Read Kok Borok 2 KORINTH 5 Bible Online

2 KORINTH 5 - Kok Borok bible

2 KORINTH 5

¹Chwng saui mano chwng tongmani o ríni nok báiwi tháng phano, kók khe chini o swngcharni bwsak abo báiwi tháng phano, Kaitor chuknoha-o chwngno tongnani nok rw kha, abo yak bai khe tangjak nok hai ya tamo khe tei komor phlai ya Chukha-o se tangjago.

²Aboni bagwi rí chumma hai a chuknohani nokno belai chumna muchungwi chwng tabuk kengai laiwi tongo.

³Abono chum khe chwng sak lánga khararak wng glak.

⁴O swngcharni ríni nogo tong phuru chwng sekhrupjagwi ma kengai laiwi tongo; o kók khe chwng o swngcharni bwsakno khibiui rwna nai-o a kók ya, tamo khe a bwsak thwiblang mwthangjak sukna tẃi khe chwng chuknohani a bwsakno chum rwjakna nai-o.

⁵Omoni bagwi chwngno tiyar khlainai khe Kaitor se, hakhe bo rwna hwnmarok chwng mannai hwnwi saui man rw sukna bagwi bo chwngno Phola Kwthar rw kha.

⁶Aboni bagwi chwng bwkha rak máng tongo. Chwng saui mano chwng o bwsak bai tong sak Subrai bai hakchalo tongo,

⁷tamni hwn ba chwng nukma bai tong ya, poito bai se tongo.

⁸Chwng bwkha rak súgo, hakhe chwng o bwsakno khibiui Subrai bai tongna ham kugo hwnwi khá ka-o.

⁹Hai phano chwng omono’-no nai kugo, oro tong phano aro tong phano chwng bo bai hamjakna nai-o.

¹⁰Tamni hwn ba chwng joto’-no buj thumjakna bagwi Khristoni bwskango ma bachanai. O swngcharo tong phuru samung khlaima tẃi’-no jotono janijani manthai mannai, samung kahamnibo mannai, hamyanibo mannai.

¹¹Subraino kirinano saui manẃi chwng buinobo khá hap rwna nai-o. Kaitor chwngno saui man súgo, norokbo khá bai chwngno saui mano hwnwi ang khá ka-o.

¹²Chwng haino hai norokni thani sakno kaham sana nai ya, abo hai wng yaui norokno chini bagwi kung chuknani lama se khlaiwi rwna nai-o; hakhe tongmungno naisik yaui saka-saka kók kotor sanairokno norok sa phirwi man anw.

¹³Tumungno chwng pál man ya wng khe, abo Kaitorni bagwi se, chwng manjak wngwi tong khe abo norokni bagwi se.

¹⁴Khristo chwngno hamjakmani abo bai chwng narwkjagwi tongo, tamni hwn ba chwng tabuk saui man kha bebak borokni bagwi borok khoroksa thwi kha, abo bai’-no bo bai baksa bebak’-no thwi-o.

¹⁵Thangwi tongnairok bórok sakni bagwi tong yaui bórokni bagwi thwiwi mwthangwi tisajaknai bini bagwi se tongna tẃi khe bo bebak borokni bagwi thwi kha.

¹⁶Hakhe borok bai borok nuk lai tẃi chwng tabuk abo hai tei nuk li ya. Agi chwng Khristono borok hai nuk phano tabuk bono abo hai tei nuk li ya.

¹⁷Khoroksa phano Khristo bai thansa wng khe’-no bo borok kwtal wng kha; kwcham thángwi kwtal phaiwi sók phai-o.

¹⁸Abo bebak’-no Kaitor khlaimani, bo Khristoni bising tẃi bo bai chwngno kwtha rw kha, hakhe bo buinobo bo bai kwtha rwnani samung chwngno ber kha.

¹⁹Chini kók khe ahai, Kaitor Khristoni bising tẃi bo bai bebak borokno kwtha rw kha. Kaitor bórokni sumsokno rom li ya, hakhe bo bai borokno kwtha ramani a kókno chini yago rw kha.

²⁰Chwng aboni bagwi Khristoni mungwi kók sa-o, abo chini khúk tẃi Kaitor norokno kók sama hai se; chwng Khristoni mungwi norokno Kaitor bai kwtha di hwnwi sa ja-o.

²¹Khristo wng kha sumsok kwrwi, tamo khe bo bai thansa wngma tẃi chwng Kaitor hai kaham wngna tẃi khe Kaitor chini bagwi bono chwng bai baksa sumsok gwnang khlai kha.