sa raknai.

²²Bórok Hibru da? Angbo hai’-no. Bórok Israil da? Angbo hai’-no. Bórok Abrahamni bosong da? Angbo hai’-no.

²³Bórok Khristoni seleng da? Ang kobor hai khe sa-o, ang se bórokni slái seleng kaham kuk. Ang bórokni slái samung kwrak tang kuk kha, ang kwbángma’-no alongo chopjak kuk kha, ang kwbángma’-no swprakjak kuk kha, ang kwbángma’-no thwimani yago klai kuk kha.

²⁴Judairok bai ang uáibaui phungthamchichuku swprakjak kha;

²⁵Rumrok bai ang uáitham bujak kha, uáisa holong khitarwi rwjak kha; ang rungtor kwlwk thani uáitham manjak kha, uáisa ang twi-o horsa salsa ma tong kha.

²⁶Aswk lama-o tháng thani ang twi kotorobo thwi kha mun, dagaitni yagobo thwi kha mun; ang ani bororokni yagobo thwi kha mun, buini bororokni yagobo thwi kha mun; ang taunobo thwi kha mun, bolongobo thwi kha mun, twijlangobo thwi kha mun, takhuk tatalrokni yagobo thwi kha mun.

²⁷Ang kolomtwi khiklaiwi samungbo ma tang kha, ang thu yauibo kwbángma ma tong kha, ok khuibo ma tong kha, twi kangwibo ma tong kha; ang ok pung yauibo kwbángma ma tong kha, rí kwrwini bai kwchangwibo ma tong kha.

²⁸Abono karwibo bebak motharokni bagwi khá súgwibo ang sal brúm brúm poja bokjagwi ma tongo.

²⁹Khoroksa swk bel khe angbo ma belo; khoroksa swk sumsogo khiklaijak khe angbo khá ma yogo.

³⁰Ang kók kotor sana nang khe ang bwswk kebel abo phunugui se ang kók kotor sanai.

³¹Ang tatal sa ya hwnwi Subrai Jisuni Bupha Kaitor saui mano, bo mol brúm brúm lobjak thung!

³²Ang Damaskoso tong phuru bugra Aritani gobornor ano romna bagwi taunni duglamrogo mwrwknai ton kha.

³³Tamo khe ura-o khe ano chokdeualni tailam tẃi khiklaiwi rohor kha, omo tẃi khe ang bini yakni yók kha.