Read Kok Borok 2 KORINTH 8 Bible Online

2 KORINTH 8 - Kok Borok bible

2 KORINTH 8

¹Takhukrok, Makidoniani motharogo Kaitor khairogwi tamo khlai kha chwng norokno si rwna nai-o.

²Bórok tekto rwjagwi belai khe potalijak kha, hai phano bórok belai kwrwi twtwi phano jai kheno khá tongthokma bai yak kuar khe rw kha.

³Ang norokno sói’-no sa-o, bórok rwui mansak rw kha, rwui manmani sláibo kwbáng rw kha. Bórok khá muchung tẃi khe’-no

⁴“Chwngnobo Judiani Kaitorni bororokno chuba chru rw di,” hwnwi chini thani koiwi kha.

⁵Abo chwng khatungmani slái se belai wng kha. Swkang bórok sak sakno Subraini yago yaphar kha, hakhe Kaitor muchungma bai bórok sak sakno chini thanibo yaphar kha.

⁶Aboni bagwi’-no norok hamjagwi o samung kaham khlaimano pái rwna bagwi chwng o samung chengnai Titno norokno chuba di hwnwi koiwi sa kha.

⁷Bebak samungo norok belai kaham; norok belai khe poito khlai-o, belai khe kók sa-o, belai khe si-o, belai khe khá súgo, chwngno belai khe hamjago. Hakhe norok hamjagwi o samung kahamnobo belai khe khlai di.

⁸Ang omono dagiui sa ya, tamo buirok se bwswk chubana muchungjagwi tong abono phunugui ang norok bwswk hamjak potaliui nai-o.

⁹Chini Subrai Jisu Khristo bwswk khairok kha norok abono saui mano; bo kwrwi wngma bai norokno gwnang khlaina bagwi bo gwnang phano norokni bagwi kwrwi wng kha.

¹⁰Oro ani kók khe ahai: norok semano chengma samungno tabuk pái khe se cha kuknai. Norok’-no swkang o samung khlai kha, hai simi ya, norok’-no swkang khlainabo muchungjago.

¹¹Abo tẃi khe’-no tabuk o samung khlaiwi pái di! Norok aphuru muchungma hai’-no tabuk khlaiwi pái di, norokni phan tong tẃi’-no khlaiwi pái di.

¹²Norok rwna muchung khe Kaitor norokni tongmano naiwi se yachaknai, norokni kwrwino naiwi ya.

¹³Ang norokni saka poja bogwi buino phiyókna nai ya, tamo khe tabuk norokni kwbáng tongma bai biyalo klaijakrokno norok chubathai. Hai khe bórokni kwbáng tongma jora norok biyalo klai khe bórokbo norokno chubanai. Omo tẃi kheno norok bai bórok baksa khe nai laima klai-o.

¹⁵Elembago hai hwnwi sama hai, “Kwbáng khe thumnai bini kwbáng kwrwi kha, phiya kisa thumnai bo biyalo klai li ya.”

¹⁶Chwng norokno chubana muchungma hai’-no Titnobo chubana muchung rwma bagwi chwng Kaitorno bwswk hambai rw!

¹⁷Bo chini kókno simi narwk kha, hai ya; bo sakno aswk chubana muchungma bai norokni aro thángna hwnwi haino khá chong kha.

¹⁸Motha brúm brúm Kothoma Kaham sama bai kaham khe bórom khlaijaknai a takhuknobo chwng bini logi rohoro.

¹⁹Abo simi ya, Subraini mwkhang chẃng rwna bagwi, phiya chwng chubana muchungmano phunukna bagwi chwng hamjagwi o samung kaham khlai twtwi bo chini logi thángna hwnwi motharok bai chongjak kha.

²⁰Chwng aswk rang kwbángma rwmano tẃiwi samung khlai thani bui kók tháisa phano sa ya tẃi khe chwng hus ma wngo.

²¹Subraini bwskango simi chwng kaham khlaina nai ya, borokni mokolobo kaham khlaina nai-o.

²²Aboni bagwi chwng chini takhukno bórokni logi rohoro; chwng bono kwbángmano potaliui naiwi bini chubana muchungmano saui man kha. Bo tabuk norokno belai poito khlaima bai norokno teibo kwbángma chubana muchungjagwi tongo.

²³Tit khe hai, bo ani logisong, norokno chubana bagwi ang bai baksa samung khlainai; bo bai baksa thángnai a takhukrok hwn khe bórok wng kha motharok bai rohorjaknairok, Khristoni mwkhangno chẃng rwnairok.

²⁴Norok bórokno hamjak di, hakhe norok hamjakmano bebak motha saui man suknai, phiya chwng norokni bagwi kók kotor samano kubui hwnwi saui mannai.