Read Kok Borok 2 KORINTH 12 Bible Online

2 KORINTH 12 - Kok Borok bible

2 KORINTH 12

¹Ang kók kotor ma sa-o, abo samung nang ya phano ma sa-o. Subrai ano imang phunukmarokni kók ang tabuk sanai.

²Nokha bisi chibrwi swkang chuknohani kuchugo romwi tisaui tlangjaknai Khristan khoroksano ang sini-o. (Abo sói sói da wng kha, eba khe a borok Kaitor bai da imang phunukjak kha abo ang saui man ya, Kaitor simi se saui mano.)

³Ang hai’-no hai sa phiro, a borok paradaiso se romwi tisaui tlangjago, hwnwi ang saui mano (phiya, abo sói sói da wng kha, eba khe a borok Kaitor bai da imang phunukjak kha abo ang saui man ya, Kaitor simi se saui mano).

⁴Ang saui mano kók baibo saui man ya, khúk baibo saui man ya abo tẃi kók a borok aro khna kha.

⁵Hakhe ang a borokni bagwi se kók kotor sanai, tamo khe ang sakni bagwi kók kotor sa glak, ang bwswk kebel abo phunugui simi se kók kotor sanai.

⁶Ang kók kotor sana muchung khe ang si ya wng glak, tamni hwn ba ang kók kubuino sanai. Hai phano ang kók kotor sa glak, tamni hwn ba ani samungno nukmani slái, ani kókno khnamani slái, ano khoroksa phano kotor hwn thung abo ang nai ya.

⁷Tamo khe ang aswk uanamasingcha nukmani bai belai kung chuk ya tẃi khe ani sago chor pa rwjak kha. Abo Soitan bai rohorjaknai borok hai, ang kung chugui man ya tẃi khe abo ano bu-ui tongo.

⁸“Abo ani sakni sokok si di,” hwnwi ang uáitham Subraini thani san kha.

⁹Bo sama khe hai, “Ang khairokma bai’-no nini wngo; nwng bel khe ani phan teibo rago.” Hakhe Khristoni phan ano kobolwi tongo hwnwi saui manna bagwi ang belwi tongma bai se kók kotor sana hwn khe ang tongthogo.

¹⁰Ang Khristoni bagwi bel phano, lachi rwjak phano, dobo klai phano, sátokjak phano, kesebo khiklaijak phano khá kochomwi tongo, tamni hwn ba ang bel khe se rago.

¹¹Ang si ya hai wngwi tongo, norok’-no ano abo wng rw-o. Norok’-no ano kaham hwnwi sa thai tongo; ang mungsa buya phano, a chonghor kotor hwnjaknairokni slái ang mungsabo kusu wng ya.

¹²Ang chonghor hwnwi sijakmani ani a samung belai khá lokma bai norokni bisingo khlaijak kha; norokni bisingo soidomni samung, uanamasingcha samung tei ha-o nuk ya samung khlaijak kha.

¹³Ang norokni poja wng li ya, abono karwi tei motharokni slái norok hamya khlaijakma klai ba? A samung cha yani bagwi ano nakar ja di!

¹⁴Omo bai khe uáitham ang norokni aro thángna hwnwi tiyar wngmani ang norokni thani mungsa phano nai glak. Ang norokni rang nai ya, norokno se nai-o. Kók khe hai se, chwrairok buma buphano chá rw ya, buma bupha se chwrairokno chá rw-o.

¹⁵Norokno chubana bagwi ang khá srangwi ani tong kwrwi rw bainai, ang sakno suda rw bainai. Ang norokno kwbángma hamjago, hakhe norok ano kisa da hamjakno?

¹⁶Hakhe ang norokni poja wng li ya hwnwi norok gosi anw. Hai phano ang norokno phemlogwi khẃi-o khiklai kha hwnwi khoroksa swk sa anw.

¹⁷Ang bahai khe khẃi-o khiklai lang? Ang norokno rohormarokni bere khoroksa swk bai da kusubwi chá lang?

¹⁸Ang Titno tháng ja di hwnwi koi kha, phiya tei khoroksa Khristan takhuknobo bo bai baksa rohor kha. Norok Titno norok’-no kusubwi chá kha da hwn? Bo ba ang bai khá baksa khe tong ya da? Chwng lama twngsa tẃi him ya da?

¹⁹Chwng norokni bwskango kaham hwnwi sijakna bagwi naiwi tongo hwnwi da norok khá ka? Hai ya! Takhukrok, Khristo bwskango kók sa-o; chwng bebak samung khlaimani abo norokno rak rwna bagwi se khlai-o.

²⁰Ang phaiwi norokno nukna muchung tẃi nuk phai glak, norokbo ano nukma muchung tẃi nuk glak hwnwi ang uana-o. Ang phaiwi norokno uálaiwi tong laimano, músú laiwi tong laimano, joli laiwi tong laimano, sakni kaham simi naiwi tong laimano, kók hamya sa laiwi tong laimano, kók ruju sa laiwi tong laimano, kung chuk laiwi tong laimano, chili-lupa wngwi tong laimani nuk anw hwnwi ang uana-o.

²¹Ang norokni thani tei uáisa phai phuru ani Kaitor norokni bwskango ano khorok bom rwnai hwnwi ang uana-o, hakhe borok kwbángma agi sumsok khlaima bai tongmung sitra tongmano yakar ya khoni bagwi ang ma kap anw, bórok buitali-buitala wngmano tei sak tongthok tongmano yakar ya khoni bagwi ang ma kap anw.