Read Kok Borok 2 KORINTH 3 Bible Online

2 KORINTH 3 - Kok Borok bible

2 KORINTH 3

¹Omo ba chwng hai’-no hai sak sakni bagwi kók kotor sama da klai? Tei bui hai da chwngbo norokni thani kaham hwnwi sachruna bagwi kóktun nangno? Eba khe norokni aroni da kóktun nangno?

²I’nhi, norok sakphang’-no chini kóktun, abo chini bwkha-o swijak tongo, jotono abono poriui saui mano.

³Khristo sakphang’-no o kóktun swiwi chini yak tẃi rohoro, omo pháng-pháng khe’-no sijago. Abo kali bai swima ya, Kaitor kwthangni Phola bai swima se, abo holongdabo rikma ya, borokni bwkha-o swima se.

⁴Khristo tẃi Kaitorno kwrak khe poito khlaima bai se chwng o kókno sa-o.

⁵Chwng o samung khlaina chúgo hwnwi sanani abo tẃi mungsabo chini kwrwi. Kaitor se chwngno chúk rw-o;

⁶bo’-no chwngno a swmai kwtalni samung khlaina chúk rw-o, abo wng kha swijak kerong ya, abo Phola se. Swijak kerong abo borokno butharo, phiya Phola khe mwthango.

⁷Holongdabo rikjak kerongno yaphar phuru Kaitorni chẃngsacha nukjak kha. Musini mwkhang chẃngmani miri miri wng rwrwk phano abo aswk khe kwchẃng Israilrok bono naisigwi man li ya. Kerongno rwmani bai borok ma thwi-o, hai phano a Kerong aswk chẃngsacha bai rwjak khe

⁸Pholano rwmani abo bwswk se chẃng kukno!

⁹Borokno majra bernai Kerong se kwchẃng hwn khe borokno majra kwrwi hwnwi phunuknai abo teibo bwswk chẃng kukno!

¹⁰Sana tháng khe agini chẃngmani slái tabukni abo teibo chẃng kukma bai agini abo sijak li ya.

¹¹Srapsa tongnai abo se aswk chẃngwi tong khe tei pái phlai ya abo bwswk se chẃng kukno!

¹²Omo tẃi khatungma bai chwng khá toro.

¹³Chwng Musi hai ya, bini mwkhang chẃngmano miri miri khe nukjak ya wng ya sak Israilrok abono nuk ya tẃi khe bo mwkhang rí ma kholop kha.

¹⁴Sói’-no bórok khá si ya; tabuk suda bórok Swmai Kwchamno pori khe bórokni bwkha a rí bai kholopjago. Khristo bai thansa wngma bai simi se a rí kholopma khukjago.

¹⁵Tabuk suda bórok Musini Kerongno pori brúm brúm bórokni bwkha a rí bai kholopjagwi tongo.

¹⁶Elembago o kók sama hai khe abo khukjago, “Subraini phaising uphil phuru Musini mwkhangni rí kholopma khukjago.”

¹⁷Tabuk, oro “Subrai” Pholano hwnmani se; Subraini Phola tong thani khe bororok khajak ya.

¹⁸Aboni bagwi chwng bebak’-no mwkhang rí kholopjak ya hai khe Subraini chẃngsachano kogwi phunugo. A chẃngsacha chwngno bo hai khe’-no snamo, chẃngsa rwma saka chẃngsa rw-o; a chẃngsacha Subraini aroni phai-o, bo wng kha Phola.