Read Kok Borok 2 KORINTH 13 Bible Online

2 KORINTH 13 - Kok Borok bible

2 KORINTH 13

¹Omo bai khe uáitham ang norokni thani thángna hwnmani. Elembago hai hwnwi sama hai, “Majra berna hwn khe sakki khoroknwi eba khorokthamni kók tháisa wngna nang anw.”

²Ang agi sumsok khlainairok bai tei jotono’-no o kók sana nai-o: Ang tei uáisa phai phuru khoroksano phano maya chá glak, uáinwini jora norok bai tong phuru ang o kókno sa kha, hakhe ang tabuk hakchalo tong twtwi omono sa hor phiro.

³Norok naina muchung tẃi’-no Khristo ani khúk tẃi kók samano nuk anw. Norok bai samung khlai phuru bo phan kwrwi wng ya; hai wng yaui bo norokni bisingo bini phan se phunugo.

⁴Bo phan kwrwi wngwi kruso butharjak phano Kaitorni phan bai kwthang tongo. Bo bai thansa wngwi chwngbo phan kwrwi wng kha, tamo khe chwng norok bai samung khlai thani chwng Kaitorni phan bai Khristo bai baksa kwthang tongnai.

⁵Norok sak sakno potaliui nai di, norok poito khlaiwi da tong uansugui nai di. Norok chúk ya wng ya hwn khe Khristo Jisu norokni bisingo tongo hwnwi norok saui man ya da?

⁶Ang khá khlai-o chwng chúk ya wng ya hwnwi norok saui mano.

⁷Norok samung hamya ta khlai thung hwnwi chwng Kaitorni thani suri sano, chwng chúkmano phunukna bagwi omo hai khe suri san ya, tamo khe chwng chúk ya hai wng phano norok samung kaham khlai thung hwnwi chwng omo hai khe suri sano.

⁸Chwng kubuini mungsa hamya khlaiwi man ya, kaham simi se khlaiwi mano.

⁹Chwng bel phano norok rak khe chwng khá srango. Aboni bagwi’-no norok rak súk thung hwnwi chwng suri sano.

¹⁰Aboni bagwi ang norok bai hakchalo tong twtwi omo swihoro. Norokni thani phai phuru Kaitor ano rwmani phanno belai khe phnang ya tẃi khe ang omono swihoro. Ani a phan norokno dera rwna bagwi ya, rak rwna bagwi se.

¹¹Takhukrok, hakhe kak lai kha ta. Norok rak sukna nai lai di, ang hwnmano khna lai di, kók tháisa wng lai di, kwchang kwchang khe tong lai di. Hakhe chwngno hamjaknai tei khá kwchang rwnai Kaitor norok bai tongnai.

¹²Norok kiching norok takhuk hwnwi motom su lai khápang rw lai di.

¹³Kaitorni bebak bororok norokno khápang rohoro.

¹⁴Jisu Khristo norokno bebak’-no khairok thung, Kaitor norokno hamjak thung, Phola Kwthar norok bai baksa tong thung.