Read Kok Borok 2 KORINTH 2 Bible Online

2 KORINTH 2 - Kok Borok bible

2 KORINTH 2

¹Aboni bagwi ang norokni thani haino hai khá hamya khlaina bagwi tháng glak hwnwi khá chong kha.

²Ang norokno khá hamya khlai khe ulo sabo ano khá srang rwnai? Ang khá hamya khlaimani a bororok simi se ano khá srang rwui mannai.

³Abo haini bagwi se ang swkango norokno a kóktun swihoro, norok se ano tongthok rwnai borok, aboni bagwi’-no ang norokni thani thángwi norokni bagwi khá hamya wngna muchung ya. Ang saui man súgo ang tongthok khe norokbo bebak’-no tongthokjago.

⁴Ang uana twtwi, khá yok twtwi, muktwi klai twtwi se norokno abono swihoro; ang norokno khá hamya khlaina bagwi swi ya, norok bebakno’-no ang bwswk hamjak saui man rwna bagwi se swi-o.

⁵Tabuk, khoroksa swk khoroksa swkno khá hamya khlaiwi tong khe abo ano khlai ya, norokno se khlai-o; bo norokno bebak’-no khlai ya phano norokni bere baksano khlai-o, ang a borokno aswk majra berna nai ya.

⁶Norok aswk borok kwbángma bai a borok omo tẃi khe akol rwjakmano abo bai’-no belai se wng kha.

⁷Tabuk a borok belai khá hamya wngwi khá bái ya tẃi khe norok bono nakarwi khá srang rwthai.

⁸Norok bono sói’-no hamjago hwnwi saui man rw di hwnwi ang sa ja-o.

⁹Potalijakmani yagulo norok bahai khe tong rwk kha, phiya norok bebago’-no ani kók khw da khna khna ya omono saui manna bagwi se ang a kóktunno swihoro.

¹⁰Norok khoroksa swkno nakar khe angbo bono nakaro. Ang nakar khe, sói’-no ang mungsa swkni bagwi nakarna nang khe, Soitan chwngno thwngwi man ya tẃi khe ang norokni bagwi se Khristoni bwskango nakaro. Tamni hwn ba Soitanni chapmano chwng saui man ya wng ya.

¹²Khristoni Kothoma Kaham pírna hwnwi Troa-o sógwi khe’-no Subrai aro samungni lama khlaimano ang nuk kha.

¹³Phiya ba chini takhuk Titno nuk yani bagwi ang belai khe uana kha; aboni bagwi ang aroni bororok bai kak laiwi Makidonia-o tháng kha.

¹⁴Ahai phano Kaitor hambai rwjak thung! Tamni hwn ba chwng Khristo bai thansa wngwi khaui tonjakrok hai khe Kaitor bai sal brúm brúm kwplaisa Khristoni misilo tẃijago. Kaitor báhai motom hai khe Khristoni kók chini yak tẃi ha gwnangwi pírwi tongo.

¹⁵Chwng wng kha Khristo Kaitorno satrai motom sókmani a satrai hai, abo mwthangjaknairokni thanibo nango, komornairokni thanibo nango.

¹⁶Komornairokni thani khe abo butharnai báhai mwnam hai; phiya mwthangjaknairokni thani khe abo mwthangnai báhai motom hai. Abo tẃi samungno sabo khlaina chúk?

¹⁷Borok kwbángma Kaitorni kókno hatini manwi kwlai hai khe phalo, chwng abo hai ya. Tamo khe Kaitor chwngno rohorma bai chwng bini bwskango khá sutrang khe Khristoni mungwi kók sa-o.